ജിദ്ദ – സാമ്പത്തിക വൈവിധ്യവല്ക്കരണത്തിനുള്ള വിഷന് 2030 ന്റെ ഭാഗമായി നിര്ണയിച്ച ലക്ഷ്യങ്ങളില് 87 ശതമാനവും ഇതിനകം നടപ്പാക്കി കഴിയുകയോ പൂര്ത്തിയാക്കാന് പോവുകയോ ആണെന്ന് നിക്ഷേപ മന്ത്രി എന്ജിനീയര് ഖാലിദ് അല്ഫാലിഹ് പറഞ്ഞു. ഇറ്റലിയില് അംബ്രോസെറ്റി സെര്നോബിയോ ഫോറത്തോടനുബന്ധിച്ച് സി.എന്.ബി.സി ചാനലിന് നല്കിയ പ്രത്യേക അഭിമുഖത്തില് സംസാരിക്കുകയായിരുന്നു നിക്ഷേപ മന്ത്രി. വിഷന് 2030 ന് സമാരംഭം കുറിച്ച് എട്ടു വര്ഷം പിന്നിടുമ്പോള് സൗദി അറേബ്യ അത് നടപ്പാക്കാന് കൂടുതല് പ്രതിജ്ഞാബദ്ധതയും നിശ്ചയദാര്ഢ്യവും കൈവരിച്ചിരിക്കുന്നു.
വിഷന് 2030 നെയും അത് മുന്നോട്ടുവെച്ച അഭിലാഷങ്ങളെയും അതിന്റെ സമഗ്രതയെയും വ്യാപ്തിയെയും സംശയിക്കുന്ന നിരവധി പേരുണ്ടായിരുന്നു. പതിറ്റാണ്ടുകളായി എണ്ണയെ ആശ്രയിക്കുന്ന സൗദി അറേബ്യ പോലുള്ള ഒരു രാജ്യത്തിന് വിഷന് 2030 നുള്ളില് അത് ആഗ്രഹിക്കുന്നത് ചെയ്യാന് കഴിയുമോയെന്ന കാര്യത്തില് പലര്ക്കും സംശയമുണ്ടായിരുന്നു.
നിക്ഷേപ ധനവിനിയോഗ മുന്ഗണനകള് പുനര്നിര്ണയിക്കാനുള്ള സൗദി അറേബ്യയുടെ നീക്കത്തെ പിന്തുണക്കുന്നതായി കഴിഞ്ഞയാഴ്ച ഐ.എം.എഫ് പറഞ്ഞു. അടുത്ത കൊല്ലം സൗദി അറേബ്യ 4.7 ശതമാനം സാമ്പത്തിക വളര്ച്ച കൈവരിക്കുമെന്ന പ്രതീക്ഷ ഐ.എം.എഫ് നിലനിര്ത്തി. രാജ്യത്തിന്റെ അഭൂതപൂര്വമായ സാമ്പത്തിക പരിവര്ത്തനത്തില് വമ്പിച്ച പുരോഗതിക്ക് ചാലകശക്തിയായി വര്ത്തിക്കുന്ന എണ്ണയിതര മേഖലകളുടെ വളര്ച്ചയെ അന്താരാഷ്ട്ര നാണയനിധി പ്രശംസിച്ചു. ഈ വര്ഷം രണ്ടാം പാദത്തില് പെട്രോളിതര മേഖല 4.9 ശതമാനം വളര്ച്ച രേഖപ്പെടുത്തിയതായും നിക്ഷേപ മന്ത്രി പറഞ്ഞു.