ദിബ്രുഗഡ്– എഴുപത്തിയൊൻപതാമത് സന്തോഷ് ട്രോഫി ദേശീയ ഫുട്ബോൾ ചാമ്പ്യൻഷിപ്പിന്റെ കലാശപ്പോരാട്ടത്തിൽ ഇന്ന് കേരളം സർവീസസിനെ നേരിടും. അസമിലെ ധാക്കുവഖാന സ്റ്റേഡിയത്തിൽ ഉച്ചയ്ക്ക് 1:00 മണിക്കാണ് മത്സരം ആരംഭിക്കുന്നത്. സെമി ഫൈനലിൽ കരുത്തരായ പഞ്ചാബിനെ മറുപടിയില്ലാത്ത നാല് ഗോളുകൾക്ക് തകർത്താണ് കേരളം ഫൈനലിലേക്ക് യോഗ്യത നേടിയത്.
പോരാട്ടം തുല്യശക്തികൾ തമ്മിൽ കേരളവും സർവീസസും ഇതുവരെ 7 തവണ വീതം സന്തോഷ് ട്രോഫി കിരീടം നേടിയിട്ടുണ്ട്. ഇന്ന് ജയിക്കുന്നവർക്ക് തങ്ങളുടെ എട്ടാം കിരീടം സ്വന്തമാക്കാം എന്ന പ്രത്യേകതയുമുണ്ട്. കഴിഞ്ഞ വർഷം ഫൈനലിൽ ബംഗാളിനോട് പരാജയപ്പെട്ട കേരളത്തിന് ഇത്തവണ കിരീടം തിരിച്ചുപിടിക്കുക എന്ന ലക്ഷ്യത്തോടെയാണ് ഇറങ്ങുന്നത്.
പഞ്ചാബിനെതിരായ സെമി ഫൈനലിൽ ഇരട്ട ഗോൾ നേടിയ മുഹമ്മദ് റിയാസ്, ഗോൾ വേട്ടയ്ക്ക് തുടക്കമിട്ട മുഹമ്മദ് അജ്സൽ, വിഘ്നേഷ് എന്നിവരടങ്ങുന്ന മുന്നേറ്റ നിര മികച്ച ഫോമിലാണ്. അർജുൻ വിയുടെ മികച്ച ഫോമും പ്രതിരോധ നിരയിലെ കരുത്തും കേരളത്തിന് വലിയ പ്രതീക്ഷ നൽകുന്നു.
മറുവശത്ത്, സെമി ഫൈനലിൽ റെയിൽവേസിനെ 2-0 ന് പരാജയപ്പെടുത്തിയാണ് സർവീസസ് വരുന്നത്. ഗ്രൂപ്പ് ഘട്ടത്തിൽ കേരളത്തെ ഒരു ഗോളിന് പരാജയപ്പെടുത്തിയിട്ടുണ്ട്. ആ തോൽവിക്ക് മറുപടി നൽകി കിരീടമുയർത്താനാകും കേരളത്തിന്റെ ശ്രമം. സന്തോഷ് ട്രോഫി ചരിത്രത്തിലെ കേരളത്തിന്റെ 17-ാം ഫൈനലാണിത്.