മനാമ– ബഹ്റൈൻ കോഴിക്കോട് റൂട്ടിൽ അധിക സർവീസ് ഒരുക്കി എയർ ഇന്ത്യ എക്സ്പ്രസ്. ജൂലൈ 18 മുതൽ 2025 ആഗസ്റ്റ് 29 വരെ എല്ലാ വെള്ളിയാഴ്ചകളിൽ കോഴിക്കോട് ബഹ്റൈൻ റൂട്ടിലും തിരിച്ചും ആണ് എയർ ഇന്ത്യ അധിക സർവ്വീസ് ഒരുക്കിയിരിക്കുന്നത്. വ്യാഴാഴ്ച ഒഴികെ ആഴ്ചയിൽ ആറ് ദിവസങ്ങളിൽ ഒരു സർവീസ് മാത്രമായിരുന്നു എയർ ഇന്ത്യ നൽകി വന്നിരുന്നത്.
ബഹ്റൈനിൽ നിന്ന് രാത്രി 9:10 ന് പുറപ്പെടുന്ന വിമാനം ഇന്ത്യൻ സമയം 4:10 ന് കോഴിക്കോട് എത്തിചേരും തിരിച്ച് കോഴിക്കോട് നിന്ന് വൈകീട്ട് ആറിന് പുറപ്പെടുന്ന വിമാനം ബഹ്റൈൻ സമയം രാത്രി 8:10 ന് ബഹ്റൈനിൽ എത്തിചേരും.
ഡൽഹിയിൽ നിന്നും ബഹ്റൈനിലേക്ക് ഉള്ള സർവീസ് വെട്ടിചുരുക്കിയാണ് എയർ ഇന്ത്യ നിലവിൽ അധിക സർവീസ് കോഴിക്കോട്- ബഹറൈൻ റൂട്ടിൽ നൽകിയത്. അവധിക്കാലത്തെ തിരക്കുകൾക്ക് കൂടുതൽ ആശ്വാസമേകാൻ വെള്ളിയാഴ്ചകളിലെ അധിക സർവീസിന് കഴിയുമെന്നാണ് വിലയിരുത്തുന്നത്.