കോഴിക്കോട്– നിലമ്പൂര്‍ ഉപതരെഞ്ഞെടുപ്പില്‍ ഇടതുപക്ഷ ജനാധിപത്യ മുന്നണി സ്ഥാനാര്‍ത്ഥി എം.സ്വരാജിനു വേണ്ടി രംഗത്തിറങ്ങിയ സാംസ്‌കാരിക നായകരെ വിമര്‍ശിച്ച് വ്യത്യസ്ത മേഖലകളിലുള്ളവര്‍ രംഗത്ത്. കാട്ടാനയും കാട്ടുപോത്തും മറ്റു മൃഗങ്ങളും വന്നിട്ടും ജനം ക്ഷമിച്ചുവെന്നും സാംസ്‌കാരിക നായകര്‍ വന്നപ്പോള്‍ ജനം പ്രതികരിച്ചുവെന്നുമുള്ള രൂക്ഷ വിമര്‍ശന പോസ്റ്റുമായി എത്തിയതാകട്ടെ നടന്‍ ജോയ് മാത്യു. പോസ്റ്റിന്റെ പൂര്‍ണ്ണ രൂപം ഇങ്ങിനെ: ” കാട്ടാന വന്നു, ജനം ക്ഷമിച്ചു. കാട്ടു പന്നി വന്നു, ജനം ക്ഷമിച്ചു. കടുവ വന്നു, ജനം ക്ഷമിച്ചു. കാട്ടുപോത്ത് വന്നു, ജനം ക്ഷമിച്ചു. സാംസ്‌കാരിക നായകര്‍ വന്നു, ജനം പ്രതികരിച്ചു..”
https://www.facebook.com/share/p/16B8uweTjz
പോസ്റ്റ് ഇതിനകം വൈറലായി. പോസ്റ്റ് ഷെയര്‍ചെയ്യപ്പെടുന്നതിനു പുറമെ വാട്‌സാപ് ഉള്‍പ്പെടെ വിവിധ സമൂഹ മാധ്യമങ്ങളില്‍ സ്‌ക്രീന്‍ഷോട്ടായും പരക്കുന്നുണ്ട്. പലതരം രസകരവും ആക്ഷേപഹാസ്യം ഉള്ളടങ്ങിയതുമായ കമന്റുകളാണ് പോസ്റ്റിനടിയില്‍ വരുന്നത്. സാംസ്‌കാരിക നായകരുടെ വോട്ടുകള്‍ എണ്ണിതുടങ്ങിയിട്ടില്ല എന്നും അതു തുടങ്ങിയാല്‍ സ്വരാജ് ജയിക്കുമെന്നും ഒരാള്‍ പറയുന്നു. ചിലര്‍ കെആര്‍ മീരയുടെ മികച്ച എതിരാളിയെ ചോദിച്ചുവാങ്ങിയ കോണ്‍ഗ്രസിന് അഭിനന്ദനമെന്ന പോസ്റ്ററുകള്‍ പങ്കുവെക്കുന്നുണ്ട്. അങ്ങിനെ സഖാവ് തോല്‍ക്കില്ലെന്നും ഫെയ്‌സ്ബുക് ലൈക്ക് കൂടി എണ്ണാന്‍ ഉണ്ടെന്നും ചിലര്‍ പരിഹസിച്ചു. ആര്യാടന്‍ ഷൗക്കത്ത് സ്വരാജിനെ തോത്പിച്ചുവെന്ന് കരുതുന്നില്ല, കേരളത്തിലെ സാംസ്‌കാരിക നായകന്മാരെ മൊത്തം നിലമ്പൂരിലെ സാധാരണക്കാരായ ജനം ഒരുമിച്ചു നിന്ന് അടപടലം ചാമ്പി എന്ന് വിചാരിച്ചാല്‍ മതിയെന്ന കമന്റിട്ടയാളും കൂട്ടത്തിലുണ്ട്. കെആര്‍ മീരയുടെ പോസ്റ്റിനെ പലരും എടുത്തുദ്ധരിക്കുന്നുമുണ്ട്.