കുവൈത്ത് സിറ്റി– വന്മയക്കുമരുന്ന് വേട്ടയുമായി കുവൈത്ത് സുരക്ഷാ അധികൃതര്. ഒരു ദശലക്ഷം വരുന്ന ക്യാപ്റ്റഗന് മയക്കുമരുന്ന് ഗുളികകള് ആണ് കുവൈറ്റ് ആഭ്യന്തര മന്ത്രാലയത്തിന്റെ കീഴിലുള്ള ജനറല് ഡിപ്പാര്ട്ട്മെന്റ് ഫോര് ഡ്രഗ് കണ്ട്രോള്(GDDC) പിടികൂടിയത്. ക്രിമിനല് സെക്യൂരിറ്റി സെക്ടറിന്റെ നേതൃത്വത്തില് നടത്തിയ ഓപ്പറേഷനിലാണ് ലഹരി ഗുളികകള് പിടികൂടിയത്. പ്രതിയെക്കുറിച്ചുള്ള വിശ്വസനീയമായ ഇന്റലിജന്സ് രഹസ്യവിവരങ്ങള് ലഭിച്ചതോടെയാണ് നടപടിക്ക് തുടക്കമിട്ടത്. മയക്കുമരുന്ന് കള്ളക്കടത്തിലും, വിതരണത്തിലും പ്രതിക്ക് പ്രധാന പങ്കുണ്ടെന്ന് കണ്ടെത്തി. ശക്തമായ സുരക്ഷാസംവിധാനങ്ങളോടെയും, സംയോജിത നീക്കത്തിലൂടെയും പ്രതിയെ പിടികൂടുകയും,കൈവശമുണ്ടായിരുന്ന ക്യാപ്റ്റഗണ് എന്ന മാരക ലഹരി ഗുളികകള് വലിയ അളവില് കണ്ടെത്തുകയും ചെയ്തു.
അറസ്റ്റിനെ ചെറുക്കാനും ഓഫിസര്മാരെ തടസ്സപ്പെടുത്താനും പ്രതി ശ്രമിച്ചെങ്കിലും പരിക്കുകള് വരുത്താതെ തന്നെ ബലപ്രയോഗത്തിലൂടെ ഇയാളെ കീഴ്പ്പെടുത്തുകയായിരുന്നു. തുടര്ന്ന് നടത്തിയ പരിശോധനയില്,പ്രതി നിയമവിരുദ്ധമായി കുവൈറ്റ് പൗരത്വം നേടിയതായും വ്യക്തമായി. ഇയാളുടെ പക്കല് നിന്ന് വ്യാജ രേഖകളും കണ്ടെത്തിയിട്ടുണ്ട്. ജനറല് ഡിപ്പാര്ട്ട്മെന്റ് ഫോര് ഡ്രഗ് കണ്ട്രോളും നാഷണാലിറ്റി അഫയേഴ്സ് ഇന്വസ്റ്റിഗേഷന്സ് ഡിപ്പാര്ട്ട്മെന്റും ചേര്ന്ന് വ്യാജ പൗരത്വക്കേസില് നിയമനടപടികള്ക്കും തുടക്കമിട്ടിട്ടുണ്ട്.