ജിദ്ദ – ഡിവോഴ്‌സ് (വിവാഹ മോചനം) എന്ന പേരില്‍ പുതിയ അത്തര്‍ (സ്‌പ്രേ) പുറത്തിറക്കി യു.എ.ഇ വൈസ് പ്രസിഡന്റും പ്രധാനമന്ത്രിയും ദുബായ് ഭരണാധികാരിയുമായ ശൈഖ് മുഹമ്മദ് ബിന്‍ റാശിദ് അല്‍മക്തൂമിന്റെ പുത്രി ശൈഖ മഹ്‌റ അല്‍മക്തൂം.
തന്റെ ഔദ്യോഗിക ഇന്‍സ്റ്റഗ്രാ പേജിലൂടെ ഒരുകൂട്ടം പോസ്റ്റുകള്‍ പങ്കിട്ടാണ് ശൈഖ മഹ്‌റ പുതിയ പെര്‍ഫ്യൂം അവതരിപ്പിച്ചത്. കറുത്ത ചായം പൂശിയ കുപ്പിയില്‍ വെള്ള നിറത്തിലാണ് ഡിവോഴ്‌സ് എന്ന പേര് മുദ്രണം ചെയ്തിരിക്കുന്നത്.
ദുബായ് രാജകുടുംബാംഗമായ ശൈഖ് മാനിഅ് ബിന്‍ മുഹമ്മദ് അല്‍മക്തൂമുമായുള്ള വിവാഹബന്ധം വേര്‍പ്പെടുത്തിയതായി കഴിഞ്ഞ ജൂലൈ 17 ന് ആണ് 26 കാരിയായ ശൈഖ മഹ്‌റ അറിയിച്ചത്. കഴിഞ്ഞ വര്‍ഷം ജൂണിലാണ് ദുബായ് വേള്‍ഡ് സെന്ററിലെ സഈദ് ഹാളില്‍ വെച്ച് ശൈഖ മഹ്‌റയുടെയും ശൈഖ് മാനിഅ് അല്‍മക്തൂമിന്റെയും വിവാഹം നടന്നത്. ശൈഖ മഹ്‌റ ബ്രിട്ടീഷ് യൂനിവേഴ്‌സിറ്റിയില്‍ നിന്ന് ഇന്റര്‍നാഷണല്‍ റിലേഷന്‍സില്‍ ബിരുദം നേടിയിട്ടുണ്ട്. ഗ്രീക്കുകാരിയായ സിയോ ഗ്രിഗ്രോയാക്കോസ് ആണ് ശൈഖ മഹ്‌റയുടെ മാതാവ്.