കുവൈത്ത് സിറ്റി – ഐ.എസ് ഭീകര സംഘടനയിലെ അംഗങ്ങളുമായി ആശയവിനിമയം നടത്തുകയും രാജ്യത്തെ ഒരു വിഭാഗത്തില്പ്പെട്ടവരുടെ ആരാധനാലയത്തില് ഭീകരാക്രമണം നടത്തുകയെന്ന ഉദ്ദേശ്യത്തോടെ സ്ഫോടകവസ്തുക്കള് നിര്മ്മിക്കുന്നതില് പരിശീലനം നേടുകയും ചെയ്ത രണ്ട് പ്രായപൂര്ത്തിയാകാത്തവരെ ആഭ്യന്തര മന്ത്രാലയത്തിനു കീഴിലെ ദേശീയ സുരക്ഷാ സേന അറസ്റ്റ് ചെയ്തു. സുരക്ഷാ നിരീക്ഷണം, അന്വേഷണം, തുടര്നടപടികള് എന്നിവയുടെ ഭാഗമായാണ് അറസ്റ്റ് നടന്നതെന്ന് മന്ത്രാലയം അറിയിച്ചു.
പ്രതികള്ക്കെതിരെ ആവശ്യമായ നിയമ നടപടികള് സ്വീകരിച്ചിട്ടുണ്ടെന്നും നിയമപ്രകാരം ആവശ്യമായ നടപടിക്രമങ്ങള് പൂര്ത്തിയാക്കാന് ഇരുവരെയും ബന്ധപ്പെട്ട വകുപ്പുകള്ക്ക് കൈമാറിയതായും മന്ത്രാലയം പ്രസ്താവനയില് പറഞ്ഞു. വ്യത്യസ്ത ഇനം തോക്കുകള്, വാളുകള്, ബോംബ് നിര്മ്മാണ സാമഗ്രികള്, മൊബൈല് ഫോണുകള്, ടാബുകള് എന്നിവ അടക്കമുള്ള വസ്തുക്കള് പ്രതികളുടെ പക്കല് നിന്ന് പിടിച്ചെടുത്തു.
സമൂഹത്തിന്റെ സുരക്ഷക്ക് ഭീഷണിയാകുന്ന എന്തും നിരീക്ഷിക്കാനും തുടര്നടപടികള് സ്വീകരിക്കാനും, ബാധകമായ നിയമപരമായ നടപടിക്രമങ്ങള്ക്കനുസൃതമായി നിയമവിരുദ്ധമായ ഏതൊരു പ്രവൃത്തിയും രാജ്യത്തിന്റെ സുരക്ഷയും സമൂഹത്തിലെ അംഗങ്ങളുടെ സുരക്ഷയും സംരക്ഷിക്കുന്ന രീതിയില് കൈകാര്യം ചെയ്യാനും ശ്രമങ്ങള് തുടരുന്നതായി മന്ത്രാലയം സ്ഥിരീകരിച്ചു. തങ്ങളുടെ കുട്ടികളെ സൂക്ഷ്മമായി നിരീക്ഷിക്കാനും നിയമം കുറ്റകരമാക്കുന്ന ആശയങ്ങളിലോ പെരുമാറ്റങ്ങളിലോ പ്രവൃത്തികളിലോ ഉള്പ്പെടുന്നതിന്റെ അപകടസാധ്യതകളെ കുറിച്ച് അവബോധം വളര്ത്താനും മാതാപിതാക്കളോടും രക്ഷിതാക്കളോടും മന്ത്രാലയം അഭ്യര്ഥിച്ചു. കുട്ടികളുടെ സോഷ്യല് മീഡിയ ഉപയോഗം നിരീക്ഷിക്കേണ്ടതും കുടുംബ മേല്നോട്ടവും മാര്ഗ്ഗനിര്ദ്ദേശവും ശക്തിപ്പെടുത്തേണ്ടതും രാജ്യത്തോടുള്ള കൂറ്, ദേശീയത, നിയമത്തോടുള്ള ബഹുമാനം എന്നിവയുടെ മൂല്യങ്ങള് വളര്ത്തിയെടുക്കേണ്ടതും ഏറെ പ്രധാനമാണ്. കുട്ടികളെ സംരക്ഷിക്കാനും രാജ്യത്തോടുള്ള അവരുടെ ഉത്തരവാദിത്തബോധവും അവബോധവും വര്ധിപ്പിക്കാനും ഇത് സഹായിക്കുമെന്നും ആഭ്യന്തര മന്ത്രാലയം പറഞ്ഞു.