റിയാദ് – വിദേശത്തു നിന്ന് കടത്തിയ വന് മയക്കുമരുന്ന് ശേഖരം സൗദിയില് സ്വീകരിക്കുന്നതിനിടെ ആറു പാക്കിസ്ഥാനികളെ സകാത്ത്, ടാക്സ് ആന്റ് കസ്റ്റംസ് അതോറിറ്റിയുമായി സഹകരിച്ച് നടത്തിയ ഓപ്പറേഷനിലൂടെ ജനറല് ഡയറക്ടറേറ്റ് ഓഫ് നാര്കോട്ടിക്സ് കണ്ട്രോള് റിയാദില് നിന്ന് അറസ്റ്റ് ചെയ്തു. 71 കിലോ അതിമാരക രാസലഹരി ഇവരുടെ പക്കല് കണ്ടെത്തി.
ഇതേസമയം, ഒമാനിലേക്ക് വന് മയക്കുമരുന്ന് ശേഖരം കടത്താനുള്ള ശ്രമം വിഫലമാക്കാനും ജനറല് ഡയറക്ടറേറ്റ് ഓഫ് നാര്കോട്ടിക്സ് കണ്ട്രോള് പ്രവര്ത്തിച്ചതായി സൗദി ആഭ്യന്തര മന്ത്രാലയ വക്താവ് ബ്രിഗേഡിയര് ത്വലാല് ബിന് ശല്ഹോബ് അറിയിച്ചു. ഒമാനിലെ ആന്റി-നാര്കോട്ടിക്സ് ഡയറക്ടറേറ്റിന് സൗദി ജനറല് ഡയറക്ടറേറ്റ് ഓഫ് നാര്കോട്ടിക്സ് കണ്ട്രോള് നല്കിയ വിവരങ്ങളുടെ അടിസ്ഥാനത്തില് ഒമാന് സുരക്ഷാ വകുപ്പുകള് 200 കിലോയിലേറെ മയക്കുമരുന്ന് പിടികൂടി. മൂന്നു ഭൂഖണ്ഡങ്ങള് കേന്ദ്രീകരിച്ച് മയക്കുമരുന്ന് കടത്തുന്ന, വിവിധ രാജ്യക്കാര് ഉള്പ്പെട്ട സംഘം ഒമാനിലേക്ക് മയക്കുമരുന്ന് കടത്താന് ശ്രമിക്കുന്നതായി ജനറല് ഡയറക്ടറേറ്റ് ഓഫ് നാര്കോട്ടിക്സ് കണ്ട്രോളിന് വിവരം ലഭിക്കുകയായിരുന്നു. മയക്കുമരുന്ന് കടത്താനായി വാഹനത്തില് പ്രത്യേകമായുണ്ടാക്കിയ അധിക വാട്ടര് ടാങ്കിനകത്ത് ഉരുക്കി ഒളിപ്പിച്ച നിലയിലാണ് മയക്കുമരുന്ന് കണ്ടെത്തിയത്. ഈ സംഘത്തില് നിന്ന് കൂറുമാറിയ പ്രതികളില് ഒരാള് നല്കിയ വിവരങ്ങളുടെ അടിസ്ഥാനത്തില് ഒമാനിലെ ഒരു വിലായത്തിലെ ഫ്ളാറ്റില് നിന്ന് ഏഷ്യന് വംശജയായ വനിത അടക്കം സംഘത്തില് പെട്ട ഏതാനും പേരെ കൂടി അറസ്റ്റ് ചെയ്തു. അഞ്ചു ലക്ഷം ഒമാനി റിയാല് വില കണക്കാക്കുന്ന മയക്കുമരുന്ന് ആണ് സംഘത്തിന്റെ പക്കല് നിന്ന് ഒമാന് സുരക്ഷാ വകുപ്പുകള് പിടികൂടിയത്.