പത്താം ക്ലാസ് പാസായവർക്ക് സ്റ്റൈപ്പന്റോടുകൂടി പഠിക്കാനുള്ള സുവർണ്ണാവസരം. കേന്ദ്ര മന്ത്രാലയത്തിന് കീഴിലുള്ള സിഫ്നെറ്റ് മറൈൻ കോഴ്സുകളിലേക്കാണ് പത്താം ക്ലാസ്സ് പാസായവർക്ക് പഠിക്കാനും സമ്പാദിക്കാനുമുള്ള അവസരം ലഭിച്ചിരിക്കുന്നത്. ഫിഷറീസ്, ആനിമൽ ഹസ്ബൻഡറി ആൻഡ് ഡയറിയിങ് മന്ത്രാലയത്തിന്റെ ഫിഷറീസ് വകുപ്പിനു കീഴിലുള്ള, കൊച്ചിയിലെ സെൻട്രൽ ഇൻസ്റ്റിറ്റ്യൂട്ട് ഓഫ് ഫിഷറീസ്, നോട്ടിക്കൽ ആൻഡ് എനർജിനീയറിങ് ട്രെയിനിങ് അഥവാ സിഫ്നെറ്റ്, രണ്ട് വർഷം ദൈർഘ്യമുള്ള വിഎൻസി അഥവാ വെസ്സൽ നാവിഗേറ്റർ കോഴ്സ്, മറൈൻ ഫിറ്റർ കോഴ്സ് (എംഎഫ്സി) എന്നിവയിലെ പ്രവേശനത്തിനാണ് നിലവിൽ അപേക്ഷ ക്ഷണിച്ചിരിക്കുന്നത്.
അഖിലേന്ത്യ തലത്തിൽ നടത്തുന്ന കോമൺ എൻട്രൻസ് ടെസ്റ്റ് (സിഇടി) വഴി പ്രവേശനം നേടാവുന്ന കോഴ്സുകളിൽ പത്താം ക്ലാസ് വിജയത്തിന് പുറമേ കണക്കിലും സയൻസിലും 40 ശതമാനം മാർക്കുവീതം വേണം. 2025ൽ യോഗ്യതാപരീക്ഷ അഭിമുഖീകരിച്ച് ഫലം കാത്തിരിക്കുന്നവർക്കും അപേക്ഷിക്കാം.
അപേക്ഷ ഫോം, പ്രോസ്പെക്ട്സ് തുടങ്ങിയവ cifnet.gov.in ൽ നിന്നും ഡൗൺലോഡ് ചെയ്യാവുന്നതാണ്. ജനറൽ വിഭാഗക്കാർക്ക് 350 രൂപയും പട്ടികവിഭാഗക്കാർക്ക് 175 രൂപയും അപേക്ഷാഫീസ് ആയി നൽകണം. പേ ആൻഡ് അക്കൗണ്ട്സ് ഓഫീസർ, കൊച്ചി എന്നപേരിൽ ഡിമാൻഡ് ഡ്രാഫ്റ്റ് ആയി എടുക്കണം. പ്രവേശനം നേടുന്നവർക്ക് 1500 രൂപ വരെ സ്റ്റൈപ്പന്റ് ആയി ലഭിക്കും.
പൂരിപ്പിച്ച അപേക്ഷയും അനുബന്ധ രേഖകളും ഡിമാൻഡ് ഡ്രാഫ്റ്റ് സഹിതം ജൂൺ 16 നകം, ദി ഡയറക്ടർ, സെൻട്രൽ ഇൻസ്റ്റിറ്റ്യൂട്ട് ഓഫ് ഫിഷറീസ് നോട്ടിക്കൽ ആൻഡ് എൻജിനിയറിങ് ട്രെയിനിങ് (സിഫ്നെറ്റ്), ഫൈൻ ആർട്സ് അവന്യൂ, ഫോർഷോർ റോഡ്, കൊച്ചി-682016 എന്ന വിലാസത്തിൽ ലഭിക്കണം.