കൊല്ലം- കരുനാഗപ്പള്ളിയില്‍ നിന്നു കാണാതായ സ്ത്രീയെ അമ്പലപ്പുഴയില്‍ കൊന്ന് കുഴിച്ചുമൂടി കോണ്‍ക്രീറ്റ് ചെയ്തു. കരുനാഗപ്പള്ളി സ്വദേശി വിജയലക്ഷ്മി(48)യാണ് ദൃശ്യം മോഡൽ സിനിമയിൽ കൊല്ലപ്പെടുത്തിയത്. കഴിഞ്ഞ ആറാം തീയതി മുതലാണ് ഇവരെ കാണാതായത്. വിജയലക്ഷ്മിയുമായി അടുപ്പമുണ്ടായിരുന്ന അമ്പലപ്പുഴ കാരൂര്‍ ജയചന്ദ്രനാണ് ക്രൂരമായ കൊലപാതകം നടത്തിയത്. കൊല നടത്തിയ ശേഷം ജയലക്ഷ്മിയുടെ മൊബൈൽ കെ.എസ്.ആർ.ടി.സി ബസിൽ ഉപേക്ഷിക്കുകയായിരുന്നു. മൊബൈൽ പിന്നീട് ബസ് ഡ്രൈവർ പോലീസിന് കൈമാറിയതോടെയാണ് കൊലപാതകത്തിൽ തുമ്പുണ്ടായത്. എറണാകുളത്തുനിന്ന് കണ്ണൂരിലേക്ക് പോകുന്ന കെ.എസ്.ആർ.ടി.സി ബസിലാണ് മൊബൈൽ ഉപേക്ഷിച്ചത്.
പ്ലയര്‍ കൊണ്ട് തലയ്ക്കടിച്ചാണ് വിജയലക്ഷ്മിയെ കൊലപ്പെടുത്തിയതെന്ന് ഇയാൾ പോലീസിനോട് സമ്മതിച്ചു. കൊലപ്പെടുത്തിയ ശേഷം നിര്‍മ്മാണം നടക്കുന്ന വീട്ടില്‍ മൃതദേഹം കുഴിച്ചിട്ട് കോൺക്രീറ്റ് ചെയ്യുകയായിരുന്നു. വിജയലക്ഷ്മിയെ കാണാനില്ലെന്ന ബന്ധുക്കളുടെ പരാതിയെ തുടര്‍ന്ന് നടത്തിയ അന്വേഷണത്തിലാണ് കൊലപാതക വിവരം പുറത്തറിയുന്നത്. നവംബര്‍ ഏഴിന് രാത്രിയാണ് വിജയലക്ഷ്മി കൊലചെയ്യപ്പെട്ടത്. പതിമൂന്നിനാണ് ഇവരെ കാണാനില്ലെന്ന പരാതി പോലീസിന് ലഭിച്ചത്. വിജയലക്ഷ്മിയുടെ സ്കൂട്ടർ പോലീസ് കണ്ടെത്തി.
മൃതദേഹം പുറത്തെടുക്കുന്ന നടപടി പോലീസ് തുടങ്ങി. ഭർത്താവുമായി അകന്നുകഴിയുകയായിരുന്ന വിജയലക്ഷ്മിയുമായി ജയചന്ദ്രൻ അടുപ്പത്തിലായിരുന്നു. കേരള പോലീസ് സമർത്ഥമായാണ് കേസ് അന്വേഷിച്ചത്.