കുവൈത്ത് സിറ്റി– പ്രവാസി തൊഴിലാളികളുടെ ശമ്പളം കൃത്യസമയത്ത് വിതരണം ചെയ്യാത്ത കമ്പനികൾക്കെതിരെ കടുത്ത നിയമനടപടിയുണ്ടാകുമെന്ന് കുവൈത്ത് ഒന്നാം ഉപപ്രധാനമന്ത്രിയും ആഭ്യന്തര മന്ത്രിയുമായ ശൈഖ് ഫഹദ് അൽയൂസഫ് അൽസ്വബാഹ് മുന്നറിയിപ്പ് നൽകി. ബിസിനസ് ഉടമകളുമായി നടത്തിയ കൂടിക്കാഴ്ചയിലാണ് പബ്ലിക് അതോറിറ്റി ഓഫ് മാൻപവർ ചെയർമാൻ കൂടിയായ മന്ത്രി ഇക്കാര്യം വ്യക്തമാക്കി വ്യക്തമാക്കിയത്.
രാജ്യത്ത് ശമ്പളം നൽകാത്ത സാഹചര്യം അതീവ ഗുരുതരമായി തുടരുകയാണെന്ന് മന്ത്രി പറഞ്ഞു. നിലവിൽ 10,000 കമ്പനികളുടെ ഫയലുകൾ ഇതേക്കുറിച്ച് അന്വേഷിച്ചുവരികയാണ്. ഇതിൽ ചില കമ്പനികൾ കഴിഞ്ഞ നാലു മാസമായി ജീവനക്കാർക്ക് വേതനം നൽകിയിട്ടില്ല. സ്വദേശികളെന്നോ പ്രവാസികളെന്നോ ഉള്ള വിവേചനമില്ലാതെ വേതനം കൃത്യമായി നൽകാൻ തൊഴിലുടമകൾ തയ്യാറാകണം. മുമ്പുണ്ടായിരുന്ന അരാജകാവസ്ഥ ഇനി അനുവദിക്കില്ലെന്നും അദ്ദേഹം കൂട്ടിച്ചേർത്തു.
ശമ്പളം നൽകാത്തതിനെ തുടർന്ന് ഈ വർഷം ജൂൺ വരെ ഏകദേശം 8,450 കമ്പനികളുടെ ഫയലുകൾ മരവിപ്പിച്ചതായി പബ്ലിക് അതോറിറ്റി ഓഫ് മാൻപവർ ഡയറക്ടർ ജനറൽ റബാബ് അൽഉസൈമി യോഗത്തിൽ അറിയിച്ചു. അഞ്ചോ അതിലധികമോ തൊഴിലാളികളുള്ള ആകെ കമ്പനികളുടെ 18.3 ശതമാനത്തോളം വരുമിത്.
കഴിഞ്ഞ വർഷം ജൂലൈയിൽ 38.7 ശതമാനമായിരുന്ന ശമ്പള വിതരണ നിരക്ക്, ഈ വർഷം ജൂലൈ ആയപ്പോഴേക്കും 75.6 ശതമാനമായി വർധിച്ചിട്ടുണ്ട്. ശമ്പളം പ്രാദേശിക ബാങ്കുകളിലേക്ക് കൃത്യമായി നിക്ഷേപിക്കുന്നുണ്ടെന്ന് ഉറപ്പുവരുത്താൻ കുവൈത്ത് സെൻട്രൽ ബാങ്കുമായി ചേർന്ന് നടപടികൾ തുടരുകയാണെന്നും അവർ വ്യക്തമാക്കി.