വാഷിംഗ്ടണ് – ഇറാനിലുള്ള യുറേനിയം ശേഖരം വീണ്ടെടുക്കല് ദീര്ഘവും പ്രയാസകരവുമായ പ്രക്രിയയായിരിക്കുമെന്ന് യു.എസ് പ്രസിഡന്റ് ഡൊണാള്ഡ് ട്രംപ്. കഴിഞ്ഞ ജൂണില് ഇറാന് ആണവ കേന്ദ്രങ്ങളില് യു.എസ് നടത്തിയ ആക്രമണത്തില് യുറേനിയം ശേഖരം കുഴിച്ചുമൂടപ്പെടുകയായിരുന്നു. ഓപ്പറേഷന് മിഡ്നൈറ്റ് ഹാമര് ഇറാന്റെ ആണവ കേന്ദ്രങ്ങള് പൂര്ണ്ണമായും തകര്ത്തു. അതിനാല് യുറേനിയം ശേഖരം വേര്തിരിച്ചെടുക്കല് ദീര്ഘവും ബുദ്ധിമുട്ടുള്ളതുമായ പ്രക്രിയയായിരിക്കുമെന്ന് ട്രംപ് പറഞ്ഞു. ആണവ ബോംബ് വികസിപ്പിക്കാനായി ഇറാന് ശേഖരിച്ചുവെച്ചതായി അമേരിക്ക ആരോപിക്കുന്ന ഇറാന്റെ സമ്പുഷ്ടീകരിച്ച യുറേനിയം ശേഖരത്തെ പരാമര്ശിക്കാന് ട്രംപ് പതിവായി ആണവ പൊടി എന്ന പദം ഉപയോഗിക്കുന്നു. ഇറാന്റെ പക്കലുള്ള സമ്പുഷ്ടീകരിച്ച യുറേനിയം ശേഖരം ഒടുവില് അമേരിക്കക്ക് കൈമാറുമെന്നാണ് യു.എസ് പ്രസിഡന്റിന്റെ വാദം. എന്നാല് അത്തരം പദ്ധതികളൊന്നുമില്ലെന്ന് ഇറാന് വിദേശ മന്ത്രാലയം വ്യക്തമാക്കി.
അമേരിക്കയും ഇറാനും തമ്മിലുള്ള വെടിനിര്ത്തല് ബുധനാഴ്ച അവസാനിക്കുമെന്ന് ട്രംപ് പറഞ്ഞു. ഒരു കരാറിലും എത്തിയില്ലെങ്കില്, ഇറാന്റെ ഊര്ജ മേഖലയും സിവിലിയന് അടിസ്ഥാന സൗകര്യങ്ങളും ആക്രമിക്കാന് ഉത്തരവിടുമെന്ന് അദ്ദേഹം അറിയിച്ചു. വെടിനിര്ത്തല് അവസാനിക്കുന്നതിന് മുമ്പ് രണ്ടാം ഘട്ട ചര്ച്ചകള് നടക്കുമോ എന്ന് വ്യക്തമല്ല.