മിയാമി: ലോകകപ്പ് സെമിഫൈനലിൽ ഇന്ന് നടക്കുന്ന ഇംഗ്ലണ്ട് – അർജന്റീന പോരാട്ടത്തിന് മുന്നോടിയായി റഫറി ഇസ്മായിൽ എൽഫാത്തിനെതിരെ ഉയർന്ന ആരോപണങ്ങൾ അടിസ്ഥാനരഹിതം. എൽഫാത്ത് നിയന്ത്രിച്ച മത്സരങ്ങളിൽ ലയണൽ മെസ്സിയുടെ ടീമുകൾക്ക് നൂറ് ശതമാനം വിജയ റെക്കോർഡ് ഉണ്ടെന്നത് ചൂണ്ടിക്കാട്ടി ഇംഗ്ലീഷ് ആരാധകർ സോഷ്യൽ മീഡിയയിൽ ആശങ്ക പ്രകടിപ്പിച്ചിരുന്നു. എന്നാൽ, ഒരു മത്സരത്തിൽ പോലും മെസ്സിക്കോ അദ്ദേഹത്തിന്റെ ടീമിനോ അനുകൂലമായി എൽഫാത്ത് വഴിവിട്ട തീരുമാനങ്ങൾ എടുത്തിട്ടില്ല എന്നതാണ് യാഥാർത്ഥ്യം.
ലയണൽ മെസ്സി കളിച്ച അഞ്ച് മത്സരങ്ങളിൽ ഇസ്മായിൽ എൽഫാത്ത് റഫറിയോ നാലാം ഒഫീഷ്യലോ ആയിട്ടുണ്ടെന്നത് ഒരു വസ്തുതയാണ്. ഈ മത്സരങ്ങളിലെല്ലാം മെസ്സിയുടെ ടീം വിജയിക്കുകയും ചെയ്തു. എന്നാൽ ഇതിനെയൊരു ‘റഫറി അനുകൂല്യം’ എന്ന് വിളിക്കാൻ കഴിയില്ല. കളിക്കളത്തിലെ മികച്ച പ്രകടനം കൊണ്ടാണ് മെസ്സിയുടെ ടീമുകൾ ഈ വിജയങ്ങൾ സ്വന്തമാക്കിയത്.
മെസ്സിയും എൽഫാത്തും: യഥാർത്ഥ കണക്കുകൾ ഇങ്ങനെ
2022 ലോകകപ്പ് ഫൈനൽ: അർജന്റീനയും ഫ്രാൻസും തമ്മിലുള്ള ഇതിഹാസ സമാനമായ ഫൈനലിൽ എൽഫാത്ത് വെറും നാലാം ഒഫീഷ്യൽ മാത്രമായിരുന്നു. മത്സരത്തിലെ തീരുമാനങ്ങൾ എടുക്കുന്നതിൽ അദ്ദേഹത്തിന് നേരിട്ട് പങ്കുണ്ടായിരുന്നില്ല. ഒടുവിൽ പെനാൽറ്റി ഷൂട്ടൗട്ടിലാണ് അർജന്റീന കിരീടം ചൂടിയത്.
ലീഗ്സ് കപ്പ് ഫൈനൽ (2023): ഇന്റർ മയാമിയും നാഷ്വില്ലും തമ്മിലുള്ള ഫൈനൽ നിയന്ത്രിച്ചത് എൽഫാത്ത് ആയിരുന്നു. ഈ മത്സരത്തിലും കളി നിയമാനുസൃതമായി മുന്നോട്ടു കൊണ്ടുപോകാനാണ് അദ്ദേഹം ശ്രദ്ധിച്ചത്. ഒടുവിൽ കടുത്ത പോരാട്ടത്തിനൊടുവിൽ 10-9 എന്ന പെനാൽറ്റി ഷൂട്ടൗട്ട് സ്കോറിലാണ് മയാമി വിജയിച്ചത്.
മറ്റ് എം.എൽ.എസ് മത്സരങ്ങൾ: ഇന്റർ മയാമിയുടെ മറ്റ് നാല് വിജയങ്ങളിലും റഫറിയെന്ന നിലയിൽ എൽഫാത്തിന്റെ തീരുമാനങ്ങൾ തികച്ചും നിഷ്പക്ഷമായിരുന്നു.
വിവാദ തീരുമാനങ്ങളിലൂടെ മെസ്സിയുടെ ടീമിനെ ജയിപ്പിച്ചു എന്ന തരത്തിലുള്ള ഒരു തെളിവും എൽഫാത്തിന്റെ മുൻകാല കരിയറിലില്ല. രണ്ട് തവണ അമേരിക്കയിലെ മികച്ച റഫറിയായി (MLS Referee of the Year) തിരഞ്ഞെടുക്കപ്പെട്ട എൽഫാത്ത്, കരിയറിലുടനീളം കണിശതയുള്ള തീരുമാനങ്ങളിലൂടെയാണ് ശ്രദ്ധിക്കപ്പെട്ടിട്ടുള്ളത്.
ഖത്തർ ലോകകപ്പിൽ പോർച്ചുഗലിന്റെ ക്രിസ്റ്റ്യാനോ റൊണാൾഡോയുടെ ഗോൾ ഫൗൾ വിളിച്ചു റദ്ദാക്കാനും, ബ്രസീലിനെതിരെ ഗോൾ നേടിയ ശേഷം ജേഴ്സി ഊരി ആഘോഷിച്ച കാമറൂൺ താരം വിൻസെന്റ് അബൂബക്കറിന് ചുവപ്പ് കാർഡ് നൽകാനും മടിക്കാത്ത റഫറിയാണ് അദ്ദേഹം. നിയമങ്ങൾ വിട്ടുവീഴ്ചയില്ലാതെ നടപ്പാക്കുന്ന എൽഫാത്തിന്റെ നിഷ്പക്ഷത വ്യക്തമാക്കുന്നതാണ് ഈ ഉദാഹരണങ്ങൾ.