കുവൈത്ത് സിറ്റി – പ്രശസ്ത മതപ്രബോധകന്റെ കുവൈത്ത് പൗരത്വം കുവൈത്ത് മന്ത്രിസഭ റദ്ദാക്കി. ടെലിവിഷന്‍ പ്രോഗ്രാമുകളിലൂടെയും സാംസ്‌കാരിക, ബൗദ്ധിക പ്രവര്‍ത്തനങ്ങളിലൂടെയും പ്രശസ്തനായ പ്രബോധകന്റെ പൗരത്വമാണ് റദ്ദാക്കിയത്. ഇദ്ദേഹം അടക്കം ഏഴു പേരുടെ പൗരത്വം മന്ത്രിസഭ ഇന്നലെ റദ്ദാക്കിയിട്ടുണ്ട്.
അതേ സമയം, 1967 മുതല്‍ നിയമവിരുദ്ധമായ കൂട്ടിച്ചേര്‍ക്കലുകളിലൂടെ 999 പേര്‍ കുവൈത്ത് പൗരത്വം നേടിയ കേസും അധികൃതര്‍ കണ്ടെത്തി. 1961 ല്‍ കുവൈത്ത് പൗരത്വം ലഭിച്ചയാളുടെ സഹോദരനാണെന്ന് അവകാശപ്പെട്ട് 1967 ല്‍ പൗരത്വം നേടിയ മുഖ്യപ്രതി തന്റെ പേരില്‍ 31 മക്കളെ രജിസ്റ്റര്‍ ചെയ്തതായി അന്വേഷണങ്ങളില്‍ മനസ്സിലായി. എന്നാല്‍ ഡി.എന്‍.എ പരിശോധനയില്‍ 10 പേര്‍ മാത്രമാണ് ഇദ്ദേഹത്തിന്റെ യഥാര്‍ഥ മക്കളെന്ന് തെളിഞ്ഞു. ശേഷിക്കുന്നവര്‍ ഗള്‍ഫ് രാജ്യങ്ങളുടെ രേഖകളാണ് കൈവശം വെച്ചിരുന്നത്. 1961 ല്‍ കുവൈത്ത് പൗരത്വം നേടിയ വ്യക്തിയുമായി ഇവര്‍ക്കാര്‍ക്കും യാതൊരു കുടുംബ ബന്ധവുമില്ലെന്നും തെളിഞ്ഞു.
കുവൈത്ത് പൗരത്വത്തിന്റെ ഗുണങ്ങള്‍ പ്രയോജനപ്പെടുത്താനായി കഴിഞ്ഞ ദശകങ്ങളില്‍ കൃത്രിമം തുടരുകയും വിവിധ രാജ്യക്കാരായ ഡസന്‍ കണക്കിനാളുകളെ മക്കളും സഹോദരങ്ങളും ഉറ്റബന്ധുക്കളുമായി ഇവര്‍ തങ്ങളുടെ രേഖകളില്‍ ചേര്‍ക്കുകയും ചെയ്തു. ഇതിലൂടെ നിയമവിരുദ്ധ ഗുണഭോക്താക്കളുടെ എണ്ണം 999 ആയി. ഇതില്‍ 478 പേര്‍ മുതിര്‍ന്നവരാണ്. ഇവരുടെ ശമ്പളത്തിനായി പ്രതിവര്‍ഷം ഏകദേശം 45 ലക്ഷം കുവൈത്തി ദിനാറാണ് ചെലവഴിക്കപ്പെടുന്നത്. വിദ്യാഭ്യാസം, വായ്പകള്‍, സര്‍ക്കാര്‍ സഹായം എന്നിവക്കായി ചെലവഴിച്ച കോടിക്കണക്കിന് കുവൈത്തി ദീനാര്‍ ഇതിനു പുറമെയുണ്ട്.