റിയാദ് – വയനാട്, കോഴിക്കോട് ജില്ലകളില്‍ സംഭവിച്ച പ്രകൃതി ദുരന്തങ്ങളില്‍ യാതനയനുഭവിക്കുന്നവര്‍ക്ക് ആശ്വാസമായി റിയാദിലെ കോഴിക്കോട് നിവാസികളുടെ കൂട്ടായ്മയായ ‘കോഴിക്കോടന്‍സ്’ ആദ്യഘട്ടമായി മുപ്പത് ലക്ഷം രൂപയുടെ പുനരധിവാസ പ്രവര്‍ത്തനങ്ങള്‍ നടത്തുമെന്ന് ഭാരവാഹികള്‍ വാര്‍ത്താസമ്മേളനത്തില്‍ അറിയിച്ചു. ദുരന്തബാധിത പ്രദേശങ്ങള്‍ സന്ദര്‍ശിച്ച സംഘടന പ്രതിനിധികളുടെ പ്രാഥമിക റിപ്പോര്‍ട്ടിന്റെ അടിസ്ഥാനത്തില്‍ കോഴിക്കോട് ജില്ലയിലെ ദുരന്ത ബാധിത മേഖലയായ വിലങ്ങാട് പ്രദേശത്തിനാണ് മുന്‍ഗണന നല്‍കുന്നത്.
വാര്‍ത്താമാധ്യമങ്ങളില്‍ കൂടി നാമറിഞ്ഞതിനേക്കാള്‍ എത്രയോ ഭീതിതവും അതിദാരുണവും മനഃസാക്ഷിയെ ഞെട്ടിക്കുന്നതുമാണ് അവിടങ്ങളില്‍ സംഭവിച്ചതെന്ന് ദുരന്ത ബാധിത പ്രദേശങ്ങള്‍ സന്ദര്‍ശിച്ചപ്പോള്‍ ബോധ്യപ്പെട്ടതായി പ്രതിനിധികള്‍ പറഞ്ഞിട്ടുണ്ട്.
ഇരു പ്രദേശങ്ങളിലെയും ദുരിതബാധിതരെയും കുടുംബങ്ങളെയും ദുരിതാശ്വാസ ക്യാമ്പുകളും സന്ദര്‍ശിച്ച സംഘം വിവിധ സന്നദ്ധ, രാഷ്ട്രീയ, മത, സാംസ്‌കാരിക പ്രവര്‍ത്തകരുമായും പള്ളി ഭാരവാഹികളുമായും കൂടിക്കാഴ്ച നടത്തി. ചീഫ് ഓര്‍ഗനൈസര്‍ റാഫി കൊയിലാണ്ടി, എക്‌സിക്യൂട്ടീവ് അംഗങ്ങളായ മുനീബ് പാഴൂര്‍, ഉമ്മര്‍ മുക്കം, ഫാസില്‍ വേങ്ങാട്ട്, നവാസ് ഓപ്പീസ് എന്നിവരായിരുന്നു സംഘത്തിലുണ്ടായിരുന്നത്.
ദുരിതാശ്വാസ ഫണ്ട് ശേഖരണ ഉദ്ഘാടനം സിറ്റിഫ്‌ളവര്‍ എം ഡി അഹ്മദ് കോയ നിര്‍വഹിച്ചു. പദ്ധതി നടത്തിപ്പിനുള്ള രൂപരേഖ തയ്യാറാക്കുന്നതിനായി ഫിനാന്‍സ് ലീഡ് ഫൈസല്‍ പൂനൂരിന്റെ നേതൃത്വത്തില്‍ കമ്മറ്റി രൂപീകരിച്ചു. റാഫി കൊയിലാണ്ടി, വി.കെ,കെ. അബ്ബാസ്, കബീര്‍ നല്ലളം, സഹീര്‍ മുഹ്‌യുദ്ദീന്‍, ഹസന്‍ ഹര്‍ഷദ് ഫറോക്ക്, റാഷിദ് ദയ, കെ.സി. ഷാജു, ഉമ്മര്‍ മുക്കം, മുനീബ് പാഴുര്‍, അഷ്‌റഫ് വേങ്ങാട്ട്, ഷക്കീബ് കൊളക്കാടന്‍, നാസര്‍ കാരന്തൂര്‍, മിര്‍ഷാദ് ബക്കര്‍, ഫൈസല്‍ ബിന്‍ അഹ്മദ്, മുഹമ്മദ് ഷഹീന്‍, ഫാസില്‍ വേങ്ങാട്ട്, പികെ. റംഷിദ്, റിജോഷ് കടലുണ്ടി, അബ്ദുസ്സലാം ഒറ്റക്കണ്ടത്തില്‍, സി.ടി. സഫറുള്ള എന്നിവരാണ് മറ്റു അംഗങ്ങള്‍.
കോഴിക്കോട് ജില്ലയിലെ കട്ടിപ്പാറ, ചമല്‍, കോളിക്കല്‍ പ്രദേശങ്ങളിലെ വെള്ളപ്പൊക്ക ദുരിതാശ്വാസ ക്യാമ്പുകളില്‍ അടിയന്തര സഹായമായി 250 പേര്‍ക്കുള്ള ഭക്ഷണവും ക്യാമ്പ് കഴിഞ് വീട്ടിലേക്ക് തിരിച്ചുപോകുന്നവര്‍ക്ക് ഭക്ഷണ സാധന കിറ്റും നേരത്തെ കോഴിക്കോടന്‍സ് വിതരണം ചെയ്തിരുന്നു. കട്ടിപ്പാറ പഞ്ചായത്ത് വക കോഴിക്കോടന്‍സിനുള്ള സ്‌നേഹാദര മൊമെന്റോ പഞ്ചായത്ത് പരിസരത്ത് നടന്ന ചടങ്ങില്‍ എക്‌സിക്യൂട്ടീവ് മെമ്പര്‍ നവാസ് ഓപ്പീസ് ഏറ്റുവാങ്ങി.
റിയാദ് മീഡിയ ഫോറം ഹാളില്‍ നടന്ന വാര്‍ത്താസമ്മേളനത്തില്‍ കോഴിക്കോടന്‍സ് ചീഫ് ഓര്‍ഗനൈസര്‍ റാഫി കൊയിലാണ്ടി, ഫിനാന്‍സ് ലീഡ് ഫൈസല്‍ പൂനൂര്‍, വെല്‍ഫെയര്‍ ലീഡ് റാഷിദ് ദയ, മുന്‍ ചീഫ് ഓര്‍ഗനൈസര്‍ സഹീര്‍ മുഹ്‌യുദ്ധീന്‍, ഫൗണ്ടര്‍മെമ്പര്‍ മുനീബ് പാഴൂര്‍ എന്നിവര്‍ പങ്കെടുത്തു.