ന്യൂദല്‍ഹി- ഇന്ത്യയിലുടനീളം പേപ്പർ ചോർച്ചയാണ് നടക്കുന്നതെന്നും കോൺഗ്രസ് നേതാവ് രാഹുൽ ഗാന്ധി ആരോപിച്ചു. റഷ്യ – ഉക്രൈന്‍ യുദ്ധം മോഡി അവസാനിപ്പിച്ചുവെന്നാണ് അവകാശവാദം ഉന്നയിക്കുന്നത്. എന്നാല്‍ പേപ്പര്‍ ലീക്ക് തടയാന്‍ മോഡിക്ക് സാധിക്കുന്നില്ല. പരീക്ഷയിലെ ചോദ്യ പേപ്പര്‍ ചോര്‍ച്ച തടയാന്‍ സര്‍ക്കാര്‍ ആഗ്രഹിക്കുന്നില്ലെന്നും രാഹുല്‍ ഗാന്ധി പറഞ്ഞു. രാജ്യത്തെ വിദ്യഭ്യാസ സമ്പ്രദായം ഒരു സംഘടന കൈക്കലാക്കിയത് കൊണ്ടാണ് പേപ്പര്‍ ലീക്ക് ഉണ്ടായതെന്നും രാഹുല്‍ ഗാന്ധി ആരോപിച്ചു.
ചോദ്യപേപ്പർ ചോർച്ച ദേശവിരുദ്ധ പ്രവർത്തനമാണ്. രാജ്യത്തെ യുവാക്കളെയാണ് ഇത് വളരെയധികം വേദനിപ്പിക്കുന്നത്. എല്ലാ സർവ്വകലാശാലകളെയും അവയുടെ വൈസ് ചാൻസലർമാരെയും ബി.ജെ.പിയും അതിൻ്റെ മാതൃസംഘടനയും പിടികൂടിയിരിക്കുന്നു. വിദ്യാഭ്യാസ സ്ഥാപനങ്ങളിൽ അവർ കടന്നുകയറി നശിപ്പിച്ചു. ഈ പിടിച്ചെടുക്കൽ മാറ്റാൻ കഴിയാത്തിടത്തോളം പേപ്പർ ചോർച്ച തുടരും- രാഹുൽ ഗാന്ധി പറഞ്ഞു.
ബിജെപി ഭരിക്കുന്ന സംസ്ഥാനങ്ങളാണ് ചോദ്യപേപ്പർ ചോർച്ചയുടെ പ്രഭവകേന്ദ്രം. വ്യാപം മോഡൽ അഴിമതി രാജ്യത്തുടനീളം വ്യാപിക്കുകയാണ്.
വ്യാപം നടന്നത് മധ്യപ്രദേശിലാണ്. ഇപ്പോൾ സർക്കാർ അത് രാജ്യത്തുടനീളം പ്രചരിപ്പിക്കുകയാണ്. പേപ്പർ ചോർച്ച തടയാൻ സർക്കാരിന് താൽപര്യമില്ലാത്തതിനാൽ വിദ്യാർഥികൾ ദുരിതമനുഭവിക്കുകയാണ്.
നീറ്റ് ഫലം പ്രഖ്യാപിച്ച ജൂൺ 4 മുതൽ രാജ്യത്തുടനീളം പ്രതിപക്ഷം പ്രതിഷേധം ശക്തമാക്കിയിരുന്നു. ഒന്നിലധികം വിദ്യാർത്ഥികൾ അഭൂതപൂർവമായ മുഴുവൻ മാർക്ക് നേടുകയും 1,500 ഓളം വിദ്യാർത്ഥികൾക്ക് ഗ്രേസ് മാർക്ക് ലഭിക്കുകയും ചെയ്തു.
പരീക്ഷയുടെ തലേദിവസം രാത്രി പേപ്പറുകൾ ചോർന്നതായി അറസ്റ്റിലായ നാല് പേർ സമ്മതിച്ചതിനെത്തുടർന്ന്, യുജിസി-നെറ്റ് പരീക്ഷ സർക്കാർ റദ്ദാക്കി. നീറ്റ് പരീക്ഷയിൽ പേപ്പർ ചോർച്ചയുണ്ടാകാനുള്ള സാധ്യത കേന്ദ്ര വിദ്യാഭ്യാസ മന്ത്രി ധർമേന്ദ്ര പ്രധാൻ നേരത്തെ തള്ളിയിരുന്നു.