ദുബായ്: വിവാദമായ ജെഫ്രി എപ്സ്റ്റീൻ ഫയലുകളിലെ വെളിപ്പെടുത്തലുകളെത്തുടർന്ന് ഡിപി വേൾഡ് ചെയർമാനും ചീഫ് എക്സിക്യൂട്ടീവ് ഓഫീസറുമായ സുൽത്താൻ അഹമ്മദ് ബിൻ സുലായമിനെ സ്ഥാനത്ത് നിന്ന് നീക്കി. അതീവ രഹസ്യമായിരുന്ന എപ്സ്റ്റീൻ രേഖകൾ പുറത്തുവരികയും അതിൽ ബിൻ സുലായമിന് കുപ്രസിദ്ധ കുറ്റവാളിയുമായി ഉണ്ടായിരുന്ന വ്യക്തിപരമായ ബന്ധം വെളിപ്പെടുകയും ചെയ്തതിന് പിന്നാലെയാണ് നടപടി. ഇന്ന് വെള്ളിയാഴ്ച (ഫെബ്രുവരി 13, 2026) ഈ നിർണ്ണായക തീരുമാനം പ്രഖ്യാപിച്ചത്.
കമ്പനിയുടെ ഗവേണൻസ് സംവിധാനവും സ്ഥാപനപരമായ നേതൃത്വ ചട്ടക്കൂടും ശക്തിപ്പെടുത്തുന്നതിന്റെ ഭാഗമായാണ് നേതൃമാറ്റമെന്ന് ദുബായ് സർക്കാർ അറിയിച്ചു. ലോകത്തിലെ ഏറ്റവും വലിയ തുറമുഖ ഓപ്പറേറ്റർമാരിൽ ഒന്നായ ഡിപി വേൾഡിന്റെ അന്താരാഷ്ട്ര പ്രതിച്ഛായ നിലനിർത്താനുള്ള നീക്കമായാണ് ഈ നടപടി വിലയിരുത്തപ്പെടുന്നത്.
കുട്ടികളെ ലൈംഗികമായി ചൂഷണം ചെയ്ത കേസിൽ ശിക്ഷിക്കപ്പെട്ട ജെഫ്രി എപ്സ്റ്റീനുമായി ബിൻ സുലായം ദശാബ്ദത്തിലേറെയായി പുലർത്തിയിരുന്ന ബന്ധം കഴിഞ്ഞ ദിവസങ്ങളിൽ പുറത്തുവന്ന യുഎസ് നീതിന്യായ വകുപ്പിന്റെ രേഖകളിൽ വ്യക്തമായിരുന്നു. ജയിലിൽ കിടക്കുമ്പോൾ പോലും എപ്സ്റ്റീൻ ബിൻ സുലായമിന് അയച്ച ഇമെയിലുകളും, പീഡന വീഡിയോകളെക്കുറിച്ചുള്ള പരാമർശങ്ങളും ആഗോളതലത്തിൽ വലിയ പ്രതിഷേധങ്ങൾക്ക് കാരണമായിരുന്നു.
ഡിപി വേൾഡിന്റെ വളർച്ചയിൽ നിർണ്ണായക പങ്ക് വഹിച്ച വ്യക്തിയാണെങ്കിലും, ഗുരുതരമായ ധാർമ്മിക ചോദ്യങ്ങൾ ഉയർന്ന സാഹചര്യത്തിൽ അദ്ദേഹത്തെ സ്ഥാനത്ത് നിന്ന് മാറ്റാൻ സർക്കാർ തീരുമാനിക്കുകയായിരുന്നു. പുതിയ നേതൃത്വത്തെക്കുറിച്ചുള്ള കൂടുതൽ വിവരങ്ങൾ വരും ദിവസങ്ങളിൽ പുറത്തുവിടുമെന്നാണ് സൂചന.
എനിക്ക് ആ പീഡന വീഡിയോ ഇഷ്ടമായി
ജെഫ്രി എപ്സ്റ്റീൻ ഫയലുകളിൽ അടങ്ങിയിരിക്കുന്ന പതിനായിരക്കണക്കിന് അങ്ങേയറ്റം അസ്വസ്ഥതയുണ്ടാക്കുന്ന ഫോട്ടോകൾക്കും വീഡിയോകൾക്കും ഇമെയിലുകൾക്കും ഇടയിൽ സുലായ്മിന്റെ സന്ദേശം ഉണ്ടായിരുന്നു. “എനിക്ക് ആ പീഡന വീഡിയോ ഇഷ്ടപ്പെട്ടു.” എന്നായിരുന്നു സന്ദേശം.
ജനുവരി 30-ന് യുഎസ് ഡിപ്പാർട്ട്മെന്റ് ഓഫ് ജസ്റ്റിസ് 30 ലക്ഷം ഫയലുകൾ പുറത്തുവിട്ടപ്പോൾ, കുട്ടികളെ ലൈംഗികമായി ചൂഷണം ചെയ്യുന്ന ജെഫ്രി എപ്സ്റ്റീനിൽ നിന്ന് ആ ഇമെയിൽ സ്വീകരിച്ച വ്യക്തിയുടെ പേര് മറച്ചുവെച്ചിരുന്നു. പിന്നീടാണ് മിഡിൽ ഈസ്റ്റിലെ ഏറ്റവും ശക്തരായ വ്യവസായികളിൽ ഒരാളായ ഇദ്ദേഹത്തെ തിരിച്ചറിഞ്ഞത്.
ലോകമെമ്പാടുമുള്ള തുറമുഖങ്ങളുടെയും ഷിപ്പിംഗ്, ലോജിസ്റ്റിക്സ് കമ്പനികളുടെയും വിപുലമായ ശൃംഖലയുടെ ഉടമസ്ഥരായ ഡിപി വേൾഡിന്റെ (DP World) ചെയർമാനും ചീഫ് എക്സിക്യൂട്ടീവുമാണ് സുൽത്താൻ അഹമ്മദ് ബിൻ സുലായം. ഫയലുകളിൽ ആദ്യം പേര് മറച്ചുവെച്ചിരുന്ന “ആറ് സമ്പന്നരും ശക്തരുമായ പുരുഷന്മാരിൽ” ഒരാളായിരുന്നു അദ്ദേഹം, ഇദ്ദേഹത്തിന്റെ പേര് ചൊവ്വാഴ്ചയാണ് പുറത്തുവന്നത്. എപ്സ്റ്റീൻ ഫയലുകൾ പുറത്തുവിടാൻ സഹായിച്ച ഡെമോക്രാറ്റ് അംഗം റോ ഖന്നയാണ് ഹൗസ് ഫ്ലോറിൽ വെച്ച് ബിൻ സുലായമിന്റെ പേര് പറഞ്ഞത്.
തിങ്കളാഴ്ചയാണ് രഹസ്യരേഖകൾ പരിശോധിക്കാൻ നീതിന്യായ വകുപ്പ് നിയമസഭാംഗങ്ങളെ അനുവദിച്ചത്, ഇതോടെയാണ് റോ ഖന്നയ്ക്കും റിപ്പബ്ലിക്കൻ അംഗമായ തോമസ് മാസിക്കും പേര് മറച്ചുവെച്ച വ്യക്തികളെ തിരിച്ചറിയാൻ കഴിഞ്ഞത്. യാതൊരു വ്യക്തമായ കാരണവുമില്ലാതെയാണ് നീതിന്യായ വകുപ്പ് ഈ പേരുകൾ മറച്ചുവെച്ചതെന്ന് ഖന്ന പറഞ്ഞു.
എപ്സ്റ്റീൻ ഇമെയിൽ: പീഡന വീഡിയോ
ഫയലുകളിൽ ബിൻ സുലായമിന്റെ പേര് വ്യാപകമായി പ്രത്യക്ഷപ്പെടുന്നുണ്ട്, അതിനോടൊപ്പം അദ്ദേഹവും എപ്സ്റ്റീനും ഒന്നിച്ചുള്ള ഫോട്ടോകളുമുണ്ട്. 2008-ൽ എപ്സ്റ്റീൻ ജയിലിലായതിന് ശേഷം പത്ത് വർഷത്തിലേറെയായി അവർ ഇമെയിലുകൾ കൈമാറിയിരുന്നു. 2009 ഏപ്രിലിൽ, പാം ബീച്ച് ജയിലിൽ 18 മാസത്തെ ശിക്ഷ അനുഭവിക്കുന്നതിനിടയിൽ (ജോലിക്കായി പുറത്തിറങ്ങാൻ അനുവാദമുള്ള സമയത്ത്), എപ്സ്റ്റീൻ ബിൻ സുലായമിന് ഇമെയിൽ അയച്ചു. “നീ എവിടെയാണ്? നിനക്ക് സുഖമാണോ, എനിക്ക് ആ പീഡന വീഡിയോ ഇഷ്ടപ്പെട്ടു,” എന്നായിരുന്നു സുലായ്മിന്റെ സന്ദേശം.
സ്വാധീനമുള്ള ഒരു എമിറാത്തി കുടുംബത്തിൽ ജനിച്ച ബിൻ സുലായം മേഖലയിലെ ഏറ്റവും പ്രമുഖമായ വ്യക്തികളിൽ ഒരാളാണ്. അദ്ദേഹത്തിന്റെ പിതാവ് ദുബായ് രാജകുടുംബത്തിന്റെ ഉപദേഷ്ടാവായിരുന്നു, സഹോദരൻ ഫോർമുല വണ്ണിന്റെയും മറ്റ് മോട്ടോർ സ്പോർട്സിന്റെയും ഗവേണിംഗ് ബോഡി പ്രസിഡന്റാണ്.
നീതിന്യായ വകുപ്പിന്റെ ഫയലുകളിൽ ഉൾപ്പെടുത്തിയിട്ടുള്ള ഒരു കത്തിൽ, 2002 മുതൽ ബിൻ സുലായമിനെ തനിക്ക് അറിയാമെന്നും അദ്ദേഹം തന്റെ “അടുത്ത സുഹൃത്താണെന്നും” എപ്സ്റ്റീൻ സൂചിപ്പിച്ചു.
“സുൽത്താൻ ബിൻ സുലായമിന് 100 ദശലക്ഷം ഡോളറിലധികം ആസ്തിയുണ്ട്. എനിക്ക് അദ്ദേഹത്തെ 8 വർഷത്തിലേറെയായി അറിയാം, ഈ അപേക്ഷയുമായി ബന്ധപ്പെട്ട് അദ്ദേഹം നൽകുന്ന ഏതൊരു വിവരത്തിനും ഞാൻ വ്യക്തിപരമായി ഉറപ്പുനൽകും,” 2010-ൽ ബിൻ സുലായം ഒരു വസ്തു പാട്ടത്തിനെടുക്കാൻ ശ്രമിച്ചപ്പോൾ നൽകിയ ശുപാർശ കത്തിൽ എപ്സ്റ്റീൻ എഴുതി.
2007-ൽ ബിൻ സുലായം ഡിപി വേൾഡിന്റെ ചെയർമാനായി ചുമതലയേറ്റത് മുതൽ, കമ്പനി ലോകത്തിലെ ഏറ്റവും വലിയ പോർട്ട് ഓപ്പറേറ്റർമാരിൽ ഒന്നായി മാറി. ബ്രിട്ടീഷ് ഷിപ്പിംഗ് കമ്പനിയായ പി ആൻഡ് ഒ ഫെറീസും ഡിപി വേൾഡിന്റെ ഉടമസ്ഥതയിലുള്ളതാണ്. 2022-ൽ വെറും 30 മിനിറ്റ് നോട്ടീസ് നൽകി 800 ജീവനക്കാരെ പിരിച്ചുവിട്ടതിനെത്തുടർന്ന് ഈ കമ്പനി വിമർശിക്കപ്പെട്ടിരുന്നു. അന്നത്തെ ട്രാൻസ്പോർട്ട് സെക്രട്ടറി ഗ്രാൻഡ് ഷാപ്സ് ഇതിനെ “ലജ്ജാകരം” എന്നാണ് വിശേഷിപ്പിച്ചത്.
2008-ൽ ദുബായിലെ ട്രംപ് ഇന്റർനാഷണൽ ഹോട്ടൽ ആൻഡ് ടവറിന്റെ ഉദ്ഘാടന ചടങ്ങിൽ സുലായം ഡൊണാൾഡ് ട്രംപിനൊപ്പം ചിത്രങ്ങളിൽ ഉണ്ടായിരുന്നു.