അബുദാബി. യുഎഇയിലെ അബുദാബി എമിറേറ്റിൽ മരിക്കുന്ന പ്രവാസികളുടെ മൃതദേഹം പൂർണ്ണമായും സൗജന്യമായി അവരവരുടെ നാടുകളിൽ എത്തിക്കുമെന്ന് അബുദാബി സർക്കാർ അറിയിച്ചു. മരണവുമായി ബന്ധപ്പെട്ട മുഴുവൻ ഫീസുകളും ഒഴിവാക്കും. മരണ സർട്ടിഫിക്കറ്റ് അനുവദിക്കൽ, എംബാമിംഗ്, മൃതദേഹം നാട്ടിലേക്ക് കൊണ്ടുപോകുന്നതിനുള്ള ചെലവ് എല്ലാം സൗജന്യമാക്കും.
മരണവുമായി ബന്ധപ്പെട്ട നടപടിക്രമങ്ങളും ലളിതമാക്കി. എമിറേറ്റിലെ എല്ലാ താമസക്കാരെയും ഉൾപ്പെടുത്തുന്നതിനായി സനാദ്കോം സംരംഭം വിപുലീകരിച്ചു. നേരത്തെ യു.എ.ഇ പൗരന്മാർക്ക് മാത്രമായിരുന്നു. ഈ സേവനം ലഭ്യമായിരുന്നത്. മരണപ്പെടുന്ന ആളുകളുടെ കുടുംബങ്ങൾക്ക് ആവശ്യമായ എല്ലാ സഹായങ്ങളും സനാദ്കോം നൽകും. ഇത്തരം സന്ദർഭങ്ങളിൽ ചെലവ് ഓർത്ത് പ്രവാസികൾ വിഷമിക്കേണ്ടതില്ലെന്ന് എമിറേറ്റ് അധികൃതർ അറിയിച്ചു. മരണപ്പെട്ടയാളുടെ കുടുംബത്തിനുള്ള നടപടിക്രമങ്ങൾ ലളിതമാക്കാനും സുഗമമാക്കാനുമാണ് സനാദ്കോം ലക്ഷ്യമിടുന്നത്.
മരണം നടന്നു കഴിഞ്ഞാൽ സനാദ്കോം ടീമിലെ ഒരംഗം ബന്ധുക്കളെ സന്ദർശിച്ച് ആവശ്യമായ സഹായങ്ങളെല്ലാം നൽകും. ഇതിനായി പ്രവാസികൾ ഏതെങ്കിലും സർക്കാർ ഓഫീസുകൾ സന്ദർശിക്കേണ്ടതില്ല. അബുദാബി ഹെൽത്ത് കെയർ ഫെസിലിറ്റിയിൽ നേരിട്ട് നടപടിക്രമങ്ങൾ പൂർത്തിയാക്കാൻ അവർക്ക് സാധിക്കും.