വാഷിംഗ്ടണ് – ഇറാനിന്റെ തീവ്രനിലപാട് കരാര് കൈവരിക്കുന്നതിന് തടസ്സം സൃഷ്ടിക്കുകയാണെന്ന് യു.എസ് ഉദ്യോഗസ്ഥര് ന്യൂയോര്ക്ക് ടൈംസിനോട് പറഞ്ഞു. നിര്ദ്ദിഷ്ട കരാറിനെ ചൊല്ലി ഇറാനില് ആഭ്യന്തര അഭിപ്രായവ്യത്യാസങ്ങളുണ്ട് എന്നതിന്റെ സൂചനയായി യു.എസ് ഉദ്യോഗസ്ഥരുടെ പ്രസ്താവന. യു.എസ്-ഇറാന് ചര്ച്ചകള് കാര്യമായ പുരോഗതിയില്ലാതെ സ്തംഭിച്ചിരിക്കുകയാണ്. ചര്ച്ചാ വിരുദ്ധ പ്രചാരണത്തിന്റെ പേരില് ഇറാന് പ്രസിഡന്റ് മസൂദ് പെസെഷ്കിയാന് സര്ക്കാര് മാധ്യമങ്ങള്ക്കെതിരെ രാഷ്ട്രീയ പോരാട്ടം നടത്തുകയാണെന്ന് ന്യൂയോര്ക്ക് ടൈംസ് കൂട്ടിച്ചേര്ത്തു.
ഇറാന് പാര്ലമെന്റിന്റെ ദേശീയ സുരക്ഷാ സമിതി തലവന് ഇബ്രാഹിം അസീസി, സുപ്രീം ദേശീയ സുരക്ഷാ കൗണ്സില് ഡെപ്യൂട്ടി സെക്രട്ടറി അലി ബാഖരി കനി തുടങ്ങിയ തീവ്രനിലപാടുകാര് കരാറിന് തടസ്സം സൃഷ്ടിക്കുന്നു. അമേരിക്കയുമായുള്ള ചര്ച്ചകളെ പിന്തുണച്ച് പരമോന്നത നേതാവ് മുജ്തബ ഖാംനഇക്കുള്ള കത്തില് ഒപ്പുവെക്കാന് വിസമ്മതിച്ച സുപ്രീം ദേശീയ സുരക്ഷാ കൗണ്സിലിലെ ഏക അംഗം അലി ബാഖരി കനി മാത്രമായിരുന്നു. പാര്ലമെന്റ് സ്പീക്കറും മുഖ്യ ഇറാന് ചര്ച്ചക്കാരനുമായ ബാഖര് ഖാലിബാഫ് അമേരിക്കക്കാരോട് വളരെ സൗമ്യമായി പെരുമാറുന്നുവെന്ന് ബാഖരി കനി ആരോപിച്ചുവെന്നും ചര്ച്ചകള് അട്ടിമറിക്കാന് ശ്രമിച്ച് മാധ്യമങ്ങളുമായി കത്ത് പങ്കുവെച്ചതായും ന്യൂയോര്ക്ക് ടൈംസ് വ്യക്തമാക്കി.
ഇറാനുമായി ഒരു ധാരണയിലെത്തുന്നത് സംബന്ധിച്ച് അന്തിമ തീരുമാനം എടുക്കാന് താന് ദൃഢനിശ്ചയം ചെയ്തിട്ടുണ്ടെന്ന് ട്രംപ് പ്രഖ്യാപിച്ചിട്ടും, വെള്ളിയാഴ്ച ഉന്നതോദ്യോഗസ്ഥരുമായി നടന്ന യു.എസ് പ്രസിഡന്റ് ഡൊണാള്ഡ് ട്രംപിന്റെ കൂടിക്കാഴ്ച ഒരു തീരുമാനവും പ്രഖ്യാപിക്കാതെ അവസാനിച്ചു. ഇറാന് ഒരിക്കലും ആണവായുധം സ്വന്തമാക്കില്ലെന്നും അമേരിക്കക്ക് താല്പ്പര്യമില്ലാത്ത ഒരു കരാറിനും ട്രംപ് സമ്മതിക്കില്ലെന്നും അദ്ദേഹത്തിന്റെ ചുവപ്പുരേഖകള് പാലിക്കാത്ത ഒരു ഇറാന് കരാറും യു.എസ് പ്രസിഡന്റ് അംഗീകരിക്കില്ലെന്നും വൈറ്റ് ഹൗസ് ഉദ്യോഗസ്ഥന് പറഞ്ഞു. ഇറാന് യുദ്ധവുമായി ബന്ധപ്പെട്ട ഒരു തീരുമാനവും അമേരിക്കയിലെ ഇടക്കാല തെരഞ്ഞെടുപ്പ് വൈകിപ്പിക്കില്ലെന്ന് ട്രംപ് ഫോക്സ് ന്യൂസിന് നല്കിയ അഭിമുഖത്തില് വ്യക്തമാക്കി. ഇറാന് ആണവായുധം സ്വന്തമാക്കാന് കഴിയില്ലെന്ന തന്റെ നിലപാട് ട്രംപ് ആവര്ത്തിച്ചു.