മനാമ: ബഹ്റൈനിലെ കോഴിക്കോട്ടുകാരുടെ ജനകീയ കൂട്ടായ്മയായ കാലിക്കറ്റ് കമ്മ്യൂണിറ്റി ബഹ്റൈന്‍-പവിഴദ്വീപിലെ കോഴിക്കോട്ടുകാര്‍, മലയാളികളായ ബഹ്റൈന്‍ പ്രവാസികള്‍ക്കും കുടുംബാംഗങ്ങള്‍ക്കുമായി സംഘടിപ്പിച്ച സി സി ബി ഐലന്‍ഡ് സിങ്ങര്‍ സീസണ്‍ 1-പവിഴദ്വീപിലെ പാട്ടുമത്സരം 2024ല്‍ തൃശൂര്‍ സ്വദേശി എല്‍ദോ എഡിസണ്‍ വിജയിയായി.
അനില്‍കുമാര്‍ ടി. വി-കാസര്‍ഗോഡ് ഫസ്റ്റ് റണ്ണറപ്പായും, നിത്യാ റോഷിത്-കോഴിക്കോട് സെക്കന്‍റ് റണ്ണറപ്പായും തിരഞ്ഞെടുക്കപ്പെട്ടു. ഇന്ത്യന്‍ ക്ലബ്ബില്‍ തിങ്ങിനിറഞ്ഞ സദസ്സില്‍ 6 മണിക്കൂര്‍ നീണ്ടുനിന്ന ലൈവ് റിയാലിറ്റി പാട്ടു മത്സരം പവിഴദ്വീപിന് പുതിയൊരനുഭവമായി. ആദ്യ റൗണ്ട് മത്സരങ്ങള്‍ക്കായി ഓണ്‍ലൈന്‍ വീഡിയോ ഗാനങ്ങളായി ലഭിച്ച 55 എ ന്‍ട്രികളില്‍ 34 മത്സരാര്‍ത്ഥികളാണ് തിരഞ്ഞെടുക്കപ്പെട്ടത്. ആദ്യറൗണ്ടില്‍ നിന്നും 12 പേരാണ് ലൈവ് സിംഗിംഗ് മത്സരമായ ഫിനാലെയിലേക്കു തിരഞ്ഞെടുക്കപ്പെട്ടത്.
ഫിനാലെയില്‍ നിന്നും 6 പേരാണ് രണ്ടു റൗണ്ടുകളുള്ള ഗ്രാന്‍ഡ് ഫിനാലെയിലേക്ക് എത്തിയത്. ഗ്രാന്‍ഡ് ഫിനാലെയിലെത്തിയ 6 പാട്ടുകാരില്‍ മൂന്ന് പേര്‍ ബഹ്റൈന്‍ വേദികളില്‍ പുതു ശബ്ദങ്ങളാണ്. അതുതന്നെയാണ് ഈ മത്സരത്തിന്‍റെ കണ്ടെത്തലും. സമൂഹത്തിലെ വിവിധ തലങ്ങളിലുള്ള തൊഴിലാളികളും, വീട്ടമ്മമാരും, അധ്യാപകരും ചേര്‍ന്ന ഒരു വിഭാഗവും ബഹ്റൈനില്‍ അറിയപ്പെടുന്ന പാട്ടുകാര്‍ക്കൊപ്പം തുടക്കം തൊട്ടു ഗ്രാന്‍ഡ് ഫിനാലെ വരെ എത്തി എന്നതും ഈ മത്സരത്തെ വ്യത്യസ്തമാക്കുന്നു.
വിധികര്‍ത്താക്കളായി നാട്ടില്‍ നിന്നും എത്തിയത് പിന്നണി ഗായകരും, സംഗീതാദ്ധ്യാപകരുമായ അജയ് ഗോപാല്‍, റോഷ്നി സുരേഷ് എന്നിവരാണ്. മൂന്ന് റൗണ്ടുകള്‍ നിറഞ്ഞ സിസിബി ഐലന്‍ഡ് സിങ്ങര്‍ 2024 മത്സരത്തിന്‍റെ ഓരോ ഇടവേളയിലും ജഡ്ജസിന്‍റെ സിനിമാ ഗാനങ്ങള്‍ കോര്‍ത്തിണക്കിയുള്ള പുതുമയാര്‍ന്ന വ്യത്യസ്തമായ ഗാനാലാപനം ആസ്വാദകരുടെ മനസ്സ് കീഴടക്കി.
ഒന്നും രണ്ടും മൂന്നും സ്ഥാനക്കാര്‍ക്ക് പുറമെ ഗ്രാന്‍ഡ് ഫിനാലെയിലേക്ക് തിരഞ്ഞെടുക്കപ്പെട്ടത് അന്‍സാര്‍ പിവി, സുരമ്യ രാജ്, ശ്രീഷ്മ ജിലീബ് എന്നിവരാണ്. ആദ്യമായാണ് ബഹറിനില്‍ റിയാലിറ്റി ഷോ രീതിയില്‍ ഇത്തരത്തില്‍ ഒരു സംഗീതമത്സരം ജനകീയമായി സംഘടിപ്പിക്കുന്നത്. റഫീഖ് വടകരയുടെ നേതൃത്വത്തിലുള്ള മ്യൂസിക് സിറ്റി ബഹ്റൈന്‍ ആയിരുന്നു ഈ പരിപാടിക്ക് ഓര്‍ക്കസ്ട്ര ഒരുക്കിയത്.
മത്സരവിജയികള്‍ക്ക് പ്രൈസ് മണിയും ട്രോഫിയും സമ്മാനങ്ങളും മത്സരം വിലയിരുത്തിയ അജയ് ഗോപാലും റോഷ്നി സുരേഷും ചേര്‍ന്നു നല്‍കി. സംഗീത നിശ അവതരിപ്പിക്കുകയും വിധിനിര്‍ണയം നടത്തുകയും ചെയ്ത അജയ് ഗോപാലിനും റോഷ്നി സുരേഷിനും സംഘടനയുടെ ഉപഹാരങ്ങള്‍ യഥാക്രമം രക്ഷാധികാരി ജനാര്‍ദ്ദനന്‍ കെ, മുന്‍ പ്രസിഡന്‍റ് ബാബു ജി നായര്‍ എന്നിവര്‍ കൈമാറി. കാലിക്കറ്റ് കമ്മ്യൂണിറ്റി ബഹ്റൈന്‍-പവിഴദ്വീപിലെ കോഴിക്കോട്ടുകാര്‍ പ്രസിഡന്‍റ് ശിവകുമാര്‍ കൊല്ലറോത്ത് കൃതജ്ഞത രേഖപ്പെടുത്തി.
ജനറല്‍ സെക്രട്ടറി പ്രജി വി. കാലിക്കറ്റ് ആയിരുന്നു ഈ സംഗീത പരിപാടിയുടെ ഡയറക്ടര്‍. ഇന്ത്യന്‍ ക്ലബ് വൈസ് പ്രസിഡന്‍റ് ജോസഫ് ജോയ് മുഖ്യാതിഥി ആയിരുന്നു. എന്‍റര്‍ടൈന്‍മെന്‍റ് സെക്രട്ടറി ശ്രീജിത്ത് ഫറോക്ക്, ചിത്തിര സജിന്‍ എന്നിവര്‍ അവതാരകരായ പരിപാടിക്ക് ട്രഷറര്‍ മുസ്തഫ കുന്നുമ്മല്‍, കാലിക്കറ്റ് കമ്മ്യൂണിറ്റി ബഹ്റൈന്‍-പവിഴ ദ്വീപിലെ കോഴിക്കോട്ടുകാര്‍ എക്സിക്യൂട്ടീവ് കമ്മിറ്റി ഭാരവാഹികള്‍, അംഗങ്ങള്‍, വനിതാ വിഭാഗം എക്സിക്യൂട്ടീവ് അംഗങ്ങള്‍ തുടങ്ങിയവര്‍ നേതൃത്വം നല്‍കി.