മലപ്പുറം– മുണ്ടേരി ഉള്വനത്തില് കാട്ടാന ആക്രമണത്തില് കൊല്ലപ്പെട്ട വാണിയമ്പുഴ ഉന്നതിയിലെ ബില്ലിയുടെ മൃതദേഹം പോസ്റ്റുമോര്ട്ടത്തിനു ശേഷം കൊണ്ടുപോയ സംഘം യാത്ര ചെയ്ത ഡിങ്കി ബോട്ട് തകരാറിലായി കാട്ടില് കുടുങ്ങി. നിലമ്പൂര് നിയുക്ത എംഎല്എ ആര്യാടന് ഷൗക്കത്തും പൊലീസ്, ഫയര്ഫോഴ്സ്, വനംവകുപ്പ് ഉള്പ്പെടെ ഉദ്യോഗസ്ഥരുമടങ്ങിയ സംഘമാണ് വാണിയമ്പുഴയിലെത്തിച്ചപ്പോള് കുടുങ്ങിയത്.
മഞ്ചേരി മെഡിക്കല് കോളെജില് മൃതദേഹം പോസ്റ്റ് മോര്ട്ടത്തിനു ശേഷം ഇന്ന് ഉച്ചയ്ക്ക് രണ്ട് മണിയോടെയാണ് ഡിങ്കിബോട്ടില് ചാലിയാറിനക്കരെ വാണിയമ്പുഴ ഉന്നതിയിലെത്തിച്ചത്.
ഡിങ്കി ബോട്ടിന്റെ എഞ്ചിന് പ്രവര്ത്തിക്കാത്തതിനാല് തിരികെ മടങ്ങാന് കഴിയാത്ത സാഹചര്യത്തിലാണ് ഉള്ളത്. രണ്ടു ബോട്ടുകളാണ് തകരാറിലായത്. നാളെയാണ് ആര്യാടന് ഷൗക്കത്തിന്റെ സത്യപ്രതിജ്ഞാ ചടങ്ങ്. ഇന്നു രാത്രിയില് തിരുവനന്തപുരത്തേക്കുള്ള ട്രെയിന് ടിക്കറ്റ് ബുക് ചെയ്തിട്ടുമുണ്ട്.