റിയാദും ഖമീസ് മുഷൈത്തും ലക്ഷ്യമിട്ടുള്ള ഹൂത്തികളുടെ ഡ്രോണുകളും ബാലിസ്റ്റിക് മിസൈലുകളും തകർത്ത് സൗദി

റിയാദ്- യമനിലെ ഇറാൻ പിന്തുണയുള്ള ഹൂത്തി വിമതർ സൗദി അറേബ്യ ലക്ഷ്യമാക്കി തൊടുത്ത ഡ്രോണുകളും ബാലിസ്റ്റിക് മിസൈലുകളും സൗദി വ്യോമ പ്രതിരോധം തകർത്തു. റിയാദ് ലക്ഷ്യമാക്കി തൊടുത്ത രണ്ട് ഡ്രോണുകളും വിജയകരമായി തകർത്തതായി സഖ്യസേനാ വക്താവ് കേണൽ തുർക്കി അൽ മാലിക്കി പുലർച്ചെ നാല് മണിയോടെ അറിയിച്ചു. 30 മിനിറ്റിന് ശേഷം ഖമീസ് മുഷൈത്തിന് നേരെ വിക്ഷേപിച്ച ബാലിസ്റ്റിക് മിസൈൽ വ്യോമപ്രതിരോധ സംവിധാനം തടയുകയും നശിപ്പിക്കുകയും ചെയ്തു.

20 മിനിറ്റിന് ശേഷം തെക്കുപടിഞ്ഞാറൻ നഗരം ലക്ഷ്യമാക്കി തൊടുത്ത മറ്റൊരു ബാലിസ്റ്റിക് മിസൈലും പ്രതിരോധിച്ചതായി തുർക്കി അൽ മാലിക്കി വ്യക്തമാക്കി. തെക്കുപടിഞ്ഞാറൻ അസീർ മേഖലയിലെ ഖമീസ് മുഷൈത്ത്, അബഹ എന്നിവിടങ്ങളിൽ രാത്രിയിൽ സൗദി സിവിൽ ഡിഫൻസ് അപായ മുന്നറിയിപ്പുകൾ നൽകിയിരുന്നു.