റിയാദ്- സൗദി എയർലൈൻസിൽ ടിക്കറ്റ് എടുത്ത് യാത്രക്കായി കാത്തിരിക്കുന്നവർ തങ്ങളുടെ കോണ്ടാക്ട് വിവരങ്ങൾ ശരിയാണെന്ന് ഉറപ്പുവരുത്തണമെന്ന് സൗദിയ ആവശ്യപ്പെട്ടു. ലോകമെമ്പാടുമുള്ള എയർബസ് A320 വിമാനങ്ങൾക്ക് പുറപ്പെടുവിച്ച ആഗോള സുരക്ഷാ മാർഗ്ഗനിർദ്ദേശങ്ങളുടെ അടിസ്ഥാനത്തിലാണ് സൗദിയ ഇക്കാര്യം വ്യക്തമാക്കിയത്. വിമാന സർവീസ് മാറ്റിവെക്കുകയാണെങ്കിൽ യാത്രക്കാരുമായി നേരിട്ട് ബന്ധപ്പെടുമെന്നും ഫോൺ, ഇ-മെയിൽ വിവരങ്ങൾ നിരീക്ഷിക്കണമെന്നും സൗദിയ ആവശ്യപ്പെട്ടു. തങ്ങളുടെ കോണ്ടാക്ട് വിവരങ്ങൾ ശരിയാണെന്ന് ഓരോ യാത്രക്കാരനും ഉറപ്പാക്കണം. യാത്രക്കാരുടെയും ജീവനക്കാരുടെയും സുരക്ഷയാണ് തങ്ങളുടെ മുൻ‌ഗണനയെന്നും സൗദിയ വ്യക്തമാക്കി.
യൂറോപ്യൻ വിമാന നിർമ്മാതാക്കളായ എയർബസ് (AIR.PA) ആണ് തങ്ങൾ വ്യാപകമായി നിർമ്മിക്കുന്ന A320 വിഭാഗത്തിലെ 6000 വിമാനങ്ങളുടെ അടിയന്തര അറ്റകുറ്റപ്പണികൾക്ക് ഉത്തരവിട്ടത്. ആഗോളതലത്തിലുള്ള പകുതിയിലേറെ വിമാനങ്ങളെയും ഉത്തരവ് പ്രതികൂലമായി ബാധിച്ചു. ഏറെ വർഷങ്ങൾക്ക് ശേഷമാണ് എയർബസിന് ഇത്തരത്തിലുള്ള വൻതോതിലുള്ള റീകാൾ നേരിടേണ്ടിവരുന്നത്. കുറച്ച് ആഴ്ചകൾക്ക് മുമ്പാണ് A320 മോഡൽ, ബോയിംഗ് 737നെ മറികടന്ന് ലോകത്തെ ഏറ്റവും കൂടുതൽ വിതരണം ചെയ്ത ജെറ്റായി മാറിയത്.
തകരാറിന്റെ കാരണം
സോളാർ ഫ്ലെയറുകൾ വിമാനത്തിന്റെ നിയന്ത്രണ സംവിധാനങ്ങളുടെ നിർണായക ഡാറ്റയെ ബാധിച്ചേക്കാമെന്ന് ഈയിടെ കണ്ടെത്തിയതാണ് മുന്നറിയിപ്പ് നിർദ്ദേശം നൽകാൻ കാരണം. തീവ്രമായ” സൗരോർജ്ജ വികിരണം “ഫ്ലൈറ്റ് നിയന്ത്രണങ്ങളുടെ പ്രവർത്തനത്തിന് നിർണായകമായ ഡാറ്റയെ പ്രതികൂലമായി ബാധിച്ചേക്കാമെന്നും എയർബസ് പറയുന്നു. ഇതേ തുടർന്ന് മുഴുവൻ എയർലൈൻസുകളുടെയും അറ്റകുറ്റപണിക്ക് നിർദ്ദേശം നൽകുകയും ചെയ്തു. ഒക്ടോബർ 30-ന് കാൻകൂണിൽ നിന്ന് ന്യൂജേഴ്സിയിലേക്ക് പറന്ന ജെറ്റ്‌ബ്ലൂ വിമാനത്തിൽ ഉണ്ടായ പെട്ടെന്നുള്ള ഉയർച്ച-താഴ്ചയാണ് സംഭവത്തെ പറ്റി അന്വേഷിക്കാൻ കാരണമായത്. ഈ സമയത്ത് ചില യാത്രക്കാർക്ക് പരിക്കുകളും സംഭവിച്ചിരുന്നു.
തങ്ങളുടെ 480 വിമാനങ്ങളിൽ 340 എണ്ണം പരിഹാരം ആവശ്യമുള്ളവയാണെന്ന് ലോകത്തിലെ ഏറ്റവും വലിയ A320 ഓപ്പറേറ്ററായ അമേരിക്കൻ എയർലൈൻസ് പറഞ്ഞു. രണ്ടു മണിക്കൂറിനകം പ്രശ്നം പരിഹരിക്കാമെന്ന് കമ്പനി വാഗ്ദാനം ചെയ്തു. ലുഫ്താൻസ, ഇൻഡിഗോ, ഈസി‌ജെറ്റ് തുടങ്ങിയ എയർലൈൻസുകളും ചില വിമാന സർവീസുകൾ റദ്ദാക്കാൻ തീരുമാനിച്ചു. കൊളംബിയൻ എയർലൈൻ അവിയാൻകയുടെ 100-ലധികം വിമാനങ്ങളെ തകരാർ ബാധിച്ചു. ഡിസംബർ 8 വരെ ടിക്കറ്റ് വിൽപ്പന നിർത്തിവെച്ചതായും കമ്പനി അറിയിച്ചു.
ലോകമെമ്പാടും ഏകദേശം 11,300 A320 വിമാനങ്ങൾ സർവീസിലുണ്ട്. ഇവയിൽ 6,440 എണ്ണം പ്രധാന A320 മോഡലാണ്. അമേരിക്ക, ചൈന, യൂറോപ്പ്, ഇന്ത്യ എന്നിവിടങ്ങളിലെ പ്രധാന എയർലൈൻസുകൾ ഈ മോഡലിന്റെ വലിയ ഉപഭോക്താക്കളാണ്. നൂറു കണക്കിന് വിമാനങ്ങൾ ഒറ്റയടിക്ക് അറ്റകുറ്റ പണി ആവശ്യമാകുന്നത് ഏറെ പ്രയാസമുണ്ടാക്കും.
പഴയ സോഫ്റ്റ് വെയർ വേർഷനിലേക്ക് മടങ്ങുന്നതാണ് ഇതിനുള്ള പരിഹാരം. സാങ്കേതികമായി ലളിതമാണെങ്കിലും വിമാനം സർവീസിന് ഉപയോഗിക്കാൻ ഇത് പൂർത്തിയാക്കേണ്ടത് അത്യാവശ്യമാണ്. ലോകമെങ്ങും നിരവധി സർവീസുകളെ ഇത് പ്രതികൂലമായി ബാധിക്കും.