ജിദ്ദ – മറ്റുള്ള മാധ്യമങ്ങളിൽനിന്നും കൃതികളിൽനിന്നും അവരുടെ അനുമതിയില്ലാതെ ഉള്ളടക്കം മോഷ്ടിച്ച് സ്വന്തം പ്ലാറ്റ്ഫോമുകളിൽ ഉപയോഗിക്കുന്നവർ ശ്രദ്ധിക്കുക, വൻ തുകയുടെ പിഴയാണ് നിങ്ങളെ കാത്തിരിക്കുന്നത്. ഇത്തരത്തിലുള്ള ഒരു കേസിൽ സൗദി അതോറിറ്റി ഫോര്‍ ഇന്റലക്ച്വല്‍ പ്രോപ്പര്‍ട്ടി 12,000 റിയാലാണ് പിഴ ചുമത്തിയത്. ഓണ്‍ലൈനിൽ വന്നാൽ അത് എല്ലാവര്‍ക്കും ഉപയോഗിക്കാവുന്നതായി തെറ്റിദ്ധരിച്ചാണ് ഉടമയുടെ അനുമതിയോ ലൈസന്‍സോ നേടാതെ സ്വകാര്യ കമ്പനി ഓണ്‍ലൈൻ പ്രസിദ്ധീകരണങ്ങള്‍ക്കായി ഇക്കാര്യം ഉപയോഗിക്കുകയായിരുന്നു. ഇതിനെതിരെ ഉടമ പരാതി നല്‍കുകയും ചെയ്തു.
പകര്‍പ്പവകാശ നിയമ ലംഘനങ്ങള്‍ പരിശോധിക്കുന്ന പ്രത്യേക കമ്മിറ്റി, കമ്പനി നിയമം ലംഘിച്ചതായി കണ്ടെത്തി. കമ്പനിക്ക് 12,000 റിയാല്‍ പിഴ ചുമത്തിയ കമ്മിറ്റി നിയമം ലംഘിച്ച് ഉപയോഗിച്ച ഉള്ളടക്കം നീക്കം ചെയ്യാനും വിധിച്ചു. ഓണ്‍ലൈനില്‍ വരുന്നതെല്ലാം ആർക്കും എടുത്ത് പ്രസിദ്ധീകരിക്കാമെന്നത് തെറ്റായ ധാരണയാണെന്നും ഏതെങ്കിലും ഉള്ളടക്കം പ്രസിദ്ധീകരിക്കുന്നതിനോ ഭേദഗതികള്‍ വരുത്തുന്നതിനോ മുമ്പ് അനുമതിയോ ലൈസന്‍സോ ഉണ്ടെന്ന് ഉറപ്പുവരുത്തണമെന്നും അധികൃതർ പറഞ്ഞു. ബൗദ്ധിക സ്വത്തവകാശവും സര്‍ഗാത്മകതയും യഥാർത്ഥ സ്രഷ്ടാക്കളുടെ പരിശ്രമങ്ങളെ സംരക്ഷിക്കാനുമാണ് ഇത്തരം നടപടികൾ സ്വീകരിക്കുന്നതെന്നും സൗദി അതോറിറ്റി ഫോര്‍ ഇന്റലക്ച്വല്‍ പ്രോപ്പര്‍ട്ടി പറഞ്ഞു.