ജറൂസലം – തെക്കന്‍ ഗാസ മുനമ്പിലെ റഫയിലെ തുരങ്കങ്ങളില്‍ നിന്ന് പുറത്തുവന്ന നാലു ഫലസ്തീന്‍ പോരാളികളെ വധിച്ചതായി ഇസ്രായില്‍ സൈന്യം അറിയിച്ചു. ഹമാസ് പ്രസ്ഥാനവുമായി ബന്ധമുള്ള ഈസ്റ്റ് റഫ ബറ്റാലിയന്റെ കമാന്‍ഡറും അദ്ദേഹത്തിന്റെ ഡെപ്യൂട്ടിയും കൊല്ലപ്പെട്ടവരില്‍ ഉള്‍പ്പെടുന്നു. വെടിനിര്‍ത്തല്‍ നിലവില്‍വന്നതോടെ തെക്കന്‍ ഗാസയില്‍ ഇസ്രായില്‍ സൈന്യത്തിന്റെ നിയന്ത്രണത്തിലുള്ള പ്രദേശങ്ങള്‍ക്കടിയിലെ തുരങ്കങ്ങളില്‍ ഡസന്‍ കണക്കിന് ഹമാസ് പോരാളികള്‍ കുടുങ്ങിയിട്ടുണ്ട്. കിഴക്കന്‍ റഫയില്‍ ഇസ്രായില്‍ സൈന്യം പ്രവര്‍ത്തനം തുടരുന്നതായി സൈന്യം പ്രസ്താവനയില്‍ പറഞ്ഞു. ഇന്നലെ രാത്രിയില്‍ പ്രദേശത്തെ ഭൂഗര്‍ഭ തുരങ്കങ്ങളില്‍ നിന്ന് പുറത്തുവന്ന നാലു ഭീരകരെ തിരിച്ചറിഞ്ഞു. ഇസ്രായില്‍ വ്യോമസേനയുടെ നേതൃത്വത്തില്‍ സൈന്യം ഭീകരരെ ഇല്ലാതാക്കി – സൈന്യം പറഞ്ഞു.
സതേണ്‍ കമാന്‍ഡിലെ ഐ.ഡി.എഫ് (ഇസ്രായില്‍ സൈന്യം) സൈനികരെ വെടിനിര്‍ത്തല്‍ കരാര്‍ അനുസരിച്ച് പ്രദേശത്ത് വിന്യസിച്ചിരിക്കുന്നു. ഏതെങ്കിലും അടിയന്തര ഭീഷണി നീക്കം ചെയ്യാനായി സൈനികര്‍ പ്രവര്‍ത്തനം തുടരുമെന്നും സൈന്യം പറഞ്ഞു. തുരങ്കങ്ങളില്‍ നിന്ന് രക്ഷപ്പെടാന്‍ ശ്രമിച്ച 30 ലധികം പോരാളികള്‍ കൊല്ലപ്പെട്ടതായി ഇസ്രായില്‍ സൈന്യം വെള്ളിയാഴ്ച അറിയിച്ചിരുന്നു.
തെക്കന്‍ ഗാസയിലെ തുരങ്ക ശൃംഖലയില്‍ കുടുങ്ങിക്കിടക്കുന്ന പോരാളികളുടെ വിധി സംബന്ധിച്ച് ചര്‍ച്ചകള്‍ നടക്കുന്നുണ്ടെന്ന് വ്യത്യസ്ത സ്രോതസ്സുകള്‍ പറഞ്ഞു. പോരാളികളെ സുരക്ഷിതമായി കടന്നുപോകാന്‍ അനുവദിക്കുന്നതിന് ഇസ്രായിലിനു മേല്‍ സമ്മര്‍ദം ചെലുത്താന്‍ മധ്യസ്ഥ രാജ്യങ്ങളോട് ഹമാസ് ആവശ്യപ്പെട്ടു. ഈജിപ്ത്, തുര്‍ക്കി, ഖത്തര്‍ എന്നിവ മധ്യസ്ഥരായി, യു.എസ് മധ്യസ്ഥതയില്‍ ഇസ്രായിലും ഹമാസും തമ്മിലുള്ള വെടിനിര്‍ത്തല്‍ ഒക്ടോബര്‍ 10 ന് പ്രാബല്യത്തില്‍ വന്നു. ഇതുപ്രകാരം ഇസ്രായില്‍ സൈന്യം ഗാസ മുനമ്പിലെ മഞ്ഞ രേഖക്ക് പിന്നിലേക്ക് പിന്‍വാങ്ങി. മഞ്ഞ രേഖക്കു പിന്നിലുള്ള ഇസ്രായില്‍ നിയന്ത്രണത്തിലുള്ള ഭാഗത്ത് സ്ഥിതി ചെയ്യുന്ന തുരങ്കങ്ങളിലാണ് ഹമാസ് പോരാളികള്‍ കുടുങ്ങിയിരിക്കുന്നത്. ഇവരുടെ എണ്ണം 60 നും 80 നും ഇടയിലാണെന്ന് ഹമാസ് കണക്കാക്കുന്നു.
ദുര്‍ബലമായ വെടിനിര്‍ത്തല്‍ ലംഘിച്ചതായി ഇസ്രായിലും ഹമാസും പരസ്പരം ആരോപിക്കുന്നു. ഗാസ മുനമ്പ് ആഴത്തിലുള്ള മാനുഷിക പ്രതിസന്ധിയില്‍ തുടരുന്നു. 2023 ഒക്ടോബര്‍ ഏഴിന് ഇസ്രായിലിനെതിരെ ഹമാസ് നടത്തിയ ആക്രമണമാണ് ഗാസ യുദ്ധത്തിന് കാരണമായത്. ഹമാസ് ആക്രമണത്തില്‍ 1,221 പേര്‍ കൊല്ലപ്പെട്ടു. ഇതിന് പ്രതികാരമായി ഗാസയില്‍ ഇസ്രായില്‍ നടത്തിയ യുദ്ധത്തില്‍ കുറഞ്ഞത് 70,100 പേര്‍ കൊല്ലപ്പെട്ടതായി ഗാസ ആരോഗ്യ മന്ത്രാലയത്തിന്റെ കണക്കുകള്‍ വ്യക്തമാക്കുന്നു. വെടിനിര്‍ത്തല്‍ പ്രാബല്യത്തില്‍ വന്നശേഷം, ഇസ്രായിലി ആക്രമണങ്ങളില്‍ 354 ഫലസ്തീനികള്‍ കൊല്ലപ്പെട്ടതായി മന്ത്രാലയം പറയുന്നു.