റിയാദ്– കേളി കലാസാംസ്കാരിക വേദിയുടെ സിൽവർ ജൂബിലി ആഘോഷങ്ങളുടെ ഭാഗമായി സംഘടിപ്പിക്കുന്ന ഒൻപതാമത് മെഗാ രക്തദാന ക്യാമ്പ് ‘ജീവസ്പന്ദനം 2026’ ഈ മാസം 15-ന് വെള്ളിയാഴ്ച നടക്കും. രാവിലെ 8 മണി മുതൽ വൈകിട്ട് 4 മണിവരെ ബദിയയിലെ ഫ്ലാമിഗോ മാളിലുള്ള മാർക് ആൻഡ് സേവ് ഹൈപ്പർമാർക്കറ്റുമായി സഹകരിച്ചാണ് ക്യാമ്പ് ഒരുക്കുന്നത്. ഒരേസമയം ഹൈപ്പർമാർക്കറ്റിനുള്ളിൽ 20 പേർക്കും, പുറത്ത് സജ്ജീകരിച്ചിരിക്കുന്ന മൂന്ന് മൊബൈൽ യൂണിറ്റ് ബസ്സുകളിലായി 16 പേർക്കും രക്തം നൽകാനുള്ള സൗകര്യമുണ്ടാകുമെന്ന് സംഘാടകർ വാർത്താസമ്മേളനത്തിൽ അറിയിച്ചു.
സൗദി ആരോഗ്യ മന്ത്രാലയത്തിന് കീഴിലുള്ള റിയാദ് ബ്ലഡ് ബാങ്കുമായി സഹകരിച്ച് കഴിഞ്ഞ എട്ട് വർഷമായി കേളി ഇത്തരം ക്യാമ്പുകൾ നടത്തിവരുന്നു. വിശുദ്ധ ഹജ്ജിന് മുന്നോടിയായി രക്തശേഖരണം ലക്ഷ്യമിട്ടാണ് ഈ സേവനപ്രവർത്തനം. കഴിഞ്ഞ വർഷം വിവിധ ഏരിയ കമ്മിറ്റികളുടെ സഹകരണത്തോടെ 1428 യൂണിറ്റ് രക്തം ശേഖരിക്കാൻ കേളിക്ക് സാധിച്ചിരുന്നു. ഇത്തവണ കൂടുതൽ ദാതാക്കളെ പങ്കെടുപ്പിക്കാൻ വിപുലമായ ക്രമീകരണങ്ങളാണ് ചെയ്തിരിക്കുന്നത്. വിവിധ സ്ഥലങ്ങളിൽ നിന്നുള്ള രക്തദാതാക്കളെ ക്യാമ്പ് നടക്കുന്ന സ്ഥലത്ത് എത്തിക്കുന്നതിനായി പ്രത്യേക ബസ് സൗകര്യവും ഏർപ്പെടുത്തിയിട്ടുണ്ട്.
വാർഷിക ക്യാമ്പുകൾക്ക് പുറമെ കേളിയുടെ രക്തദാന സെൽ വഴി വർഷംതോറും ഇരുന്നൂറിലധികം യൂണിറ്റ് രക്തം ആവശ്യക്കാർക്കായി നൽകിവരുന്നുണ്ട്. ക്യാമ്പിന്റെ വിജയത്തിനായി ലിപിൻ പശുപതി ചെയർമാനായും ബിജി തോമസ് കൺവീനറായും ഉള്ള 101 അംഗ സംഘാടക സമിതി രൂപീകരിച്ചു. ഇന്ത്യയിലെ വിവിധ സംസ്ഥാനങ്ങളിൽ നിന്നുള്ളവരും മറ്റ് രാജ്യക്കാരായ പ്രവാസികളും സൗദി പൗരന്മാരും കേളിയുടെ ഈ ജീവകാരുണ്യ പ്രവർത്തനത്തിൽ പങ്കാളികളാകാറുണ്ട്. വാർത്താസമ്മേളനത്തിൽ കേളി കേന്ദ്ര രക്ഷാധികാരി സെക്രട്ടറി കെ.പി.എം. സാദിഖ്, പ്രസിഡന്റ് ഗഫൂർ ആനമങ്ങാട്, സെക്രട്ടറി സുനിൽ കുമാർ തുടങ്ങിയവർ പങ്കെടുത്തു. കൂടുതൽ വിവരങ്ങൾക്ക് 0595687597, 0502243692 എന്നീ നമ്പറുകളിൽ ബന്ധപ്പെടാവുന്നതാണ്.