കാലിഫോർണിയ: ഇന്ത്യയുടെ അഭിമാനകരമായ ബഹിരാകാശ ഗവേഷണ സംരംഭങ്ങൾക്ക് സംഭാവന നൽകിയ മുൻ ഐഎസ്ആർഒ ശാസ്ത്രജ്ഞൻ ഡോ. അബ്ദുസ്സലാം മുഹമ്മദ് കാലിഫോർണിയയിലെ സണ്ണിവെയ്ൽ ടൗൺ മേയറും മലയാളിയുമായ സജി ജോർജുമായി കൂടിക്കാഴ്ച നടത്തി. മെയ് 30 ശനിയാഴ്ച സണ്ണിവെയ്ൽ ഹോപ്പ് കോഫി ഹൗസിൽ എത്തിച്ചേർന്ന മേയറെ ഡോ അബ്ദുൾ സലാം പൂച്ചെണ്ട് നൽകി ആദരിച്ചു.
മേയറുടെ ദീർഘവീക്ഷണമുള്ള നേതൃത്വത്തിനു കീഴിൽ സണ്ണിവെയ്ൽ നഗരത്തിന്റെ ഭരണ മാതൃകയെ മർകസ് നോളജ് സിറ്റിയുടെ സിഇഒ കൂടിയായ ഡോ. അബ്ദുസ്സലാം മുഹമ്മദ് പ്രശംസിച്ചു. സുതാര്യവും സമഗ്രവും ഭാവിയെക്കരുതി ഉള്ളതുമാണ് നഗരത്തിന്റെ ഭരണം എന്ന് അദ്ദേഹം പറഞ്ഞു.
സുസ്ഥിര നഗര-ഗ്രാമ പരിവർത്തനത്തിൽ ആഗോള വിദഗ്ധനായ ഡോ. അബ്ദുസ്സലാം മുഹമ്മദ് യുഎസ് സന്ദർശനത്തിന്റെ ഭാഗമായി, സണ്ണിവെയ്ൽ സിറ്റിയുടെ ഭരണ സമീപനത്തെക്കുറിച്ച് കൂടുതലറിയാനും അതിർത്തി കടന്നുള്ള വിജ്ഞാന വിനിമയത്തിനുള്ള സാധ്യതകൾ പര്യവേക്ഷണം ചെയ്യാനുമാണ് എത്തിയത്. ഇന്ത്യയിലും മിഡിൽ ഈസ്റ്റിലുമുള്ള ഡോ. സലാമിന്റെ പ്രവർത്തനങ്ങൾ സണ്ണിവെയ്‌ലിന്റെ മൂല്യങ്ങളുമായി – പ്രത്യേകിച്ച് സ്മാർട്ട് ഇൻഫ്രാസ്ട്രക്ചർ, പൗര ഇടപെടൽ, സുസ്ഥിര വളർച്ച തുടങ്ങിയ മേഖലകളിൽ – അടുത്തുനിൽക്കുന്നതായി മേയർ സജി ജോർജ് അഭിപ്രായപ്പെട്ടു.
സുസ്ഥിര വികസനം, സ്മാർട്ട് സിറ്റി പരിവർത്തനം, തന്ത്രപരമായ കൺസൾട്ടിംഗ് എന്നിവയിൽ ആഗോളതലത്തിൽ അംഗീകരിക്കപ്പെട്ട വ്യക്തിയാണ് ഡോ. അബ്ദുസ്സലാം മുഹമ്മദ്. ഇന്ത്യയിലും മിഡിൽ ഈസ്റ്റിലും 30 വർഷത്തിലേറെ പരിചയമുള്ള ഡോ. സലാം സർക്കാർ, റിയൽ എസ്റ്റേറ്റ്, വിദ്യാഭ്യാസം, സാങ്കേതികവിദ്യ എന്നിവയിൽ ദീർഘവീക്ഷണമുള്ള പദ്ധതികൾക്ക് നേതൃത്വം നൽകുന്നുവെന്നത്
അഭിനന്ദനാർഹമാണെന്നും മേയർ കൂട്ടിച്ചേർത്തു.
സൗരോർജ്ജം, മഴവെള്ള സംഭരണം, പരിസ്ഥിതി ഗതാഗതം എന്നിവ ഉൾക്കൊള്ളുന്ന കേരളത്തിൽ ഒരു യുഎൻ എസ്ഡിജി-അലൈൻഡ് ഹരിത നഗരത്തിന്റെ വികസനത്തിന് നേതൃത്വവും മക്ക, മദീന എന്നിവയുൾപ്പെടെ സൗദി അറേബ്യ, യുഎഇ, ഖത്തർ, അബുദാബി എന്നിവിടങ്ങളിലെ നാഴികക്കല്ലായ വികസന പദ്ധതികൾക്കും സ്ട്രാറ്റജിക് കൺസൾട്ടന്റ് മാർഗ്ഗനിർദ്ദേശം നൽകുന്നതായും ഡോ. അബ്ദുസ്സലാം പറഞ്ഞു. രണ്ടു മണിക്കൂർ നീണ്ടു നിന്ന കൂടിക്കാഴ്ചയിൽ അമേരിക്കൻ റെഡ്‌ക്രോസ് വോളിൻറിയർ സഹീർ മുഹമ്മദ് പടിഞ്ഞാറയിൽ, മാധ്യമ പ്രവർത്തകൻ പി പി ചെറിയാൻ എന്നിവർ പങ്കെടുത്തു.