കുവൈത്ത് സിറ്റി– കുവൈത്തിലെ എമർജൻസി മെഡിക്കൽ സർവീസ് സെന്ററിന് (ആംബുലൻസ് സെന്റർ) നേരെ ഷെൽ ചീളുകൾ പതിച്ച് രണ്ട് ജീവനക്കാർക്ക് പരിക്കേറ്റു. ചൊവ്വാഴ്ചയാണ് സംഭവം നടന്നതെന്ന് കുവൈത്ത് ആരോഗ്യ മന്ത്രാലയം അറിയിച്ചു. പരിക്കേറ്റ രണ്ട് പേരുടെയും നില നിലവിൽ തൃപ്തികരമാണ്. ജോലിക്കിടെയാണ് ഇവർക്ക് പരിക്കേറ്റത്. സംഭവസ്ഥലത്ത് വെച്ച് തന്നെ ഇവർക്ക് പ്രാഥമിക ചികിത്സ നൽകുകയും തുടർന്ന് വിദഗ്ധ ചികിത്സയ്ക്കായി അടുത്തുള്ള ആശുപത്രിയിലേക്ക് മാറ്റുകയും ചെയ്തു. മന്ത്രാലയ വക്താവ് ഡോ. അബ്ദുള്ള അൽ സനദ് ആണ് വാർത്ത സ്ഥിരീകരിച്ചത്.
മേഖലയിലെ നിലവിലെ സാഹചര്യങ്ങളുടെ പശ്ചാത്തലത്തിൽ പരിക്കേറ്റവർക്ക് ആവശ്യമായ എല്ലാ വൈദ്യസഹായവും ഉറപ്പാക്കിയിട്ടുണ്ടെന്നും മന്ത്രാലയം വ്യക്തമാക്കി. സംഭവത്തെക്കുറിച്ച് വിശദമായ അന്വേഷണം നടത്താൻ ബന്ധപ്പെട്ട അധികൃതർക്ക് നിർദ്ദേശം നൽകിയിട്ടുണ്ട്. രാജ്യത്തെ ആരോഗ്യ സംവിധാനങ്ങൾ പൂർണ്ണ സജ്ജമാണെന്നും ആരോഗ്യപ്രവർത്തകരുടെ സുരക്ഷയ്ക്ക് മുൻഗണന നൽകുമെന്നും മന്ത്രാലയം അറിയിച്ചു.
ഏറ്റവും പുതിയ വാർത്തകൾ വാട്സാപ്പിൽ ലഭിക്കാൻ Join Our WhatsApp Group