കാലിഫോര്ണിയ-ഏറ്റവും സന്തോഷം പകരുന്ന അമേരിക്കന് ഐക്യനാടുകളിലെ നഗരങ്ങളുടെ പട്ടികയില് കാലിഫോര്ണിയയിലെ ഫ്രീമോണ്ട് വീണ്ടും ഇടംപിടിച്ചു. സാമ്പത്തിക വിശകലനം നടത്തുന്ന സ്ഥാപനമായ വാലറ്റ് ഹബ്ബിന്റെ 2025-ലെ ഏറ്റവും പുതിയ റാങ്കിങ്ങിലാണ് ഫ്രീമോണ്ട് ഒന്നാമതായത്.
ഇന്ത്യന് വംശജനായ രാജ് സല്വാന് ആണ് ഈ നഗരത്തിന്റെ മേയര് എന്ന പ്രത്യേകത കൂടിയുണ്ട്. തുടര്ച്ചയായ ആറാം വര്ഷമാണ് ഫ്രീമോണ്ട് ഈ പദവിയിലെത്തുന്നത്. 2020 മുതല് ഒന്നാം സ്ഥാനത്താണ്. 75,000 ഡോളറിന് മുകളില് വാര്ഷിക വരുമാനമുള്ള കുടുംബാംഗങ്ങളുടെ ഉയര്ന്ന അനുപാതം, മികച്ച ആരോഗ്യം, കുറഞ്ഞ വിവാഹമോചന നിരക്ക്, ഉയര്ന്ന ജീവിതസാഹചര്യം, മികച്ച വരുമാന സാധ്യത, തൊഴില് സുരക്ഷിതത്വം, ഊഷ്മളമായ സാമൂഹിക അന്തരീക്ഷം, വിഷാദ രോഗത്തില് നിരക്ക് വളരെ കുറവ് തുടങ്ങിയവയാണ് ഫ്രീമോണ്ടിന്റെ ഹാപ്പി ഇന്ഡക്സില് ആദ്യമെത്തിച്ചത്.
സാമൂഹിക, സാമ്പത്തിക സാഹചര്യങ്ങളും ജീവിത നിലവാരവും കുറഞ്ഞ ജീവിത ചെലവുമെല്ലാം അടിസ്ഥാനമാക്കിയാണ് വാലറ്റ് ഹബ്ബ് റാങ്കിംഗുകള് തീരുമാനിക്കുന്നത്. കുടുംബമായി താമസിക്കാന് അനുയോജ്യമായ അമേരിക്കയിലെ മികച്ച നഗരം നഗരമെന്ന പദവിയും നാല് വര്ഷമായി ഫ്രീമോണ്ട് നിലനിര്ത്തുന്നു. 2024- ഡിസംബറിലാണ് ഈ നഗരത്തില് പ്രഥമ ഇന്ത്യന് അമേരിക്കന് മേയറായി രാജ് സല്വാന് ചുമതലയേറ്റത്. ഇന്ത്യയില് ജനിച്ച് ഫ്രീമോണ്ടില് വളര്ന്ന അദ്ദേഹം നഗര വികസനത്തിന്റെ മുന്നേറ്റങ്ങള്ക്ക് നേതൃത്വം നല്കിവരുന്നതിനിടെയാണ് ഇത്തരമൊരു അംഗീകാരം കൂടി തേടിയെത്തിയത്.