കിങ്സ്റ്റൺ– ഫിഫ ലോകകപ്പിന് യോഗ്യത നേടുന്ന ഏറ്റവും ചെറിയ രാജ്യമെന്ന അപൂർവ റെക്കോർഡ് സ്വന്തമാക്കി കരീബിയൻ ദ്വീപ് രാജ്യമായ ക്യുറസാവോ. വെറും 1.56 ലക്ഷം ജനസംഖ്യയും 444 ചതുരശ്ര കിലോമീറ്റർ മാത്രം ഭൂവിസ്തൃതിയുമുള്ള ഈ ചെറുരാജ്യം, കോൺകകാഫ് യോഗ്യതാ റൗണ്ടിൽ ജമൈക്കയുമായി ഗോൾരഹിത സമനില നേടിയതോടെ 2026 ലോകകപ്പിനുള്ള ടിക്കറ്റ് ഉറപ്പിച്ചു.
ഗ്രൂപ്പ് ബിയിൽ ആറ് മത്സരങ്ങളിൽ നിന്ന് 12 പോയിന്റുമായി തോൽവി അറിയാതെ ഒന്നാമതെത്തിയാണ് ക്യുറസാവോയുടെ ഈ നേട്ടം. ബെർമുഡയെ എതിരില്ലാത്ത 7 ഗോളിന് തകർത്ത ഉൾപ്പെടെയുള്ള പ്രകടനങ്ങൾ ലോകശ്രദ്ധ പിടിച്ചുപറ്റി. ഹെയ്ത്തി, പാനമ എന്നിവയ്‌ക്കൊപ്പം കോൺകകാഫിൽ നിന്ന് നേരിട്ട് യോഗ്യത നേടിയ മൂന്നാമത്തെ ടീമായി ക്യുറസാവോ മാറി. 2026ലെ 48 ടീമുകളുള്ള ലോകകപ്പിന് യു.എസ്, കാനഡ, മെക്സിക്കോ എന്നിവയാണ് സംയുക്ത ആതിഥേയർ.
2018ൽ ലോകകപ്പ് കളിച്ച 3.5 ലക്ഷം ജനസംഖ്യ മാത്രമുള്ള ഐസ്‌ലൻഡിന്റെ റെക്കോർഡാണ് ക്യുറസാവോ മറികടന്നത്. 78 വയസ്സുള്ള ഡച്ച് ഇതിഹാസ പരിശീലകൻ ഡിക്ക് അഡ്വക്കേറ്റിന്റെ കീഴിലാണ് ഈ അത്ഭുതം സംഭവിച്ചത്. 2026ൽ അദ്ദേഹം ലോകകപ്പിലെ ഏറ്റവും പ്രായം കൂടിയ പരിശീലകനെന്ന ചരിത്ര റെക്കോർഡും സ്വന്തമാക്കും.
കഴിഞ്ഞ വർഷം ജനുവരിയിൽ മാത്രം ക്യുറസാവോയുടെ പരിശീലക ചുമതല ഏറ്റെടുത്ത അഡ്വക്കേറ്റ്, നെതർലൻഡ്സ് താരമായിരുന്നു. ദേശീയ ടീമിലെ മുഴുവൻ അംഗങ്ങളും നെതർലൻഡുകാരാണെന്നത് മറ്റൊരു രസകരമായ വസ്തു‌തയാണ്.. നെതർലൻഡ്സിന്റെ ഓറഞ്ച് ജഴ്സി ഉപേക്ഷിച്ച് ക്യുറസാവോയുടെ നീല കുപ്പായം അണിഞ്ഞാണ് ഇവർ പോരാട്ട ഭൂമിയിലേക്ക് കടന്നു വരുന്നത്.
2010ൽ മാത്രം ഫിഫ അംഗത്വം ലഭിച്ച ക്യുറസാവോയ്ക്ക് ഇത് ആദ്യ ലോകകപ്പാണ്. കരീബിയൻ ഫുട്ബോളിന്റെ ചരിത്രത്തിൽ സുവർണ ലിപികളിൽ എഴുതപ്പെടുന്ന നാഴികക്കല്ലായി മാറുകയാണ് ഈ കൊച്ചു രാജ്യവും ജനതയും.