ജിദ്ദ: ഇന്ത്യൻ മെഡിക്കൽ അസോസിയേഷന്റെ (ഐ.എം.എ) കേരള ബ്രാഞ്ചിന്റെ കീഴിൽ ഐ.എം.എ മലബാർ ബ്രാഞ്ച് ജിദ്ദയിൽ ഔദ്യോഗികമായി നിലവിൽ വന്നതായി ഭാരവാഹികൾ പത്രസമ്മേളനത്തിൽ അറിയിച്ചു. മലബാർ ബ്രാഞ്ചിന്റെ ഉദ്ഘാടനം ഐ.എം.എ മുൻ സംസ്ഥാന പ്രസിഡന്റും ഇൻസ്റ്റലേഷൻ ഓഫീസറുമായ ഡോ. ജോസഫ് ബനവൻ നിർവഹിച്ചു. ഒ.എ.സി കൺവീനർ ഡോ. അജി വർഗീസ് ഐ.എം.എയുടെ സാമൂഹിക-ക്ഷേമ പ്രവർത്തനങ്ങൾ വിശദീകരിച്ചു. ഐ.എം.എ മലബാർ ബ്രാഞ്ച് പ്രസിഡന്റായി ഡോ. വിനീത പിള്ള(അൽ റയാൻ)യെയും ജനറൽ സെക്രട്ടറിയായി ഡോ. ഇന്ദു ചന്ദ്രശേഖരനെ (ജിദ്ദ നാഷണൽ ഹോസ്പിറ്റൽ)യും തെരഞ്ഞെടുത്തു. ഡോ. മിനി കുട്ടി (ട്രഷറർ) ഡോ. മൃദുല (വൈസ് പ്രസിഡന്റ്), ഡോ. അഹമ്മദ് ഉണ്ണി (സ്റ്റേറ്റ് വർക്കിംഗ് കമ്മിറ്റി അംഗം) എന്നിവരാണ് മറ്റു ഭാരവാഹികൾ.
ജിദ്ദയിലെ പ്രവാസി സമൂഹത്തിന്റെ മുഖ്യധാരയിലേക്ക് ഇന്ത്യൻ ഡോക്ടർമാരെ കൂടുതൽ സജീവമായി ഉൾപ്പെടുത്തുക, തിരക്കേറിയ പ്രൊഫഷണൽ ജീവിതം സൃഷ്ടിക്കുന്ന മാനസിക സംഘർഷങ്ങൾ കുറയ്ക്കുക, ഡോക്ടർമാരുടെയും അവരുടെ കുടുംബങ്ങളുടെയും ഇൻഷുറൻസ് പരിരക്ഷയെക്കുറിച്ച് ബോധവൽക്കരണം നടത്തുക എന്നിവയാണ് സംഘടനയുടെ പ്രധാന ലക്ഷ്യങ്ങളെന്ന് ഭാരവാഹികൾ അറിയിച്ചു.
പ്രവാസികളുമായുള്ള സൗഹൃദം ഊട്ടിയുറപ്പിക്കുക, അവരുടെ ആരോഗ്യ സുരക്ഷയും ചികിത്സാ സംവിധാനങ്ങളും സംബന്ധിച്ച ആവശ്യമായ ഉപദേശങ്ങൾ നൽകുക, സൗജന്യ മെഡിക്കൽ ക്യാമ്പുകൾ ഉൾപ്പെടെയുള്ള സാമൂഹ്യ ആരോഗ്യ പ്രവർത്തനങ്ങൾ സംഘടിപ്പിക്കുക, ഡോക്ടർമാരുടെ ക്ഷേമം ലക്ഷ്യമാക്കിയുള്ള പദ്ധതികൾ നടപ്പാക്കുക, ഡോക്ടർമാരുടെയും കുടുംബങ്ങളുടെയും വിനോദ-സാംസ്കാരിക പരിപാടികൾക്ക് വേദിയൊരുക്കുക എന്നിവയും ഐ.എം.എ മലബാർ ബ്രാഞ്ച് നടപ്പിലാക്കുമെന്ന് ഭാരവാഹികൾ അറിയിച്ചു.
നേരത്തെ നടന്ന ഉദ്ഘാടന ചടങ്ങിൽ ജിദ്ദയിലെ വിവിധ ആരോഗ്യ സ്ഥാപനങ്ങളിൽ പ്രവർത്തിക്കുന്ന നിരവധി ഡോക്ടർമാർ പങ്കെടുത്തു. ഡോ. രാജാമണി പ്രാർത്ഥനാ ഗീതവും ഡോ. ഫ്രാൻസിസ് സേവിയർ ഫ്ലാഗ് സല്യൂട്ടേഷനും നിർവഹിച്ചു. മാസ്റ്റർ ഷയാൻ ആരവ് മുഖ്യ അവതാരകനായിരുന്നു. പ്രശസ്ത ഗായകൻ ജമാൽ പാഷ ഗാനങ്ങൾ ആലപിച്ചു. ഡോ. ഇന്ദു ചന്ദ്രശേഖരൻ ‘മൈൻഡ് റീഡിംഗ്’ പ്രോഗ്രാം അവതരിപ്പിച്ചു. വൈസ് പ്രസിഡന്റ് ഡോ. മൃദുല നന്ദി പറഞ്ഞു.
പത്രസമ്മേളനത്തിൽ ഡോ. ഇന്ദുചന്ദ്ര ( ജെ.എൻ.എച്ച് ), ഡോ. വിനീത പിള്ള ( അൽറയാൻ ), ഡോ. സ്മിത ( നസീം ജിദ്ദ ), ഡോ. മുഹമ്മദ് ഹാരിസ് ( ഹിബ ഏഷ്യ ), ഡോ. മുഹമ്മദലി ( നസീം ജിദ്ദ ) എന്നിവർ പങ്കെടുത്തു.