കണ്ണൂർ – തലശ്ശേരിയിൽ കായിക പരിശീലനത്തിന് എത്തിയ പതിനാലുകാരിയെ പീഡിപ്പിക്കാൻ ശ്രമിച്ച കെയർടേക്കർ അറസ്റ്റിൽ. തലശ്ശേരി നഗരസഭ സ്റ്റേഡിയം കെയർടേക്കർ, ലോട്ടസ് ടാക്കീസിന് സമീപത്തെ ഇർഷാസിൽ എ കെ റാഹിദി (39) നെയാണ് തലശ്ശേരി പോലീസ് അറസ്റ്റു ചെയ്തത്.
കായിക പരിശീലനത്തിനെത്തിയ പതിനാലുകാരിയെ ആണ് ഉപദ്രവിക്കാൻ ശ്രമിച്ചത്. ഷോർട്ട്സ് ധരിച്ച് പ്രാക്ടീസിന് എത്തിയ പെൺകുട്ടിയെ പല ദിവസങ്ങളിലായി പ്രതി ഉപദ്രവിക്കാൻ ശ്രമിച്ചുവെന്നാണ് പരാതി.
ഇയാൾക്കെതിരെ നേരത്തെയും ഇത്തരത്തിലുള്ള പരാതികൾ ഉയർന്നിരുന്നതായി പോലീസ് പറഞ്ഞു. പോക്സോ വകുപ്പ് അനുസരിച്ചാണ് കേസ്. പ്രതിയെ ചോദ്യം ചെയ്ത ശേഷം കോടതിയിൽ ഹാജരാക്കും.
പഴയങ്ങാടി – പ്രായപൂർത്തിയാകാത്ത പെൺകുട്ടിയെ പീഡിപ്പിച്ച യുവാവ് പിടിയിൽ. മാട്ടൂൽ സ്വദേശി കല്ലടിയൻ വീട്ടിൽ മോൻസി റോഷനെ(24) യാണ് പഴയങ്ങാടി എസ്.ഐ, കെ.കെ.തുളസി അറസ്റ്റു ചെയ്തത്.
പഴയങ്ങാടി സ്റ്റേഷൻ പരിധിയിലെ പ്രായപൂർത്തിയാകാത്ത പെൺകുട്ടിയെയാണ് പ്രതി പലതവണ പീഡിപ്പിച്ചത്. ഇക്കഴിഞ്ഞ ഇരുപത്തിയേഴിനും അതിനു മുമ്പുള്ള ദിവസങ്ങളിലും കുട്ടിയുടെ വീട്ടിൽ ആരുമില്ലാത്ത സന്ദർഭങ്ങളിലെത്തിയാണ് പ്രതി ഭീഷണിപ്പെടുത്തി പീഡനത്തിനിരയാക്കിയത്. ഭീഷണി തുടർന്നതോടെ കുട്ടി ബന്ധുക്കളോട് വിവരം പറയുകയും പോലീസിൽ പരാതി നൽകുകയുമായിരുന്നു. പെൺകുട്ടിയുടെ മൊഴി രേഖപ്പെടുത്തിയ പോലീസ് പോക്സോ നിയമപ്രകാരം കേസെടുത്ത് പ്രതിയെ കസ്റ്റഡിയിലെടുക്കുകയായിരുന്നു. അറസ്റ്റിലായ പ്രതിയെ കോടതിയിൽ ഹാജരാക്കി റിമാൻഡു ചെയ്തു.