ജിദ്ദ- അടുത്തുതന്നെ നടക്കാനിരിക്കുന്ന പഞ്ചായത്ത് തിരഞ്ഞെടുപ്പിനെ ഒറ്റക്കെട്ടായി നേരിടാൻ പ്രവർത്തകരെ സജ്ജമാക്കുന്നതിന്റെ ഭാഗമായി ജിദ്ദ പെരിന്തൽമണ്ണ മണ്ഡലം കെ.എം.സി.സി കമ്മിറ്റി നെക്സസ് – 2024 എന്ന പേരിൽ ഏകദിന ലീഡേഴ്സ് ക്യാമ്പ് സംഘടിപ്പിച്ചു. അനാകിഷ് സീസൺസ് റസ്റ്റോറന്റ് ഓഡിറ്റോറിയത്തിൽ നടന്ന പരിപാടി വെട്ടത്തൂർ മുഹമ്മദലി മുസ്ലിയാരുടെ അധ്യക്ഷതയിൽ ജിദ്ദ കെ.എം.സി.സി സെൻട്രൽ കമ്മിറ്റി പ്രസിഡണ്ട് അബൂബക്കർ അരിമ്പ്ര ഉദ്ഘാടനം ചെയ്തു.
ക്യാമ്പ് ഡയറക്ടർ അബു കട്ടുപ്പാറയുടെ നേതൃത്വത്തിൽ മേലാറ്റൂർ, വെട്ടത്തൂർ, താഴെക്കോട്, ആലിപ്പറമ്പ്, പുലാമന്തോൾ, ഏലംകുളം എന്നീ പഞ്ചായത്തുകളിൽ നിന്നും പെരിന്തൽമണ്ണ മുനിസിപ്പാലിറ്റിയിൽ നിന്നുമായി 130 ഓളം പേരാണ് ക്യാമ്പിനായി രജിസ്റ്റർ ചെയ്തത്. സംഘടനാ പാടവം എന്ന വിഷയത്തിൽ പ്രവാസിലീഗ് സംസ്ഥാന പ്രസിഡണ്ട് ഹനീഫ മൂന്നിയൂർ ക്ലാസ് എടുത്തു. പെരിന്തൽമണ്ണ മണ്ഡലം എംഎൽഎ നജീബ് കാന്തപുരം മുഖ്യപ്രഭാഷണം നടത്തി.
ഈയിടെ അന്തരിച്ച കെഎംസിസി സ്ഥാപക നേതാക്കളിൽ പ്രമുഖനായ എൻ മുഹമ്മദ് സാഹിബിന് വേണ്ടിയുള്ള പ്രാർത്ഥനക്ക് റഫീഖ് കട്ടുപ്പാറ നേതൃത്വംനൽകി. ഇക്ബാൽ മേലാറ്റൂർ ഹുസൈൻ കരിങ്കറ അഷ്റഫ് താഴെക്കോട് എന്നിവർ പ്രസംഗിച്ചുഷാഹുൽ ഹമീദ് അമ്മിനിക്കാട് സ്വാഗതവും മുഹമ്മദ് മണി പെരിന്തൽമണ്ണ നന്ദിയും പറഞ്ഞു.