ജിദ്ദ – സ്പോര്ട്സ് മന്ത്രാലയവുമായി സഹകരിച്ച് സ്വകാര്യ മേഖലയിലെ ജിമ്മുകളിലും സ്പോര്ട്സ് സെന്ററുകളിലും 12 തൊഴിലുകളില് 15 ശതമാനം സൗദിവല്ക്കരണം നടപ്പാക്കാന് മാനവ വിഭവശേഷി, സാമൂഹിക വികസന മന്ത്രാലയം തീരുമാനിച്ചു. അടുത്ത വര്ഷം നവംബര് 28 മുതല് ഇത് പ്രാബല്യത്തില് വരും. നാലോ അതിലധികമോ ജീവനക്കാരുള്ള സ്ഥാപനങ്ങള്ക്ക് സൗദിവല്ക്കരണ തീരുമാനം ബാധകമാകും. രാജ്യത്തുടനീളം സ്വദേശികള്ക്ക് കൂടുതല് പ്രചോദനാത്മകവും ഉല്പ്പാദനക്ഷമവുമായ തൊഴിലവസരങ്ങള് ലഭ്യമാക്കാനുള്ള ശ്രമങ്ങളുടെ ഭാഗമായാണിത്.
പുരുഷ, വനിതാ ജിമ്മുകളിലും സ്പോര്ട്സ് സെന്ററുകളിലും സ്പോര്ട്സ് പരിശീലകന്, പ്രൊഫഷണല് ഫുട്ബോള് പരിശീലകന്, സ്പോര്ട്സ് സൂപ്പര്വൈസര്, പേഴ്സണല് ട്രെയിനര്, പ്രൊഫഷണല് അത്ലറ്റിക്സ് ട്രെയിനര് എന്നിവയുള്പ്പെടെ 12 തൊഴിലുകളില് സൗദിവല്ക്കരണം നടപ്പാക്കാനാണ് തീരുമാനം. ഇത് സ്വകാര്യ മേഖലയില് നല്കുന്ന സ്പോര്ട്സ് സേവനങ്ങളുടെ ഗുണനിലവാരം വര്ധിപ്പിക്കുകയും സ്പോര്ട്സ് സ്ഥാപനങ്ങളില് കൂടുതല് പ്രൊഫഷണല് അന്തരീക്ഷത്തിന് സഹായിക്കുകയും ചെയ്യും.
സ്വദേശികളെ നിയമിക്കാന് സ്ഥാപനങ്ങളെ സഹായിക്കുന്നതിന് ആവശ്യമായ പിന്തുണാ പ്രോഗ്രാമുകള് മാനവശേഷി, സാമൂഹിക വികസന മന്ത്രാലയം നല്കുന്നു. നിയമനം, പരിശീലനം, യോഗ്യത, തൊഴില്, തൊഴില് സ്ഥിരത എന്നിവക്കുള്ള പിന്തുണ, സൗദിവല്ക്കരണ പിന്തുണാ പ്രോഗ്രാമുകളും മാനവശേഷി വികസന ഫണ്ട് പ്രോഗ്രാമുകളും പ്രയോജനപ്പെടുത്തുന്നതില് മുന്ഗണന എന്നിവ ഈ പ്രോഗ്രാമുകളില് ഉള്പ്പെടുന്നു.
ജിമ്മുകള്ക്കും സ്പോര്ട്സ് സെന്ററുകള്ക്കും ബാധകമായ സൗദിവല്ക്കരണ തീരുമാനം, പാലിക്കേണ്ട സൗദിവല്ക്കരണ അനുപാതം, സൗദിവല്ക്കരണത്തിലൂടെ ലക്ഷ്യമിടുന്ന തൊഴിലുകള് എന്നിവ വിശദീകരിക്കുന്ന ഗൈഡ് മാനവശേഷി, സാമൂഹിക വികസന മന്ത്രാലയം അതിന്റെ വെബ്സൈറ്റില് പുറത്തിറക്കിയിട്ടുണ്ട്. ശിക്ഷകള് ഒഴിവാക്കുന്നതിന് സ്ഥാപനങ്ങള് സൗദിവല്ക്കരണ വ്യവസ്ഥകള് പാലിക്കണമെന്ന് മന്ത്രാലയം ആവശ്യപ്പെട്ടു. മാനവശേഷി, സാമൂഹിക വികസന മന്ത്രാലയവും കായിക മന്ത്രാലയവും തമ്മിലുള്ള ഫലപ്രദമായ സഹകരണത്തെ പുതിയ സൗദിവല്ക്കരണ പ്രഖ്യാപനം പ്രതിഫലിപ്പിക്കുന്നു. തൊഴില് വിപണിയുടെ ആവശ്യങ്ങള്ക്കനുസൃതമായി സൗദിവല്ക്കരണ തീരുമാനം നടപ്പാക്കുന്നുണ്ടെന്ന് സ്പോര്ട്സ് മന്ത്രാലയം നിരീക്ഷിക്കും.