പ്രീമിയർ ലീഗ്; പാലസിനെ തകർത്ത് സിറ്റി, കിരീടപ്പോരാട്ടം ഉജ്ജ്വലം​

മാഞ്ചസ്റ്റർ: പ്രീമിയർ ലീഗിലെ ആവേശകരമായ കിരീടപ്പോരാട്ടത്തിൽ കരുത്തറിയിച്ച് മാഞ്ചസ്റ്റർ സിറ്റി. ഏകപക്ഷീയമായ മൂന്ന് ഗോളുകൾക്ക് ക്രിസ്റ്റൽ പാലസിനെ പരാജയപ്പെടുത്തി പെപ് ഗ്വാർഡിയോളയുടെ സംഘം കിരീട പ്രതീക്ഷകൾ സജീവമാക്കി. മികച്ച ഫോമിലുള്ള സെമെനിയോ, മാർമൗഷ്, സാവിഞ്ഞോ എന്നിവരുടെ ഗോളുകളാണ് സിറ്റിക്ക് അനായാസ വിജയം സമ്മാനിച്ചത്.
​
മത്സരത്തിന്റെ 32-ാം മിനിറ്റിൽ സെമെനിയോയിലൂടെയാണ് സിറ്റി ആദ്യ ഗോൾ കണ്ടെത്തിയത്. എട്ട് മിനിറ്റുകൾക്ക് ശേഷം മാർമൗഷ് ലീഡ് രണ്ടാക്കി ഉയർത്തി. രണ്ടാം പകുതിയിൽ പൊരുതിക്കയറിയ പാലസിന് സിറ്റിയുടെ പ്രതിരോധം ഭേദിക്കാനായില്ല. മത്സരത്തിന്റെ 84-ാം മിനിറ്റിൽ സാവിഞ്ഞോ മൂന്നാം ഗോൾ കൂടി നേടിയതോടെ സിറ്റിയുടെ വിജയം പൂർത്തിയായി. ഫിൽ ഫോഡന്റെ മികച്ച പ്രകടനവും മത്സരത്തിൽ ശ്രദ്ധേയമായി.
​
ഈ വിജയത്തോടെ 36 മത്സരങ്ങളിൽ നിന്ന് 77 പോയിന്റായ മാഞ്ചസ്റ്റർ സിറ്റി ആഴ്സണലിന് തൊട്ടുപിന്നിലുണ്ട്. ലീഗിൽ രണ്ടു മത്സരങ്ങൾ ബാക്കിനിൽക്കെ പട്ടികയിൽ ഒന്നാമത് എത്താൻ ആഴ്സണലിന് മേൽ സിറ്റി വലിയ സമ്മർദ്ദമാണ് ചെലുത്തുന്നത്. നിലവിൽ 79 പോയിന്റുള്ള ആഴ്സണലും സിറ്റിയും തമ്മിലുള്ള കിരീടപ്പോരാട്ടം ലീഗിലെ അവസാന മത്സരങ്ങളിൽ നിർണ്ണായകമാകും. മാഞ്ചസ്റ്റർ യുണൈറ്റഡ് 65 പോയിന്റോടെ മൂന്നാം സ്ഥാനത്തും ലിവർപൂൾ 59 പോയിന്റോടെ നാലാം സ്ഥാനത്തുമാണ്.