ബാർസലോണ– ലാ ലിഗ പതിനാലാം റൗണ്ട് മത്സരത്തിലെ ജയത്തോടെ ഒന്നാം സ്ഥാനത്തേക്ക് കുതിച്ച് നിലവിലെ ചാമ്പ്യന്മാരായ ബാർസലോണ. സ്വന്തം തട്ടകമായ കാംപ്നൗവിൽ നടന്ന മത്സരത്തിൽ ഡിപാർട്ടിവോ അലാവസിനെ ഒന്നിനെതിരെ മൂന്നു ഗോളുകൾക്ക് തകർത്താണ് ബാർസ ഒന്നാം സ്ഥാനം തിരിച്ചുപിടിച്ചത്. ഒരു ഗോളിന് പിന്നിൽ നിന്ന് ശേഷമാണ് കാറ്റിലോണിയൻ ക്ലബ്ബ് മൂന്ന് ഗോളുകളും മടക്കിയത്. നിലവിലെ ചാമ്പ്യന്മാർക്ക് വേണ്ടി ഡാനി ഒൽമോ ഇരട്ട ഗോളുകൾ നേടിയപ്പോൾ ലാമിൻ യാമൽ ഒരു ഗോളും ഒരു അസിസ്റ്റുമായും മിന്നി തിളങ്ങി. സന്ദർശകർക്ക് വേണ്ടി വല കുലുക്കിയത് പബ്ലോ ഇബനെസാണ്.
മത്സരത്തിന്റെ ആദ്യ മിനുറ്റിൽ തന്നെ ഇബനെസ് ഗോൾ നേടി ബാർസലോണയെ ഞെട്ടിച്ചു. എന്നാൽ ആ സന്തോഷത്തിന് അധികം ആയുസ്സ് ഉണ്ടായിരുന്നില്ല. ഏഴാം മിനുറ്റിൽ തന്നെ യാമൽ ഗോൾ മടക്കി ബാർസയെ ഒപ്പം എത്തിച്ചു. 26-ാം മിനുറ്റിൽ റാഫിഞ്ഞ്യ പാസ്സിൽ നിന്നും വല കുലുക്കി ഒൽമോ ആതിഥേരെ മുന്നിലെത്തിച്ചു. അവസാന വിസിൽ ഊതാൻ നിമിഷങ്ങൾ മാത്രം ബാക്കി നിൽക്കെയാണ് ഒൽമോ അവസാന ഗോളും നേടി കാറ്റിലോണിയൻ ക്ലബ്ബിന് വിജയം സമ്മാനിച്ചത്. ബാർസ ഗോൾ കീപ്പർ ജോവാൻ ഗാർഷ്യയുടെ മികച്ച സേവുകളും വിജയത്തിൽ നിർണായക പങ്കു വഹിച്ചു. ഈ സീസണിൽ ആദ്യമായാണ് ബാർസയുടെ ആദ്യ ഇലവനിൽ യാമൽ – ലെവൻഡോസ്കി- റാഫിഞ്ഞ്യ ഒരുമിച്ചിറങ്ങുന്നത്. 14 മത്സരങ്ങളിൽ നിന്നും 34 പോയിന്റുമായി നിലവിലെ ചാമ്പ്യന്മാർ ഒന്നാമതും ഒരു മത്സരം കുറവ് കളിച്ച റയൽ മാഡ്രിഡ് 32 പോയിന്റുമായി രണ്ടാമതുമാണ്.
മറ്റൊരു മത്സരത്തിൽ അലക്സാണ്ടർ സോർലോത്തിന്റെ ഇരട്ട ഗോൾ മികവിൽ അത്‌ലറ്റികോ മാഡ്രിഡ് റയൽ ഒവിഡോയെ പരാജയപ്പെടുത്തി. സ്വന്തം തട്ടകത്തിൽ നടന്ന മത്സരത്തിൽ 16,26 മിനുറ്റുകളിലാണ് താരം ഗോൾ നേടിയത്. ജയത്തോടെ 31 പോയിന്റുമായി അത്‌ലറ്റികോ മൂന്നാമതാണ്.
മറ്റു മത്സരങ്ങൾ
മായ്യോർക്ക – 2 ( വേദത് മുരിഖി – 62 – പെനാൽറ്റി, 66)
ഒസാസുന – 2 ( റൗൾ ഗാർഷ്യ -82/ എൻസോ ബോയോമോ – 90+2)
ലെവന്റെ – 0
അത്‌ലറ്റിക് ബിൽബാവോ – 2 ( നവാരോ മുനോസ് – മൂന്ന് / നിക്കോ വില്യംസ് -44)