കുവൈത്ത് സിറ്റി – ജലീബ് അല്‍ശുയൂഖിലെ ലൈസന്‍സില്ലാത്ത ക്ലിനിക്കില്‍ ചികിത്സ നടത്തിയ ഇന്ത്യക്കാരിയെ ക്രിമിനല്‍ സുരക്ഷാ വിഭാഗം അറസ്റ്റ് ചെയ്തതായി കുവൈത്ത് ആഭ്യന്തര മന്ത്രാലയം അറിയിച്ചു. പ്രദേശത്തെ നിയമവിരുദ്ധ പ്രവര്‍ത്തനങ്ങള്‍ സംബന്ധിച്ച അന്വേഷണങ്ങള്‍ക്കിടെയാണ് നിയമ വിരുദ്ധ ക്ലിനിക്കും വ്യാജ ഡോക്ടറെയും കണ്ടെത്തിയത്. വീട്ടമ്മ എന്ന പ്രൊഫഷനില്‍ രാജ്യത്ത് കഴിയുന്ന ഇന്ത്യക്കാരി കുട്ടിയെ പരിശോധിക്കുന്നതിനിടെയാണ് അറസ്റ്റിലായത്.
വ്യത്യസ്ത ഇനം മരുന്നുകളുടെ വന്‍ ശേഖരം, ബി.പി അപ്പാരറ്റെസ്, സ്റ്റെതസ്‌കോപ്പ്, ആരോഗ്യ മന്ത്രാലയം വിതരണത്തിനായി നീക്കിവെച്ച കുട്ടികള്‍ക്കുള്ള പാല്‍പ്പൊടികള്‍ എന്നിവ ഇന്ത്യക്കാരിയുടെ കേന്ദ്രത്തില്‍ കണ്ടെത്തി. കാപ്‌സ്യൂളുകളുടെ രൂപത്തില്‍ നാടന്‍ മരുന്നുകള്‍ തയാറാക്കി മെഡിക്കല്‍ മേല്‍നോട്ടമില്ലാതെ ഇവര്‍ രോഗികള്‍ക്ക് വിതരണം ചെയ്യുന്നതായും കണ്ടെത്തി.
ശരിയായ യോഗ്യതയോ ബന്ധപ്പെട്ട വകുപ്പുകളില്‍ നിന്നുള്ള ലൈസന്‍സോ ഇല്ലാതെയാണ് രോഗികളെ ചികിത്സിക്കുന്നതെന്നും ചില മരുന്നുകള്‍ വിദേശത്തു നിന്ന് ഇറക്കുമതി ചെയ്യുകയാണെന്നും ബാക്കിയുള്ളവ പ്രാദേശിക ഫാര്‍മസികളില്‍ നിന്ന് വാങ്ങുകയാണ് ചെയ്യുന്നതെന്നും അന്വേഷണത്തില്‍ വ്യാജ ഡോക്ടര്‍ സമ്മതിച്ചു. നിയമനടപടികള്‍ക്കായി ഇന്ത്യക്കാരിയെ പിന്നീട് ബന്ധപ്പെട്ട വകുപ്പിന് കൈമാറിയതായി ആഭ്യന്തര മന്ത്രാലയം അറിയിച്ചു.