റിയാദ് – റിയാദ് കിംഗ് ഖാലിദ് അന്താരാഷ്ട്ര വിമാനത്താവളം വഴി വിദേശത്തു നിന്ന് അയച്ച പാഴ്സലില് ഒളിപ്പിച്ച് മയക്കുമരുന്ന് കടത്താനുള്ള ശ്രമം സകാത്ത്, ടാക്സ് ആന്റ് കസ്റ്റംസ് അതോറിറ്റി വിഫലമാക്കി. സുരക്ഷാ സാങ്കേതികവിദ്യകളും പോലീസ് നായ്ക്കളെയും ഉപയോഗിച്ച് നടത്തിയ പരിശോധനയിലാണ് പാഴ്സലില് ഒളിപ്പിച്ച 38,340 ലഹരി ഗുളികകള് കണ്ടെത്തിയത്. മയക്കുമരുന്ന് ശേഖരം കണ്ടെത്തിയ ശേഷം, ജനറല് ഡയറക്ടറേറ്റ് ഓഫ് നാര്കോട്ടിക്സ് കണ്ട്രോളുമായി ഏകോപനം നടത്തി, മയക്കുമരുന്ന് ശേഖരം അടങ്ങിയ പാഴ്സല് സൗദിയില് സ്വീകരിച്ച രണ്ടു പേരെ അറസ്റ്റ് ചെയ്തതായി സകാത്ത്, ടാക്സ് ആന്റ് കസ്റ്റംസ് അതോറിറ്റി വക്താവ് ഹമൂദ് അല്ഹര്ബി അറിയിച്ചു.
സമൂഹത്തെയും ദേശീയ സമ്പദ്വ്യവസ്ഥയെയും സംരക്ഷിക്കാനായി മയക്കുമരുന്ന് കടത്തും കള്ളക്കടത്തും തടയുന്നതില് എല്ലാവരും സഹകരിക്കണമെന്ന് ഹമൂദ് അല്ഹര്ബി ആഹ്വാനം ചെയ്തു. ഏകീകൃത നമ്പറായ 1910 ല് ബന്ധപ്പെട്ടും ഇ-മെയില് വഴിയും അന്താരാഷ്ട്ര നമ്പര് ആയ 009661910 ല് ബന്ധപ്പെട്ടും മയക്കുമരുന്ന് കടത്ത് ശ്രമങ്ങളെയും കള്ളക്കടത്തുകളെയും കുറിച്ച് വിവരം നല്കാവുന്നതാണ്. മയക്കുമരുന്ന് കടത്ത്, കള്ളക്കടത്ത് ശ്രമങ്ങളെ കുറിച്ച് നല്കുന്ന വിവരങ്ങള് തീര്ത്തും രഹസ്യസ്വഭാവത്തോടെ കൈകാര്യം ചെയ്യും. വിവരങ്ങള് ശരിയാണെങ്കില് വിവരം നല്കുന്നയാള്ക്ക് പാരിതോഷികം നല്കുമെന്നും സകാത്ത്, ടാക്സ് ആന്റ് കസ്റ്റംസ് അതോറിറ്റി വക്താവ് ഹമൂദ് അല്ഹര്ബി പറഞ്ഞു.