തിരുവനന്തപുരം: ഉമ്മൻചാണ്ടി സർക്കാരിന്റെ കാലത്ത് നിയമസഭയിൽ സ്പീക്കറുടെ കസേര മറിച്ചിട്ടതിൽ കുറ്റസമ്മതവുമായി മുൻ മന്ത്രിയും തവനൂർ എം.എൽ.എയുമായ ഡോ. കെ.ടി ജലീൽ. അധ്യാപക ദിനത്തിന്റെ ഭാഗമായുള്ള കെ.ടി ജലീലിന്റെ ഫേസ്ബുക്ക് പോസ്റ്റിലെ ഒരു കമന്റിന് മറുപടിയായാണ് എം.എൽ.എയുടെ പ്രതികരണം.
‘ഞാൻ ആ കസേരയിൽ തൊടാൻ പാടില്ലായിരുന്നു. അതൊരു അബദ്ധമായിപ്പോയി. മനുഷ്യനല്ലെ…വികാരത്തള്ളിച്ചയിൽ സംഭവിച്ച കൈപ്പിഴ’എന്നാണ് ജലീൽ കുറിച്ചത്. ബാർ കോഴ വിവാദത്തിൽ ആരോപണവിധേയനായ മന്ത്രി കെ.എം മാണി ബജറ്റ് അവതരിപ്പിച്ചതുമായി ബന്ധപ്പെട്ടുണ്ടായ നിയമസഭയിലെ കയ്യാങ്കളിക്കിടെയാണ് സി.പി.എം നേതാവും മുൻ മന്ത്രിയുമായ ഇ.പി ജയരാജനോടും സംഘത്തോടുമൊപ്പം ജലീൽ സ്പീക്കറുടെ കസേര മറിച്ചിട്ടത്.
ധനമന്ത്രിയായിരുന്ന കെ.എം മാണിയുടെ ബജറ്റ് അവതരണം തടയാൻ ഇടതുപക്ഷവും മാണിക്ക് സംരക്ഷണമൊരുക്കാൻ ഭരണപക്ഷവും രംഗത്തുവന്നതോടെ നിയമസഭയിൽ പ്രക്ഷുബ്ധമായ രംഗങ്ങളാണുണ്ടായത്. ഇതിനിടെ സ്പീക്കറുടെ ഡയസിലെത്തിയ ഇടതുപക്ഷാംഗങ്ങൾ മൈക്ക് അടക്കമുള്ളവ നശിപ്പിക്കുകയും കസേര താഴേക്ക് വലിച്ചിടുകയും ചെയ്തിരുന്നു. ഇതിന്റെ കേസ് നടപടികൾ തുടരുന്നതിനിടെയാണ് ജലീലിന്റെ കുറ്റസമ്മതം.
അതിനിടെ, ജലീലിന്റെ കുറ്റസമ്മതത്തെ കോൺഗ്രസ് നേതാവ് വി.ടി ബൽറാം സ്വാഗതം ചെയ്തു. മറ്റുള്ള ഇടത് എം.എൽ.എമാരും നിലപാട് വ്യക്തമാക്കണമെന്ന് വി.ടി ബൽറാം ആവശ്യപ്പെട്ടു. സമാനമായ ഒരു തിരിച്ചറിവ് ഉത്തരവാദപ്പെട്ട മറ്റ് സ്ഥാനങ്ങളിലിരിക്കുന്നവർക്കും തോന്നിയാൽ അതെത്ര നന്നായേനെ! ഏതായാലും ശിവൻകുട്ടിയിൽ നിന്നും ജയരാജനിൽ നിന്നുമൊന്നും കേരളം അതൊരു കാലത്തും പ്രതീക്ഷിക്കുന്നില്ല. ബുദ്ധിജീവിയും അക്കാദമീഷ്യനുമായ ഡോ. തോമസ് ഐസക്കെങ്കിലും നിയമസഭയിലെ സ്വന്തം അഴിഞ്ഞാട്ടത്തെ തള്ളിപ്പറയാൻ തയ്യാറാവുമോ എന്നാണ് അറിയേണ്ടതെന്നും അദ്ദേഹം ഫേസ്ബുക്കിൽ കുറിച്ചു.