ന്യൂഡൽഹി: ജാപ്പനീസ് മൾട്ടിനാഷണൽ ഇലക്ട്രോണിക്സ് നിർമാതാക്കളായ പാനസോണിക് ഇന്ത്യയിൽ റഫ്രിജറേറ്ററും വാഷിംഗ് മെഷീനും ഉൾപ്പെടുന്ന ഉപഭോക്തൃ ഉൽപ്പന്നങ്ങളുടെ വിൽപ്പന അവസാനിപ്പിക്കുന്നു. ഈ വിഭാഗങ്ങളിൽ മികച്ച മാർക്കറ്റ് ഷെയർ നേടാൻ കഴിയാതിരിക്കുകയും തുടർച്ചയായി നഷ്ടം രേഖപ്പെടുത്തുകയും ചെയ്തതിനെ തുടർന്നാണ് തീരുമാനം.
ഈ തീരുമാനം പ്രതികൂലമായി ബാധിക്കുന്ന ജീവനക്കാരെ മറ്റ് ഉൽപ്പന്നങ്ങളുടെ ബിസിനസിലേക്ക് മാറ്റുന്ന കാര്യം പരിഗണിക്കും. നിലവിലുള്ള ഉപഭോക്താക്കൾക്ക് സ്പെയർ പാർട്സ്, വാറന്റി കവറേജ് തുടങ്ങിയ സേവനങ്ങൾ മുടക്കമില്ലാതെ തുടരുമെന്ന് കമ്പനി അറിയിച്ചു.
പാനസോണിക് ലൈഫ് സൊല്യൂഷൻസ് ഇന്ത്യയ്ക്ക് രാജ്യത്തെ വാഷിംഗ് മെഷീനുകളുടെ വിപണി വിഹിതം 1.8 ശതമാനവും റഫ്രിജറേറ്ററുകളുടേത് 0.8% മാത്രവുമാണ്. മറ്റ് നിരവധി കമ്പനികൾ കടുത്ത മത്സരം ഉയർത്തുന്ന വിപണിയിൽ പിടിച്ചുനിൽക്കാൻ നടത്തിയ ശ്രമങ്ങൾ പരാജയപ്പെടുകയായിരുന്നു.
“കഴിഞ്ഞ ആറ് വർഷമായി റഫ്രിജറേറ്ററുകളുടെയും വാഷിംഗ് മെഷീനുകളുടെയും വിൽപ്പനയിലും ലാഭത്തിലും ഞങ്ങൾക്ക് നഷ്ടമാണുണ്ടായത്” – പാനസോണിക് വക്താവിനെ ഉദ്ധരിച്ച് എൻഡിടിവി പ്രോഫിറ്റ് റിപ്പോർട്ട് ചെയ്തു.
ഭാവി വളർച്ചാ മേഖലകളായ ഹോം ഓട്ടോമേഷൻ, ഹീറ്റിംഗ് വെന്റിലേഷൻ ആൻഡ് കൂളിംഗ് (HVAC), ബിസിനസ്-ടു-ബിസിനസ് (B2B) സൊല്യൂഷൻസ്, ഇലക്ട്രിക്കൽസ്, എനർജി സൊല്യൂഷൻസ് എന്നിവയിലാവും ഇന്ത്യയിൽ പാനസോണിക് ഇനി ശ്രദ്ധ കേന്ദ്രീകരിക്കുക. ഈ തീരുമാനം ബാധിക്കുന്ന ജീവനക്കാർക്ക് HVAC, ടിവി തുടങ്ങിയ മറ്റ് ബിസിനസ് വിഭാഗങ്ങളിൽ അവസരങ്ങൾ നൽകുന്ന കാര്യം പരിഗണിക്കും. “ഡീലർമാർക്ക് ഇൻവെന്ററി ലിക്വിഡേഷനിൽ പിന്തുണ നൽകുകയും, ഉപഭോക്താക്കൾക്ക് സ്പെയർ പാർട്സ്, വാറന്റി കവറേജ് ഉൾപ്പെടെ പൂർണ്ണമായ സേവനം തുടർന്നും നൽകുകയും ചെയ്യും.” – പാനസോണിക് പ്രസ്താവനയിൽ പറഞ്ഞു.