റോഡ് മുറിച്ചുകടക്കവേ ഒന്നാം ക്ലാസ് വിദ്യാർത്ഥിനിക്ക് ദാരുണാന്ത്യം

പാലക്കാട്: ബസിൽ നിന്നിറങ്ങി റോഡ് മുറിച്ചുകടക്കവേ മുന്നോട്ടെടുത്ത ബസ്സിനടിയിൽപ്പെട്ടു പരുക്കേറ്റ ഒന്നാം ക്ലാസ് വിദ്യാർത്ഥിനി മരിച്ചു. ആലത്തൂർ എരിമയൂർ ചുള്ളിമട വട്ടോട്ട് കൃഷ്ണദാസ് – രജിത ദമ്പതിയുടെ മകൾ തൃതിയ(6)യാണ് മരിച്ചത്. എരിമയൂർ സെന്റ് തോമസ് മിഷൻ എൽ.പി സ്‌കൂൾ വിദ്യാർത്ഥിനിയാണ്.

ഇന്നലെ വൈകിട്ട് സ്‌കൂൾ വിട്ട് വീട്ടിലേക്ക് പോകവെയാണ് അപകടമുണ്ടായത്. ബസിൽ നിന്ന് ഇറങ്ങി കുട്ടി റോഡ് മുറിച്ചുകടക്കവേ, അതേ ബസ് തന്നെ ഇടിക്കുകയായിരുന്നു. തുടർന്ന് അതീവ ഗുരുതരാവസ്ഥയിൽ ആലത്തൂരും പാലക്കാടും ശേഷം കോയമ്പത്തൂരിലെ ആശുപത്രിയിലും എത്തിച്ചെങ്കിലും രാത്രി 12-ഓടെ മരിക്കുകയായിരുന്നു.