അബുദാബി – സംഘര്ഷങ്ങളുടെ പശ്ചാത്തലത്തില് യു.എ.ഇയിലും കുവൈത്തിലും പഠനം ഡിസ്റ്റന്സ് രീതിയിലാക്കി. 2026 മാര്ച്ച് 2 തിങ്കളാഴ്ച മുതല് 2026 മാര്ച്ച് 4 ബുധനാഴ്ച വരെ രാജ്യത്തുടനീളമുള്ള എല്ലാ പൊതു, സ്വകാര്യ സ്കൂളുകളിലെയും സര്വകലാശാലകളിലെയും വിദ്യാര്ഥികള്, അധ്യാപകര്, അഡ്മിനിസ്ട്രേറ്റീവ് സ്റ്റാഫ് എന്നിവര് വിദൂര പഠന രീതിയിലേക്ക് മാറുന്നതായി യു.എ.ഇ വിദ്യാഭ്യാസ മന്ത്രാലയവും യു.എ.ഇ ഉന്നത വിദ്യാഭ്യാസ, ശാസ്ത്ര ഗവേഷണ മന്ത്രാലയവും അറിയിച്ചു. നിലവിലെ പ്രാദേശിക സാഹചര്യങ്ങള് കണക്കിലെടുത്ത് ദേശീയ ഉത്തരവാദിത്തബോധവും വിദ്യാഭ്യാസ സമ്പ്രദായത്തിലെ എല്ലാ അംഗങ്ങളുടെയും സുരക്ഷയെ കുറിച്ചുള്ള ആശങ്കയും കണക്കിലെടുത്ത് ഞായറാഴ്ച എല്ലാ ഗ്രേഡ് തലങ്ങളിലും വിദൂര പഠനത്തിലേക്ക് മാറുന്നതായി കുവൈത്ത് വിദ്യാഭ്യാസ മന്ത്രാലയവും അറിയിച്ചു.
നിലവിലെ സാഹചര്യം സൂക്ഷ്മമായി നിരീക്ഷിക്കുകയും രാജ്യത്തെ ബന്ധപ്പെട്ട വകുപ്പുകളുമായി നേരിട്ട് ഏകോപിപ്പിക്കുകയും ചെയ്യുന്നുണ്ടെന്ന് മന്ത്രാലയം വിശദീകരിച്ചു. വിദ്യാഭ്യാസ പ്രക്രിയയുടെ തുടര്ച്ച നിലനിര്ത്തിക്കൊണ്ട് എല്ലാവരുടെയും സുരക്ഷയും ക്ഷേമവും ഉറപ്പാക്കാന് ലക്ഷ്യമിട്ടുള്ളതാണ് എല്ലാ തീരുമാനങ്ങളും നടപടികളും എന്ന് മന്ത്രാലയം വ്യക്തമാക്കി.
ഔദ്യോഗിക വിദ്യാഭ്യാസ പ്ലാറ്റ്ഫോമുകള് വഴി അംഗീകൃത ഷെഡ്യൂളുകള് അനുസരിച്ച് സ്കൂള് ദിനം തുടരും. മുമ്പ് ചെയ്തതുപോലെ, വിദൂര പഠനത്തെ നിയന്ത്രിക്കുന്ന ചട്ടങ്ങള് പൂര്ണ്ണമായും പാലിച്ചുകൊണ്ട്, അധ്യാപകര് ടീംസ് പ്ലാറ്റ്ഫോം വഴി ക്ലാസുകള് സംപ്രേഷണം ചെയ്യുമെന്ന് കുവൈത്ത് വിദ്യാഭ്യാസ മന്ത്രാലയം പറഞ്ഞു.