ജിദ്ദ: പ്രാദേശിക, ആഗോള വാഹന വിപണിയിൽ വിപ്ലവം സൃഷ്ടിക്കാൻ ഒരുങ്ങി സൗദി അറേബ്യയുടെ ആദ്യ തദ്ദേശീയ ഇലക്ട്രിക് വാഹന നിർമ്മാതാക്കളായ ‘സീർ’ (Ceer). ‘മെയ്ഡ് ഇൻ സൗദി അറേബ്യ’ ലേബലിൽ പുറത്തിറങ്ങുന്ന സീറിന്റെ ആദ്യ മോഡലായ ‘എക്സോബോട്ട്’ (Exobot) ഇലക്ട്രിക് സെഡാന്റെയും എസ്.യു.വിയുടെയും അതിശയിപ്പിക്കുന്ന ഫീച്ചറുകൾ നാഷണൽ ഓട്ടോമോട്ടീവ് കമ്പനി പുറത്തുവിട്ടു.
അമ്പരപ്പിക്കുന്ന പ്രകടനവും സവിശേഷതകളും
റോഡിൽ മികച്ച പ്രകടനം കാഴ്ചവെക്കുന്ന എക്സോബോട്ടിന്റെ തുടക്ക പതിപ്പ് ലിമിറ്റഡ് എഡിഷനായാണ് പുറത്തിറങ്ങുന്നത്. ചാര, വെള്ള നിറങ്ങളിൽ ലഭ്യമാകുന്ന വാഹനത്തിന് ബ്ലാക്ക് പാക്കേജ്, ചുവന്ന ബ്രേക്ക് കാലിപ്പറുകൾ, പെർഫോമൻസ് റിമ്മുകൾ, നാപ്പ ലെതറിൽ തീർത്ത ചുവപ്പും കറുപ്പും ഇന്റീരിയർ എന്നിവ ലഭിക്കും.
- സെഡാൻ മോഡൽ: 850 കുതിരശക്തിയും (HP) ഒറ്റ ചാർജിൽ 670 കിലോമീറ്റർ റേഞ്ചും നൽകുന്നു. പൂജ്യത്തിൽ നിന്ന് 100 കിലോമീറ്റർ വേഗത കൈവരിക്കാൻ കേവലം 2.6 സെക്കൻഡ് മതി.
- എസ്.യു.വി മോഡൽ: 1,111 കുതിരശക്തിയും 560 കിലോമീറ്റർ റേഞ്ചുമാണ് ഇതിനുള്ളത്. 2.9 സെക്കൻഡിൽ 100 കിലോമീറ്റർ വേഗത കൈവരിക്കും.
- ചാർജിംഗ് & വേഗത: 1,500 ന്യൂട്ടൺ മീറ്റർ ടോർക്കമുള്ള എക്സോബോട്ടിന് മണിക്കൂറിൽ 250 കിലോമീറ്റർ വരെ വേഗതയുണ്ട്. രണ്ട് മോഡലുകളുടെയും ബാറ്ററി 80 ശതമാനം വരെ ചാർജ് ചെയ്യാൻ ഏകദേശം 30 മിനിറ്റ് മാത്രം മതിയാകും.
നജ്ദി വാസ്തുവിദ്യയും ഫാൽക്കൺ വാതിലുകളും
സൗദി പാരമ്പര്യവും ഭാവി സാങ്കേതികവിദ്യയും സമന്വയിപ്പിച്ചാണ് കാർ രൂപകൽപ്പന ചെയ്തിരിക്കുന്നതെന്ന് ഡിസൈൻ മേധാവി റോബർട്ട് മെൽവില്ലെ വ്യക്തമാക്കി. സൗദിയുടെ നജ്ദി വാസ്തുവിദ്യയിൽ നിന്ന് പ്രചോദനം ഉൾക്കൊണ്ടാണ് ഇതിന്റെ ബോഡി ഡിസൈൻ.
- 32 ലൈറ്റ് ബാറുകൾ: സൗദി അറേബ്യയുടെ ഏകീകരണ വർഷമായ 1932-നെ അനുസ്മരിപ്പിച്ച് മുൻവശത്തും പിൻവശത്തുമായി 32 ലംബ ലൈറ്റ് ബാറുകൾ നൽകിയിട്ടുണ്ട്.
- ഫാൽക്കൺ ഡോറുകൾ: പരുന്തിന്റെ (ഫാൽക്കൺ) ചിറകുകളിൽ നിന്ന് പ്രചോദനം ഉൾക്കൊണ്ട് നിർമ്മിച്ച 3 മീറ്റർ നീളമുള്ള വാതിലുകൾ യാത്രക്കാർക്ക് സുഗമമായി കയറാനും ഇറങ്ങാനും സഹായിക്കുന്നു.
- സ്പേസ് ക്രാഫ്റ്റുകളെ ഓർമ്മിപ്പിക്കുന്ന വിധത്തിൽ ഭാരം കുറഞ്ഞ അലുമിനിയം വീലുകൾ, വിശാലമായ വിൻഡ്ഷീൽഡ്, ഉയർന്ന നിലവാരമുള്ള ലെതർ ഇന്റീരിയർ എന്നിവയും പ്രത്യേകതയാണ്.
ഹൈടെക് ഇന്റീരിയറും സുരക്ഷയും
സീർ കാറുകളിൽ അത്യാധുനിക സാങ്കേതികവിദ്യകളാണ് ഉൾപ്പെടുത്തിയിരിക്കുന്നതെന്ന് ചീഫ് ടെക്നോളജി ഓഫീസർ മാർക്കസ് ലീറ്റ്നർ പറഞ്ഞു.
- സ്ക്രീനുകൾ: ഡാഷ്ബോർഡിലുടനീളം വ്യാപിച്ചുകിടക്കുന്ന 48 ഇഞ്ച് മെയിൻ സ്ക്രീൻ, 10 ഇഞ്ച് സെൻട്രൽ സ്ക്രീൻ, പിൻസീറ്റ് യാത്രക്കാർക്കായി രണ്ട് 8 ഇഞ്ച് ടച്ച്സ്ക്രീനുകൾ എന്നിവ ക്യാബിനിലുണ്ട്.
- സുരക്ഷ: മിഡിൽ ഈസ്റ്റിലെ കഠിനമായ കാലാവസ്ഥയെ പ്രതിരോധിക്കുന്ന ‘സെൽ ടു പാക്ക്’ ബാറ്ററികളും, പ്രവചന സാങ്കേതികവിദ്യയിൽ (Predictive technology) പ്രവർത്തിക്കുന്ന 7 എയർബാഗുകളും സുരക്ഷ ഉറപ്പാക്കുന്നു.
- വേഗത്തിലുള്ള വിതരണം: പ്രാദേശിക നിർമ്മാണമായതിനാൽ ബുക്കിംഗ് കഴിഞ്ഞ് മാസങ്ങൾ കാത്തിരിക്കാതെ ആഴ്ചകൾക്കകം വാഹനം ഉപഭോക്താക്കൾക്ക് ലഭ്യമാകും.
സൗദി അറേബ്യയുടെ ചരിത്ര മുന്നേറ്റം
കിരീടാവകാശി മുഹമ്മദ് ബിൻ സൽമാൻ രാജകുമാരന്റെ ദീർഘവീക്ഷണമാണ് ഈ സ്വപ്ന പദ്ധതിക്ക് പിന്നിലെന്ന് സീർ സി.ഇ.ഒ ജെയിംസ് ഡെലൂക്ക പറഞ്ഞു. പബ്ലിക് ഇൻവെസ്റ്റ്മെന്റ് ഫണ്ട് (PIF), ഫോക്സ്കോൺ (Foxconn) എന്നിവരുമായുള്ള പങ്കാളിത്തത്തിലാണ് കിംഗ് അബ്ദുള്ള ഇക്കണോമിക് സിറ്റിയിലെ വമ്പൻ വ്യാവസായിക സമുച്ചയത്തിൽ സീർ കാറുകൾ നിർമ്മിക്കുന്നത്. സൗദി യുവതീയുവാക്കളുടെ പങ്കാളിത്തത്തോടെ നിർമ്മിക്കുന്ന ഈ കാറുകൾ സമീപഭാവിയിൽ തന്നെ ആഗോള വിപണിയിലെത്തും.