കോൺഗ്രസ് എം.എൽ.എമാരുടെ സംഘം അമേഠിയിൽ; പ്രതീക്ഷിച്ചതിലും മികച്ച മുന്നേറ്റമുണ്ടാക്കുമെന്ന് ഷാഫി പറമ്പിൽ

അമേഠി – ഉത്തരേന്ത്യയിൽ തെരഞ്ഞെടുപ്പ് പ്രചാരണത്തിന് എത്തിയ കേരളത്തിൽ നിന്നുള്ള കോൺഗ്രസ് എം.എൽ.എമാരുടെ സംഘം അമേഠിയിൽ കോൺഗ്രസ് നേതാവ് രാഹുൽ ഗാന്ധിയെ കണ്ടു ചർച്ച നടത്തി.
പാലക്കാട് എം.എൽ.എയും വടകര ലോകസഭാ മണ്ഡലം യു.ഡി.എഫ് സ്ഥാനാർത്ഥിയുമായ ഷാഫി പറമ്പിൽ, വണ്ടൂർ എംഎൽഎയും മുൻ മന്ത്രിയുമായ എ.പി അനിൽ കുമാർ, കൽപ്പറ്റ എം.എൽ.എയും കെ.പി.സി.സി വൈസ് പ്രസിഡന്റുമായ അഡ്വ. ടി സിദ്ദിഖ്, ബത്തേരി എം.എൽ.എ ഐ.സി ബാലകൃഷ്ണൻ എന്നിവരാണ് സംഘത്തിൽ ഉള്ളത്.
ഇതിൽ ഷാഫി ഒഴികെ മറ്റുള്ളവർ വയനാട് ലോക്‌സഭാ മണ്ഡലത്തിൽ നിന്നുള്ളവരാണ്. രാഹുൽ ഗാന്ധി മത്സരിക്കുന്ന യു.പിയിലെ റായ്ബറേലി മണ്ഡലത്തിലും സംഘം പ്രചാരണത്തിന് എത്തി.
മൂന്നുദിവസം മുമ്പ് ഡൽഹിയിലെത്തിയ യൂത്ത് കോൺഗ്രസ് മുൻ സംസ്ഥാന പ്രസിഡന്റ് കൂടിയായ ഷാഫി പറമ്പിൽ നോർത്ത് ഈസ്റ്റ് ഡൽഹി മണ്ഡലത്തിലെ കോൺഗ്രസ്-എ.എ.പി സ്ഥാനാർത്ഥി കന്നയ്യ കുമാറിന് വേണ്ടിയും പ്രചാരണത്തിന് ഇറങ്ങി. പാർട്ടിക്കും ഇന്ത്യാ മുന്നണിക്കും പ്രതീക്ഷിച്ചതിലും മികച്ച മുന്നേറ്റമുണ്ടാക്കാനാവുമെന്നാണ് നേതാക്കളുടെ വിലയിരുത്തലെന്ന് ഷാഫി പറമ്പിൽ പ്രതികരിച്ചു.