റിയാദ്- സൗദി അറേബ്യയിൽ തടവിൽ കഴിയുന്ന കോഴിക്കോട് സ്വദേശി അബ്ദുൽ റഹീമിന്റെ ജയിൽ മോചനവുമായി ബന്ധപ്പെട്ട ആശങ്കകൾക്ക് അടിസ്ഥാനമില്ലെന്ന് റിയാദിലെ നിയമ സഹായ സമിതി അറിയിച്ചു. രണ്ട് പതിറ്റാണ്ടുകാലം പഴക്കമുള്ള കേസായതിനാൽ ജയിലിൽ നിന്നുള്ള വിടുതൽ നടപടികൾക്ക് അതിന്റെതായ സ്വാഭാവിക സമയം ആവശ്യമുണ്ടെന്നും, നിലവിലെ കാലതാമസത്തിൽ അസ്വാഭാവികതയൊന്നുമില്ലെന്നും സമിതി വാർത്താക്കുറിപ്പിൽ വ്യക്തമാക്കി. കഴിഞ്ഞ ദിവസമാണ് റഹീമിന്റെ ഇരുപത് വർഷത്തെ ശിക്ഷാ കാലാവധി ഔദ്യോഗികമായി അവസാനിച്ചത്.
അവധി നടപടികളെ ബാധിക്കില്ല
സൗദിയിലെ സർക്കാർ മേഖലകൾ പെരുന്നാൾ അവധിയിലേക്ക് പ്രവേശിച്ചിട്ടുണ്ടെങ്കിലും റഹീമിന്റെ മോചനവുമായി ബന്ധപ്പെട്ട പ്രധാന വകുപ്പുകൾ തുടർന്നും പ്രവർത്തിക്കുമെന്നാണ് ഒടുവിൽ ലഭിക്കുന്ന ഔദ്യോഗിക വിവരം. വാരാന്ത്യ അവധിക്ക് ശേഷം വരുന്ന ഞായറാഴ്ചയോടെ ഫയലുകളുടെ നീക്കം കൂടുതൽ വേഗത്തിലാകുമെന്നാണ് പ്രതീക്ഷിക്കുന്നത്.
പവർ ഓഫ് അറ്റോർണി സിദ്ദിഖ് തുവൂർ വ്യക്തമാക്കുന്നത്: “റഹീമിന്റെ മോചനത്തിനായുള്ള ഭൂരിഭാഗം നിയമനടപടികളും ഇതിനകം വിജയകരമായി പൂർത്തിയാക്കിയിട്ടുണ്ട്. ജയിലിൽ നിന്നുള്ള ഔദ്യോഗിക വിടുതൽ പ്രക്രിയ അവസാനിച്ചാലുടൻ തന്നെ എമർജൻസി സർട്ടിഫിക്കറ്റ് വഴി എക്സിറ്റ് വിസ ലഭ്യമാക്കാനുള്ള അടുത്ത ഘട്ടത്തിലേക്ക് ഞങ്ങൾ കടക്കും.”
ഊർജിത ശ്രമങ്ങളുമായി എംബസി
പെരുന്നാൾ അവധി ദിനങ്ങൾ എക്സിറ്റ് വിസ ഉൾപ്പെടെയുള്ള നടപടിക്രമങ്ങളെ നേരിയ തോതിലെങ്കിലും ബാധിച്ചേക്കുമോ എന്ന ആശങ്ക സമിതി ഭാരവാഹികൾ പങ്കുവെക്കുന്നുണ്ട്. എങ്കിലും, ജയിൽ അധികൃതരുമായും ബന്ധപ്പെട്ട മറ്റ് സൗദി സർക്കാർ വകുപ്പുകളുമായും നിരന്തരം സമ്പർക്കം പുലർത്തി വരികയാണ്. നടപടികൾ ഒട്ടും വൈകാതെ പൂർത്തിയാക്കാൻ ഇന്ത്യൻ എംബസിയും അഭിഭാഷകരും പവർ ഓഫ് അറ്റോർണിയും നിയമ സഹായ സമിതിയും സംയുക്തമായി രംഗത്തുണ്ടെന്നും വാർത്താക്കുറിപ്പിൽ അറിയിച്ചു.