ക്യാംപ് നൗ: സ്പാനിഷ് ലീഗില്‍ ബാഴ്‌സലോണയ്ക്ക് വമ്പന്‍ ജയം. റയല്‍ വലാഡോളിഡിനെതിരേയാണ് കറ്റാലന്‍സിന്റെ ജയം. എതിരില്ലാത്ത ഏഴ് ഗോളിനാണ് ബാഴ്‌സ ജയിച്ചത്. റഫീനയുടെ ഹാട്രിക്കാണ് മല്‍സരത്തിന്റെ ഹൈലൈറ്റ്.20, 64, 72 മിനിറ്റുകളിലാണ് റഫീനയുടെ ഗോളുകള്‍. റോബര്‍ട്ടോ ലെവന്‍ഡോസ്‌കി(24), കൗണ്ടെ(45), ഡാനി ഓല്‍മോ(82), ഫെറാന്‍ ടോറസ് (85) എന്നിവരാണ് ബാഴ്‌സയ്ക്കായി സ്‌കോര്‍ ചെയ്ത മറ്റ് താരങ്ങള്‍.
ടീനേജ് താരം ലാമിന്‍ യാമല്‍ രണ്ട് ഗോളുകള്‍ക്ക് അസിസ്‌റ്റൊരുക്കി. റോബര്‍ട്ടോ ലെവന്‍ഡോസ്‌കി, ഫെറാന്‍ ടോറസ്, റഫീന എന്നിവരും ഗോളുകള്‍ക്ക് അസിസ്റ്റ് ഒരുക്കി. ലീഗിലെ ആദ്യ നാല് മല്‍സരങ്ങളും ജയിച്ച് ബാഴ്‌സ ഒന്നാം സ്ഥാനത്താണുള്ളത്.
മറ്റ് മല്‍സരങ്ങളില്‍ അത്‌ലറ്റിക്ക് ക്ലബ്ബിനെ അത്‌ലറ്റിക്കോ മാഡ്രിഡ് എതിരില്ലാത്ത ഒരു ഗോളിന് പരാജയപ്പെടുത്തി. റയോ വാല്‍ക്കാനോയെ എസ്പാനിയോള്‍ 2-1നും വീഴ്ത്തി. മയ്യോര്‍ക്ക ലെഗനീസിനെ എതിരില്ലാത്ത ഒരു ഗോളിനും പരാജയപ്പെടുത്തി. വലന്‍സിയ-വിയ്യാറയല്‍ മല്‍സരം 1-1 സമനിലയില്‍ കലാശിച്ചു. ഇന്ന് അര്‍ദ്ധരാത്രി നടക്കുന്ന മല്‍സരത്തില്‍ റയല്‍ മാഡ്രിഡ് റയല്‍ ബെറ്റിസിനെ നേരിടും.