കുവൈത്ത് സിറ്റി – ഡിജിറ്റല്‍ നിരക്ഷരതാ നിര്‍മാര്‍ജനം പുതിയ വെല്ലുവിളിയായി മാറിയെന്ന് കുവൈത്ത് മുന്‍ വിദ്യാഭ്യാസ മന്ത്രി ഡോ. മൂദി അല്‍ഹമൂദ്. വിദ്യാഭ്യാസ മേഖലയിലെ ഡിജിറ്റല്‍ അനുഭവം വികസിപ്പിക്കേണ്ടതും ഭാവി തലമുറകള്‍ക്കിടയിലുള്ള സാങ്കേതിക വിടവുകള്‍ നികത്തേണ്ടതും ആവശ്യമാണ്. ഡിജിറ്റല്‍ നിരക്ഷരത ഇല്ലാതാക്കണം. ഇത് വിദ്യാഭ്യാസ മേഖല നേരിടുന്ന പുതിയ വെല്ലുവിളിയാണ്. വിദ്യാഭ്യാസ സംവിധാനങ്ങളില്‍ സാങ്കേതികവിദ്യക്ക് ശക്തമായ സ്വാധീനമുണ്ടെന്ന് ഡോ. മൂദി അല്‍ഹമൂദ് പറഞ്ഞു. വിദ്യാഭ്യാസ സംവിധാനങ്ങളില്‍ കൃത്രിമ ബുദ്ധി സാങ്കേതികവിദ്യകള്‍ സംയോജിപ്പിക്കേണ്ടത് പ്രധാനമാണ്. നിരക്ഷരത വായിക്കാനും എഴുതാനുമുള്ള കഴിവില്ലാമയില്‍ മാത്രം ഒതുങ്ങുന്നില്ല, മറിച്ച് നമ്മുടെ കാലത്തെ ഡിജിറ്റല്‍ അനുഭവത്തെയും ഇത് ഉള്‍ക്കൊള്ളുന്നു.
സാങ്കേതിക പുരോഗതി ഒരു ഓപ്ഷനല്ലാതായി മാറുകയാണ്. ആഗോള സംഭവവികാസങ്ങളുമായി പൊരുത്തപ്പെടാനുള്ള അടിസ്ഥാന ആവശ്യകതയായി ഇത് മാറിയിട്ടുണ്ട്. ശാസ്ത്രവും സാങ്കേതികവിദ്യയും അഭേദ്യമാണ്. ജീവിതത്തിന്റെ എല്ലാ മേഖലകളിലും വിവിധ അക്കാദമിക് വിഷയങ്ങളിലും പുതിയ തലമുറയുടെ ഡിജിറ്റല്‍ ശേഷികള്‍ വര്‍ധിപ്പിക്കുന്നതിന് ഡിജിറ്റല്‍ മാര്‍ഗങ്ങള്‍ ഉപയോഗിക്കേണ്ടത് പ്രധാനമാണ്. ഈ സാങ്കേതികവിദ്യകളുടെ അനുചിതമായ ഉപയോഗങ്ങളിലേക്ക് ആകര്‍ഷിക്കപ്പെടുന്നതില്‍ നിന്ന് കുട്ടികളെ സംരക്ഷിക്കുന്നതിന് ധാര്‍മ്മിക ചട്ടക്കൂടുകള്‍ സ്ഥാപിക്കണമെന്നും ഡോ. മൂദി അല്‍ഹമൂദ് ആവശ്യപ്പെട്ടു.
വിദ്യാഭ്യാസത്തില്‍ കൃത്രിമബുദ്ധി കോഴ്‌സുകള്‍ ഉള്‍പ്പെടുത്തിക്കൊണ്ട് ഡിജിറ്റല്‍ വിടവ് നികത്താന്‍ ഗള്‍ഫ് രാജ്യങ്ങള്‍ നടപടികള്‍ സ്വീകരിച്ചു വരുന്നുണ്ട്.