മുംബൈ: അധോലോക നായകന്‍ ലോറന്‍സ് ബിഷ്‌ണോയിയെ പോലെ സൗന്ദര്യം ഉള്ള ഒരൊറ്റ നടനും ഇന്ത്യയില്‍ ഇല്ലെന്ന് ബോളിവുഡ് സംവിധായകന്‍ രാംഗോപാല്‍ വര്‍മ. ലോറന്‍സ് ബിഷ്‌ണോയിയെ കുറിച്ച്
സിനിമയെടുക്കാന്‍ തയ്യാറെടുത്തിരിക്കുകയാണ് രാംഗോപാല്‍ വര്‍മ. ഇതിനിടെയാണ് ലോറന്‍സ് ബിഷ്‌ണോയിയെ പ്രകീര്‍ത്തിച്ച് രാംഗോപാല്‍വര്‍മ സോഷ്യല്‍ മീഡിയിയില്‍ എത്തിയിരിക്കുന്നത്.
ലോറന്‍സ് ബിഷ്‌ണോയിക്ക് നടന്‍ സല്‍മാന്‍ ഖാനോട് തോന്നിയ പകയേക്കുറിച്ച് രാംഗോപാല്‍ വര്‍മ കഴിഞ്ഞദിവസം എക്‌സില്‍ പോസ്റ്റ് ചെയ്തിരുന്നു. ഇതിനുപിന്നാലെയാണ് ബിഷ്‌ണോയിയുടെ സൗന്ദര്യത്തേക്കുറിച്ച് അദ്ദേഹം പുകഴ്ത്തിയിരിക്കുന്നത്. ‘ഏറ്റവും വലിയ അധോലോകനായകനെക്കുറിച്ച് ഒരു സിനിമ ചെയ്യുകയാണെങ്കില്‍ ഒരു സംവിധായകനും ദാവൂദ് ഇബ്രാഹിമിനെപ്പോലെയോ ഛോട്ടാ രാജനെപ്പോലെയോ രൂപമുള്ള ഒരാളെ നായകനാക്കില്ല. പക്ഷേ ഇവിടെ നോക്കൂ, ബിഷ്‌ണോയിയേക്കാള്‍ സൗന്ദര്യമുള്ള ഒറ്റ സിനിമാ നടനെ എനിക്ക് ഓര്‍മവരുന്നില്ല.’ വര്‍മയുടെ വാക്കുകള്‍.
സംവിധായകന്റെ പോസ്റ്റ് വന്നതിനുപിന്നാലെ നിരവധി പ്രതികരണങ്ങളാണ് എത്തിയത്. സല്‍മാന്‍ ഖാനെ ലോറന്‍സ് ബിഷ്‌ണോയിയായി അഭിനയിപ്പിച്ചാല്‍ അതൊരു വലിയ വിരോധാഭാസമാവുമെന്നാണ് ഒരാളുടെ പ്രതികരണം. ആര്‍.ജി.വി അദ്ദേഹത്തിന്റെ പുതിയ പ്രണയം കണ്ടെത്തി എന്നായിരുന്നു സ്‌മൈലിങ് ഇമോജിയോടെയുള്ള മറ്റൊരു കമന്റ്. സംവിധായകന്റെ കണ്ടെത്തല്‍ ഇങ്ങനെയാണെങ്കില്‍ ബിഷ്‌ണോയിയെ അവതരിപ്പിക്കാന്‍ അയാളെത്തന്നെ ഏല്‍പിച്ചാല്‍ പോരെയെന്നായിരുന്നു രസകരമായ മറ്റൊരു കമന്റ്.
കഴിഞ്ഞദിവസവും രാംഗോപാല്‍ വര്‍മ ലോറന്‍സ് ബിഷ്‌ണോയിയേക്കുറിച്ച് എഴുതിയിരുന്നു. 1998-ല്‍ ഹം സാഥ് സാഥ് ഹേ എന്ന ചിത്രത്തിന്റെ സെറ്റില്‍വെച്ചാണ് സല്‍മാന്‍ ഖാന്‍ കൃഷ്ണമൃഗത്തെ വെടിവെച്ചുകൊല്ലുന്നത്. അന്ന് ലോറന്‍സ് ബിഷ്‌ണോയിക്ക് അഞ്ചുവയസേ ഉണ്ടായിരുന്നുള്ളൂ എന്ന് രാംഗോപാല്‍ വര്‍മ പറഞ്ഞു. 25 വര്‍ഷമായി ബിഷ്‌ണോയി തന്റെ പക ഉള്ളില്‍ക്കൊണ്ടുനടക്കുന്നു. കൃഷ്ണമൃഗത്തിനെ കൊന്നതിന് പ്രതികാരമായി സല്‍മാന്‍ ഖാനെ കൊലപ്പെടുത്തുക എന്നതാണ് തന്റെ ജീവിതലക്ഷ്യമെന്ന് അവന്‍ പറയുന്നു. ഈ മൃഗസ്‌നേഹം അതിന്റെ ഉച്ചസ്ഥായിയിലാണോ അതോ ദൈവം ഒരു വിചിത്രമായ തമാശ കളിക്കുകയാണോ എന്നും രാംഗോപാല്‍ വര്‍മ ചോദിച്ചിരുന്നു.