മനാമ– ഗള്ഫ് ഉള്ക്കടലില് വെച്ച് അമേരിക്കയുടെ എഫ്-16 യുദ്ധവിമാനത്തിന് നേരെ ആക്രമണം നടത്തിയെന്ന ഇറാന്റെ അവകാശവാദം യു.എസ് സെന്ട്രല് കമാന്ഡ് (സെന്റ്കോം) നിഷേധിച്ചു. ആക്രമണത്തില് വിമാനത്തിന് തകരാര് സംഭവിച്ചതായും തുടര്ന്ന് വിമാനം അടിയന്തരമായി നിലത്തിറക്കേണ്ടി വന്നതായും ഇറാന് റെവല്യൂഷണറി ഗാര്ഡ് അവകാശപ്പെട്ടിരുന്നു. എന്നാല്, ഇറാന് ഒരു യു.എസ് യുദ്ധവിമാനത്തെയും ആക്രമിച്ചിട്ടില്ലെന്നും മിഡില് ഈസ്റ്റിലുള്ള എല്ലാ അമേരിക്കന് വിമാനങ്ങളും സുരക്ഷിതമാണെന്നും സെന്റ്കോം വ്യക്തമാക്കി.
അമേരിക്കയും ഇറാനും തമ്മിലുള്ള സൈനിക സംഘര്ഷം തുടരുന്നതിനിടെയാണ് ഇരുപക്ഷത്തുനിന്നും പരസ്പരവിരുദ്ധമായ പ്രസ്താവനകള് പുറത്തുവരുന്നത്.
പുതിയ മിസൈല് ലോഞ്ചര് പുറത്തുവിട്ട് ഇറാന് അതിനിടെ, പുതിയ മിസൈല് ശേഷി ലോകത്തിന് മുന്നില് പ്രദര്ശിപ്പിച്ച് ഇറാന് വീണ്ടും കരുത്തുകാട്ടി. ഭൂഗര്ഭ മിസൈല് കേന്ദ്രത്തില് നിന്നുള്ള ദൃശ്യങ്ങളാണ് ഇറാന് ഔദ്യോഗിക ടെലിവിഷന് സംപ്രേഷണം ചെയ്തത്. ദ്രാവക ഇന്ധനം ഉപയോഗിക്കുന്ന രണ്ട് മിസൈലുകള് ഒരേസമയം വിക്ഷേപിക്കാന് ശേഷിയുള്ള പുതിയ ലോഞ്ചറാണ് ദൃശ്യങ്ങളിലുള്ളത്.
നേരത്തെ ഇറാന് ഉപയോഗിച്ചിരുന്ന ഖര ഇന്ധന ഇരട്ട ലോഞ്ചറുകളേക്കാള് സാങ്കേതികമായി ഏറെ മുന്നിലാണ് പുതിയ സംവിധാനം. കൂടുതല് കാര്യക്ഷമത നല്കുന്ന ദ്രാവക ഇന്ധനം ഉപയോഗിക്കുന്നതിനാല്, വിക്ഷേപണത്തിന് ശേഷവും മിസൈലുകളുടെ വേഗതയും സഞ്ചാരപാതയും നിയന്ത്രിക്കാന് ഓപ്പറേറ്റര്മാര്ക്ക് സാധിക്കും.
മിസൈല് കേന്ദ്രം എവിടെയാണെന്ന് ഇറാന് വെളിപ്പെടുത്തിയിട്ടില്ല. തങ്ങളുടെ മിസൈല് പദ്ധതികള് തകര്ത്തുവെന്ന മുന്കാല യു.എസ് അവകാശവാദങ്ങളെ പ്രതിരോധിക്കാനും സൈനിക കരുത്ത് വിളിച്ചോതാനുമാണ് ഇറാന് ഈ ദൃശ്യങ്ങള് പുറത്തുവിട്ടത്. ഇറാന്റെ പ്രതിരോധ ശേഷി ഗണ്യമായി വര്ധിച്ചിട്ടുണ്ടെന്നും യുദ്ധ സംവിധാനത്തില് അപ്രതീക്ഷിത ഘടകങ്ങളും അതീവ ഫലപ്രദമായ ആയുധങ്ങളും ഉള്പ്പെടുത്തിയിട്ടുണ്ടെന്നും റെവല്യൂഷണറി ഗാര്ഡ് എയ്റോസ്പേസ് ഫോഴ്സ് കമാന്ഡര് ബ്രിഗേഡിയര് ജനറല് സയ്യിദ് മജീദ് മൂസവി പറഞ്ഞു.



