വാഷിംഗ്ടൺ: ഇറാനുമായി ഒപ്പുവെച്ച പുതിയ ധാരണാപത്രം അടിസ്ഥാനപരമായി ഇറാന്റെ നിരുപാധികമായ കീഴടങ്ങലാണെന്ന് യു.എസ് പ്രസിഡന്റ് ഡൊണാൾഡ് ട്രംപ് അവകാശപ്പെട്ടു. ദി ആക്സിയോസ് ഷോയ്ക്ക് നൽകിയ അഭിമുഖത്തിലാണ് ട്രംപ് ഈ പ്രസ്താവന നടത്തിയത്. ഇരുരാജ്യങ്ങളും തമ്മിലുള്ള സൈനിക സംഘർഷം അവസാനിപ്പിക്കുകയും വിശാലമായ ചർച്ചകൾക്ക് വഴിയൊരുക്കുകയും ചെയ്ത ഈ ധാരണയെ അമേരിക്കയുടെ വലിയ വിജയമായി കാണണമെന്നും അദ്ദേഹം കൂട്ടിച്ചേർത്തു. യുദ്ധത്തിന് മുൻപ് അംഗീകരിക്കാൻ തയ്യാറാകാതിരുന്ന കടുത്ത നിബന്ധനകൾ ഇപ്പോൾ ഇറാൻ അംഗീകരിച്ചിട്ടുണ്ടെന്നാണ് ട്രംപിന്റെ വാദം.
അമേരിക്ക ഇറാന് അനാവശ്യ ഇളവുകൾ നൽകിയെന്ന് ആരോപിച്ച് റിപ്പബ്ലിക്കൻ, ഡെമോക്രാറ്റിക് പാർട്ടിയിലെ ചില അംഗങ്ങൾ കരാറിനെതിരെ രംഗത്തുവന്ന സാഹചര്യത്തിലാണ് ട്രംപ് ഇതിനെ പ്രതിരോധിച്ച് സംസാരിച്ചത്. പ്രതിസന്ധി ഘട്ടത്തിൽ ആഗോള ഊർജ്ജ വിപണിയെ ബാധിക്കുന്ന തരത്തിൽ ഹോർമുസ് കടലിടുക്ക് അടച്ചുപൂട്ടാനുള്ള സാധ്യതകളെക്കുറിച്ച് ട്രംപ് ഭരണകൂടം ആശങ്കാകുലരായിരുന്നു. അതിനാൽ എണ്ണ വിതരണത്തിന്റെ സ്ഥിരത ഉറപ്പാക്കുന്നതിനായിരുന്നു യു.എസ് മുൻഗണന നൽകിയത്.
ഇറാൻ ആണവായുധങ്ങൾ സ്വന്തമാക്കുന്നത് തടയുക, ഹോർമുസ് കടലിടുക്ക് വീണ്ടും തുറക്കുക തുടങ്ങിയ സുപ്രധാന ലക്ഷ്യങ്ങൾ കൈവരിക്കാൻ ഈ കരാറിലൂടെ സാധിച്ചുവെന്ന് യു.എസ് ഭരണകൂടം അവകാശപ്പെടുന്നു. എന്നാൽ, ഈ ധാരണയ്ക്ക് ഇരുരാജ്യങ്ങളും തമ്മിലുള്ള അടിസ്ഥാന പ്രശ്നങ്ങൾ പരിഹരിക്കാൻ കഴിയില്ലെന്ന വിമർശനവും ശക്തമാണ്.